އިނގިރޭސި ޕްރިމިއާ ލީގުގައި ލިވަޕޫލާ އެއްވަރުކުރެވުނު ނަމަވެސް، އެވަޓަން އޮތީ ލިވަޕޫލާ އެއް ފެންވަރެއްގައި ނޫން ކަމަށް އެ ޓީމުގެ ތަޖުރިބާކާރު ކޯޗު ކާލޯ އަންޗެލޮޓީ ބުނެފިއެވެ.
މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ އެވަޓަނުން ވަނީ ލީގުގައި ހޮނިހިރު ދުވަހުގެ ހަވީރު އަމިއްލަ ދަނޑުގައި ލިވަޕޫލާ 2-2 ން އެއްވަރުކޮށްފައެވެ. މި މެޗުގައި ދެ ފަހަރުވެސް ލިވަޕޫލުން ލީޑު ނަގާފައިވަނިކޮށް އެވަޓަނުން ނަތީޖާ އެއްވަރުކުރިއެވެ.
މިދިޔަ ސީޒަނަކުގެ މެދަކާ ހަމައިން އެވަޓަނާ ހަވާލުވި އަންޗެލޮޓީ ބުނީ ލިވަޕޫލާ ދެކޮޅަށް އެވަޓަނުން ރަނގަޅު ވާދައެއް ކުރި ކަމަށާއި، މި މެޗުގައި އެ ޓީމުން ގިނަ ކަންތައްތަކެއް ރަނގަޅުކުރި ކަމަށެވެ. އަދި ލިވަޕޫލާ އެއްވަރުކުރެވުނު ނަމަވެސް، އެވަޓަން އަދި އޮތީ އެ ޓީމާ އެއް ފެންވަރެއްގައި ނޫން ކަމަށްވެސް އަންޗެލޮޓީ ބުންޏެވެ.
އަންޗެލޮޓީ އިތުރަށް ބުނީ އެވަޓަނުގެ ފެންވަރު ދުވަހެއް ދުވަހަކުން ރަނގަޅު ވަމުން އަންނަ ކަމަށާއި، އެ ޓީމުގެ އަމާޒަކީ ލީގުގައި ހިމެނޭ ވަރުގަދަ ޓީމުތަކާ ރަނގަޅު ވާދައެއްކޮށް ނަތީޖާ ނެރުން ކަމަށެވެ.
މި ސީޒަނުގައި އަންޗެލޮޓީގެ އިރުޝާދުގެ ދަށުން އެވަޓަނުން ރަނގަޅު ނަތީޖާތަކެއް ނެރެމުން އަންނައިރު، އެ ޓީމުގެ ޒުވާން ފޯވާޑް ޑޮމިނިކް ކަލްވެޓް-ލެވިން އަންނަނީ ލީގުގައި މޮޅު ކުޅުމެއް ދައްކަމުންނެވެ. އެގޮތުން ލިވަޕޫލާ ދެކޮޅަށް ކުޅުނު މެޗުގައިވެސް އޭނާ ލަނޑު ޖެހިއިރު، އެ ލަނޑާއެކު މި ސީޒަނުގައި މިހާތަނަށް އެވަޓަނުން ކުޅުނު ފަސް މެޗުގައިވެސް ކަލްވެޓް-ލެވިން ވަނީ ލަނޑު ޖަހާފައެވެ. އަދި އެއީ ލީގުގައި އޭނާ ކާމިޔާބުކުރި ހަތްވަނަ ލަނޑެވެ.
މިހާތަނަށް ލީގުގައި ކުޅުނު މެޗަކުން އެވަޓަން ބަލިވެފައި ނުވާއިރު، އެ ޓީމު އޮތީ ތާވަލުގެ އެއްވަނައިގައި ކުޅުނު ފަސް މެޗުން ލިބުނު 13 ޕޮއިންޓާއެކުއެވެ.
