2012 ވަނަ އަހަރުން ފެށިގެން 2018 ވަނަ އަހަރުގެ ނިޔަލަށް ދައުލަތުން 172 ބިލިއަން ރުފިޔާގެ ދަރަނި ނުވަތަ ލޯނު ނަގާފައިވާކަން ރައްޔިތުންގެ މަޖިލީހުން ހާމަކޮށްފިއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގެ ތެރެއިން، ވަކި ހިސާބަކުން، މުޅި މަޖިލިސް ކޮމެޓީއަކަށް ގޮސް، ދައުލަތުގެ ދަރަންޏާ ގުޅޭ ޑްރާފް ރިޕޯޓާ ގުޅޭ ބަހުސް ކުރައްވަމުން ރިޔާސަތުގައި އިންނެވި މަޖިލީހުގެ ރައީސް، ރައީސް މުހައްމަދު ނަޝީދު އާއި މަޖިލީހުގެ މެމްބަރުންވަނީ ވަރަށް ދިގުކޮށް ބަހުސް ކުރައްވާފައެވެ.
މި ކޮމިޓީ ބައްދަލުވުމުގައި މަޖިލީހުގެ ރައީސް ވަނީ ދައުލަތުގެ ދަރަންޏާ ގުޅޭ ވަރަށް ގިނަ ތަފްސީލްތައް ދައުލަތުގެ ކަމާބެހޭ އިދާރާތަކުންނާއި އަދި ކޮމެޓީއަށް ބޭނުންވާ ހުރިހާ މައުލޫމާތެއް ސަރުކާރުގެ ފިނޭންސް މިނިސްޓަރު އިބްރާހީމް އަމީރުގެ ފަރާތުން ވަރަށް ތަފްސީލްކޮށް ފޯރުކޮށްދެއްވާފައިވާތީ، އެކަމަށް ޝުކުރު ވެސް އަދާ ކުރައްވާފައެވެ. މުޅި މުޖިލީގެ ކޮމެޓީން ބަލާފައިވަނީ 2012 ވަނަ އަހަރުން ފެށިގެން 2018 ވަނަ އަހަރާ ހަމައަށް ދައުލަތުން ނަގާފައިވާ ދަރަނި ބެލެހެއްޓިފައިހުރި ގޮތާއި އެލޯނުތައް ނަގާފައިވަނީ ގާނޫނާ އެއްގޮތަށް ސައްހަ ގޮތުގައިތޯ ބެލުމާއި، އަދި ނެގާފައިވާ ދަރަނި އަނބުރާ ދައްކަން ޖެހުނުއިރު، ދައުލަތުގެ މާލިއްޔަތާއި އާމްދަނީއާ ގުޅޭ ގޮތުންނެވެ.
ދަރަނީގެ ގޮތުގައި މަޖިލީހުން ބަލާ 7 ބާވަތެއްގެ ދަރަނީގެ ތަފްސީލީ މައުލޫމާތު މަޖިލީހުގެ ރައީސް ވަނީ ކޮމެޓީއަށް ހިއްސާ ކޮށް ދެއްވާފައެވެ. އެގޮތުން، ދޭދޭ ގައުމުތަކުން ނަގާފައިވާ ލޯނުތަކުގެ ގޮތުގައި 49 ލޯނު މިވަގުތު ވެސް އެބައޮތް ކަމަށް ރައީސް ނަޝީދު ވިދާޅުވިއެވެ. ބައިނަލްއަގްވާމީ ޖަމިއްޔާތަކާއި ޖަމާއަތްތަކުން ނަގާފައިވާ 124 ލޯނު އޮތް އިރު، ސަރުކާރު ހިއްސާވާ ކުންފުނިތަކަށް ދައުލަތުގެ ނަމުގައި ދޫކޮށްފައިވާ ގެރެންޓީގެ ދަރަނީގެ ގޮތުގައި 114 ގެރެންޓީ އެބައޮތް ކަމަށްވެސް މަޖިލީހުގެ ރައީސް ވިދާޅުވިއެވެ.
2012 އިން 2018 އަށް ނަގާފައިވާ ދަރަނީގެ ތަފްސީލް
- ދޭދޭ ޤައުމުތަކުން ނަގާފައިވާ ދަރަނި: 13،079،356.45
- ބައިނަލް އަޤުވާމީ ޖަމްއިއްޔާ ޖަމާއަތްތަކުން ނަގާފައިވާ ދަރަނި: 12،943،170،194.76
- ސަރުކާރު ހިއްސާވާ ކުންފުނިތަކަށް ދައުލަތުގެ ނަމުގައި ދޫކޮށްފައިވާ ގެނެރްޓީގެ ދަރަނި: 41،100،330،594.52
- ސަރުކާރާއި ސަރުކާރު ހިއްސާވާ ކުންފުނިތަކުން ނުދައްކާ ހުރިބިލްތައް: 5،418،217،200.28ރ (ފަސްބިލިއަން ހަތަރުސަތޭކަ އަށާރަމިލިއަން ދެލައްކަ ސަތާރަހާސް ދުއިސައްތަ ރުފިޔާ އަށާވީސް ލާރި)
- ސަރުކާރު ހިއްސާވާ ކުންފުނިތަކުގެ އޯވާރޑްރާފްޓްގެ އަދަދު: 78،759،180.74ރ (ހަތްދިހަ އަށްމިލިއަން ހަތްލައްކަ ފަންސާސްނުވަހާސް އެއްސަތޭކަ އަށްޑިހަ ރުފިޔާ ހަތްދިހަ ހަތަރު ލާރި)
- އެމްއެމްއޭއިން ނަގާފައިވާ ލޯނާއި، ގަނެފައިވާ ބޮންޑާއި، އަދި ޓްރެޝަރީ ބިލް: 7،410،091،183.32ރ (ހަތްބިލިއަން ހަތަރުސަތޭކަ ދިހަމިލިއަން ނުވަދިހައެއްހާސް އެއްސަތޭކަ އަށްޑިހަތިން ރުފިޔާ ތިރީސްދެ ލާރި)
- ސަރުކާރުން އެހެން ފަރާތްތަކަށް ވިއްކާފައިވާ ޓީ-ބިލް އަދި ބޮންޑް: 91،989،000،000.00ރ (ނުވަދިހައެއްބިލިއަން ނުވަސަތޭކަ އަށްޑިހަނުވަމިލިއަން ރުފިޔާ)
- ދައުލަތުގެ ޖުމްލަ ދަރަނި: 172،019،077،710.06ރ (ސަތޭކަހަތްދިހަދެ ބިލިއަން ނަވާރަ މިލިއަން ހަތްދިހަހަތްހާސް ހަތްސަތޭކަދިހަ ރުފިޔާ ހަ ލާރި)
މުޅި މަޖިލީހުގެ މި ކޮމެޓީން ވަނީ، މިހާރު ދައުލަތަށް ލިބެމުންދާ އާމްދަނީ ދައުލަތުން ނަގާފައިވާ ދަރަނި ދެއްކުމަކީ ކުރެވޭވެރުގެ ކަމެއްކަމަށް ނުވާތީ، ލޯނުތައް ދޫކޮށްފައިވާ ފަރާތްތަކާއި ވާހަކަ ދައްކައިގެން ލޯނުތައް ރީސްޓްރަކްޗަރ ކުރުމުގެ މުހިއްމުކަމުގެ މައްޗަށް ވާހަކަ ދައްކަވާފައެވެ.
މިދިއަ އަހަރުގެ ޑިސެމްބަރުން ޗައިނާއިން ފެނުނު ކޮވިޑް-19 ރޯގާ މުޅި ދުނިޔެއަށް ފެތުރި، ދުނިޔޭގެ އިގްތިޞާދު ދަށަށް ގޮސްފައިވާއިރު، ރާއްޖޭ އިގްތިޞާދު ވަނީ ވަރަށް ބޮޑަށް ދަށަށް ގޮސްފަ އެވެ.
