ޕީޕީއެމުން ދައުލަތުގެ މީޑިއާ ބޭނުންކުރާ މައްސަލަ ބްރޯޑްކާސްޓިން ކޮމިޝަނަށް
ޕީޕީއެމްގެ ކެމްޕޭންގެ ހަބަރުތައް ދައުލަތުގެ މީޑިއާއިން ގެނެސްދޭއިރު، އެމްޑީޕީގެ ހަރަކާތްތައް ގެނެސްނުދޭކަން ފާހަގަކޮށްފައިވޭ
ޕީޕީއެމްގެ ޖަލްސާއެއްގެ ތެރެއިން
ދައުލަތުގެ މީޑިއާ، ޕީއެސްއެމުން، ހަމައެކަނި ވެރިކަންކުރާ ޕީޕީއެމްގެ ކެމްޕޭން އެއްވުންތަކާއި، ސިޔާސީ ޖަލްސާތަކާއި، ކެމްޕޭން ހަބަރުތައް ގެނެސްދޭ މައްސަލަ އިދިކޮޅު އެމްޑީޕީން ބްރޯޑްކާސްޓިން ކޮމިޝަނަށް ހުށައަޅައިފި އެވެ.
އެމްޑީޕީގެ ފަރާތުން، ބްރޯޑްކާސްޓަރުންގެ ބެލެނިވެރިޔާކަމަށް ބުނާ، ބްރޯޑްކާސްޓިން ކޮމިޝަނަށް ހުށައަޅާފައިވާ މައްސަލާގައި ބުނެފައިވަނީ، ލޯކަލް ކައުންސިލް އިންތިހާބަށް ޕީޕިއެމްއިން ކުރިއަށްގެންދާ ކެމްޕޭން އެއްވުންތަކާއި، ޖަލްސާތަކާއި، އެއްވުންތަކުގެ ހަބަރުތައް ދައުލަތުގެ މީޑިއާއިން ގެނެސްދެމުންގެންދާ ކަމަށެވެ. ނަމަވެސް އެމްޑީޕީގެ އެއްވެސް ހަރަކާތެއް ގެނެސް ނުދޭކަމަށާއި، އެހެންކަމުން އެ މައްސަލަ ބަލައިދިނުމަށް އެދޭ ކަމަށެވެ.
ދައުލަތުގެ މީޑިއާ ހިންގުމަށް ފާސްކޮށްފައިވާ ޕީއެސްއެމްގެ ޤާނޫނު ބުނާގޮތުން ވަކި ފަރާތަކަށް ސިޔާސީ މަންފާއެއް ނުވަތަ ފައިދާއެއް ހޯދައިދިނުމަށް ދައުލަތުގެ މީޑިއާގެ އެއްވެސް ވަސީލަތެއް ބޭނުންކޮށްގެންނުވާނެ ކަމަށެވެ. އެގޮތުން ޕީއެސްއެމްގެ ޤާނޫނުގެ 6 ވަނަ މާއްދާގެ (ރ) ގައި ބުނެފައިވަނީ، ވަކި ފަރާތެއްގެ ސިޔާސީ މަސްލަހަތު ހިމާޔަތްކުރުމަށްޓަކައި ހަމަހަމަކަމާއި، އިންސާފުން ބޭރުވާގޮތަށް އެއްވެސް ކަމެއް ކޮށްގެން ނުވާނެ ކަމަށެވެ.
ފަހަކަށް އައިސް، ޕީޕީއެމްގެ އެކި ހަރަކާތްތަކާއި، އެއްވުންތައް ދައުލަތުގެ މީޑިއާގެ ޓީވީއެމް އިން އަންނަނީ ވަގުތުން ބްރޯޑްކާސްޓްކުރަމުންނެވެ. އެއީ ޕީއެސްއެމްގެ ޤާނޫނު ބުނާ ގޮތުން މަނާކަމެކެވެ. އެގޮތުން ޤާނޫނު ބުނާގޮތުން ސިޔާސީ ޕާޓީތަކުގެ ޖަލްސާތަކެއް ލައިވެއް ނުކުރެވޭނެ އެވެ. އޭގެއިތުރުން ޕީޕީއެމްގެ ކެމްޕޭން ލޯންޗިންގެ ހަބަރުތަކާއި، ކެމްޕޭން ހަރަކާތްތަކުގެ ހަބަރުތައް ޕީއެސްއެމްގެ އެކި ހަބަރު ގަޑިތަކުގައި އަންނަނީ ގެނެސްދެމުންނެވެ. ނަމަވެސް އެމްޑީޕީގެ ކެމްޕޭން އެއްވުންތަކުގެ ހަބަރުތަކައި، ކެމްޕޭން ލޯންޗިންގެ ހަބަރުތައް ގެނެސްދީފައެއް ނުވެއެވެ.
ފަހަކަށް އައިސް، ޓީވީއެމުން ޕީޕީއެމްގެ ޖަލްސާތަކާއި، ކެމްޕޭން އެއްވުންތައް ވަގުތުން ގެނެސްދެނީ، "ރައީސުލްޖުމްހޫރިއްޔާ ބައިވެރިވެވަޑައިގަންނަވާ ޖަލްސާ" ނުވަތަ "ރައީސުލްޖުމްހޫރިއްޔާގެ އަނބިކަނބަލުން ބައިވެރިވެވަޑައިގަންނަވާ ޖަލްސާ" ގެ ނަމުގައެވެ. ޤާނޫނުވާގޮތުން ރައީސުލްޖުމްހޫރިއްޔާ ނުވަތަ އެމަނިކުފާނުގެ އަނބިކަނބަލުން ބައިވެރިވެވަޑައިގަންނަވާ ސިޔަސީ ޖަލްސާތައް ގެނެސްދިނުމަށް ހުއްދައެއްދީފައެއް ނުވެއެވެ.
