އެއްމަސްދުވަހުގެ ކާޑު ގަންނާނެ ވަރުވެސް ދައުލަތުގެ ޚަޒާނާއަކު ނެތް:އަމީރު

ރާއްޖެއަށް ބޭނުންވާ އެއްމަސްދުވަހުގެ ކާޑު ގަންނާނެ ފައިސާ ވެސް ދިވެހި ދައުލަތުގެ ޚަޒާނާގައި ނެތް ކަމަށް އެމްޑީޕީގެ އިޤްތިސޯދީ ކޮމެޓީގެ ނައިބު މުޤައްރިރު އިބްރާހީމް އަމީރު ވިދާޅުވެއްޖެއެވެ.

ރާއްޖެ ޓީވީން އާދީއްތަ ދުވަހުގެރޭ ގެނެސްދިން ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން އިދިކޮޅު އިއްތިހާދު, އެމްޔޫއޯގެ ހިޔަނި ކެބިނެޓްގައިވެސް ހިމެނިވަޑައިގަންނަވާ އަމީރު ވިދާޅުވީ ރާއްޖޭގެ ސެންޓްރަލް ބޭންކް, މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ދައުލަތުގެ ރިޒާވް ސަރުކާރުގެ އެކިއެކި ކަންކަމަށް ބޭނުން ކުރަމުންދާ ތަން ފެންނަނީ ޤާނޫނާ ޚިލާފަށް ކަމަށާއި އެއީ ދުނިޔޭގެ އެއްވެސް ތަނެއްގައި ކަންކުރެވިގެން ވާނެ ގޮތް ނޫން ކަމަށެވެ.

އަމީރު ވިދާޅުވީ އެމްއެމްއޭއިން ހާމަ ކޮށްފައިވާ ތަފާސްހިސާބުތަކަށް ބަލާއިރު ބޭނުން ކުރެވޭ ދައުލަތުގެ ރިޒާވްގެ ގޮތުގައި ހުރީ 201 މިލިއަން ޑޮލަރުކަމަށް ބުނާއިރު ރިޒާވް ބޭންކް އޮފް އިންޑިޔާއާއި ސްޓޭޓް ބޭންކް އޮފް އިންޑިޔާއިން ނަގާފައިވާ ޑޮލަރުތައް ކަނޑާލުމުން ހަޤީގީ ރިޒާވްއެއްގެ ގޮތުގައި ހުރީ 25 އަކަށް މިލިއަން ޑޮލަރު ކަމަށެވެ.

"201 މިލއަން ޑޮލަރުގެ ތެރެއިން 110 މިލިއަން ޑޮލަރާއި އެސްބީއައިއިން ނަގާފައިވާ 75 މިލިއަން ޑޮލަރު ކަނޑާލީމާ ހަޤީގީ ރިޒާވް އަކަށް މިހުރީ 25 މިލިއަނެއްހާ ޑޮލަރު. މިއީ ހަޤީގަތުގައި ވަރަށް ކަންބޮޑުވާން ޖެހޭ ކަމެއް." އަމީރު ވިދާޅުވިއެވެ.

އަމީރު ވިދާޅުވީ އެ އަދަދަކީ ރާއްޖޭގެ ބޮޑު ކުންފުންޏެއްގެ ކެޕިޓަލްގެ ގޮތުގައިވެސް ހުންނަވަރު އަދަދެއް ކަމަށާއި މިހާ ހިސާބަށް މިދިޔައީ އެމްއެމްއޭ މިނިވަން ތަނެއްގެ ގޮތުގައި ހިނގުމުގެ ބަދަލުގައި އެ މުއައްސަސާގެ ޒިންމާ އަދާނުކޮށް ސަރުކާރުން ބޭނުންވާހާ ގޮތަކަށް ކަންކުރުމުގެ ސަބަބުން ކަމަށެވެ.

އަމީރު ވިދާޅުވީ ރާއްޖެއަކީ ބޭރުގެ އިމްޕޯޓަށް ބަރޯސާ ވެފައިވާ ޤައުމަކަށް ވާއިރު ހަ މަހުގެ އިމްޕޯޓަށްވާ ޑޮލަރު ރިޒާވްގައި ހުންނަން ވާނެ ކަމަށާއި މަދުވެގެން ތިން މަހުގެ އިމްޕޯޓަށްވާ ޑޮލަރު ރިޒާވްގައި ހުރުން މަޖްބޫރު ކަމަށެވެ.

"އިޤްތިސޯދީ ނަޒަރަކުން ބަލާއިރު ހުންނަން ޖެހޭނެ ހަމަސް. އެކަމަކު ނުވެގެންދާއިރު، ރާއްޖެއަކީ ކުޑަ ޤައުމަކަށް ވާއިރު ތިން މަސް ހުންނަންވާނެ ބޭނުން ކުރެވޭ ރިޒާވްއަށް ބަލާއިރު. މިހާރު ހުރީ އެންމެ 25 ދުވަހުގެ އިމްޕޯޓް" އަމީރު ވިދާޅުވިއެވެ.

އަމީރު ވިދާޅުވީ މިދާގޮތައް ދާނަމަ މިއަހަރުގެ ޖުލައި ހިސާބަށްދާއިރު ރަނގަޅު ނުކުރެވިއްޖެ ނަމަ މުދަލުގެ އަގު އަނެއްކާވެސް އިންތިހާއަށް އިތުރަށް ބޮޑުވެ ރައްޔިތުންނަށް އެކަން ތަހައްމަލް ކުރަން ޖެހޭނެ ކަމަށެވެ.