ދިވެހި ދިދަ އަކީ ސަރުކާރުގެ ރަމްޒެއް ނޫން، ދައުލަތުގެ ރަމްޒެއް: އަދާލަތު ޕާޓީ

ދިވެހި ދިދަ ހެޔޮގޮތުގައި ބޭނުން ކުރުމުގެ ހައްގު ދިވެހިންގެ ކިބައިން ނިގުޅައިގަތުމުގެ ބާރު ސަރުކާރަށް ލިބިގެން ނުވާ ކަމަށް އަދާލަތު ޕާޓީން ބުނެފި އެވެ.

އަދާލަތު ޕާޓީން ހޮނިހިރު ދުވަހު ކޮށްފައިވާ ޓްވީޓްގައި ވަނީ ދިވެހި ދިދަ އަކީ ސަރުކާރުގެ ރަމްޒެއް ނޫން ކަމަށާއި އެއީ ދިވެހި ދައުލަތުގެ ރަމްޒެއް ކަމަށް ބުނެފަ އެވެ. އަދި ދައުލަތް ނިސްބަތްވަނީ ހުރިހާ ރައްޔިތުންނަށް ކަމަށް ވެސް އަދާލަތުން ވަނީ ބުނެފަ އެވެ.

Advertisement

އަދާލަތުން މިހެން ބުނެފައިވާ އިރު ކުރީގެ ރައީސުލްޖުމްހޫރިއްޔާ މައުމޫން އަބްދުލް ގައްޔޫމްވެސް ވަނީ ދިވެހި ދިދަ އިހްތިރާމާއެކު ދިވެހި ކޮންމެ ރައްޔިތަކަށްވެސް ބޭނުން ކުރެވޭނެ ކަމަށް ވިދާޅުވެފަ އެވެ.

މީގެ އިތުރުން ދިވެހި ދިދަ ބޭނުން ކުރުމުގެ އުސޫލެއް އެކުލަވާ ލުމާ ގުޅިގެން ގިނަ އަދަދެއްގެ ގާނޫނީ ވަކީލުންވެސް އަންނަނީ އެކަމާ މެދު ކޮންބޮޑުވުން ފާޅުކޮށް ފާޑުކިޔަމުންނެވެ.

އެގޮތުން ގައުމީ ދިދަ ބޭނުންކުރުމާއި ގުޅޭ އުސޫލަކީ އުފެދުމުގައިވެސް ބާތިލު އެއްޗެއްކަމަށާއި ގައުމީ ދިދައާއި ބެހޭ ގާނޫނެއް ނެތި އުސޫލެއް ނުހެދޭނެކަމަށް ގާނޫނީ ވަކީލު މައުމޫން ހަމީދު އާއި ގާނޫނީ ވަކީލު އަދި ރައްޔިތުންގެ މަޖިލީހުގެ ކެންދޫ ދައިރާގެ މެންބަރު އަލީ ހުސައިން ވަނީ ވިދާޅުވެފަ އެވެ.

މީގެ އިތުރުން ގާނޫނީ ވަކީލު ހިސާން ހުސައިން ވެސް ވަނީ ރައްޔިތުންނަށް ކަންކަން މަނާކުރެވޭނީ ހަމައެކަނި ގާނޫނަކުން ކަމަށާއި މިނިސްޓްރީއެއްގެ އުސޫލަކީ ރައްޔިތުންގެ މައްޗަށް ގާނޫނީ ގޮތުން ބާރު ހިންގޭނެ އެއްޗެއް ނޫން ކަމަށް އޭނާ ވިދާޅުވި އެވެ.

އަދާލަތު ޕާޓީ އާއި ރައީސް މައުމޫން އަދި ގާނޫނީ ވަކީލުން މިގޮތަށް ވިދާޅުވެފައިވަނީ ހ. ތެމާގައި ހިންގަމުންދާ، ރައީސް މައުމޫން އޮފީހުގައި ދިވެހިރާއްޖޭގެ ޤައުމީ ދިދަ ނުނެގޭނެ ކަމަށް ފުލުހުން އަންގާފައި ވަނިކޮށެވެ.

ޕީޕީއެމްގެ ރައީސް މައުމޫން ފެކްޝަންގެ ސެކެޓްރީ ޖެނެރަލް، ޢަބްދުލް އަލީމް އާދަމް ވިދާޅުވީ، ހޯމް މިނިސްޓްރީން ނެރެފައިވާ ދިވެހި ދިދަ ބޭނުން ކުރުމުގެ އާ އުޞޫލާ ހަވަލާދީ، ޕީޕީއެމްގެ ރައީސްގެ އޮފީހުގައި ނަގާފައިވާ ދިވެހިރާއްޖޭގެ ޤައުމީ ދިދަ، އެގޮތަށް ނުނެގޭނެ ކަމަށް، ބުރާސްފަތި ދުވަހުގެރޭ އޭނާއަށް ގުޅައި، ފުލުހުން އަންގާފައިވާ ކަމަށެވެ. އަލީމް ވިދާޅުވީ، ޕާޓީގެ އޮފީހަކަށް ނުވާތީ ދިދަ ބޭނުން ނުކުރެވޭނެ ކަމަށް ވެސް ފުލުހުން އަންގާފައިވާ ކަމަށެވެ.

ހޯމް އެފެއާޒުން ދިވެހި ސަރުކާރުގެ ގެޒެޓުގައި ޝާއިއުކޮށް އާންމުކޮށްފައިވާ ދިވެހި ދިދަ ބޭނުން ކުރުމުގެ އާ އުސޫލުގައި ވަނީ ގައުމީދިދައިގެ ޝަރަފާއި އިއްޒަތް ހިފެހެއްޓޭ ފަދަ ގޮތެއްގައި ދިވެހި ދިދަ ބޭނުންކުރެވޭނެ ތަންތަނާއި ބަހައްޓަންވީ ގޮތާއި، އަދި ދިދަ ބޭނުންކުރުމުގައި ގެންގުޅެންވީ ހަމަތަކާއި މިންގަނޑުތައް ކަނޑައަޅާފައެވެ.

އެ އުސޫލުގައި ގައުމީ ދިދައިގެ ކުލަތަކާއި ސިފަ އަދި ދިދައިގެ މިންތައް ބަޔާންކޮށްފައި ވެއެވެ. މީގެ އިތުރުން ދާއިމީ ގޮތެއްގައި ދިދަ ނަގާފައި ހުންނަންވާނެ ތަންތަނާއި، ވަކި ވަގުތެއްގައި ދިދަ ނަގާފައި ހުންނަން ވާނެ ތަންތަން ވެސް ބަޔާންކޮށްފައި ވެއެވެ.