ކޮވިޑުން ރަނގަޅުވި މީހުންގެ އަދަދު 30 މިލިއަނަށް
19 އޮކްޓޯބަރު 2020 | ހޯމަ 02:53ބަލި ޖެހުނު މީހުންގެ އަދަދު ވަނީ 40 މިލިއަނަށް އަރާފަ
އިންޑިއާގައި ކޮވިޑަށް ޓެސްޓުކުރަނީ- ދެވަނަ އަށް އެންމެ ގިނަ ކޭސް ފެނިފައިވަނީ އެގައުމުން
މުޅި ދުނިޔޭގައި ކޮވިޑް-19 ޖެހުނު މީހުންގެ ތެރެއިން ބަލިން ރަނގަޅުވި މީހުންގެ އަދަދު 30 މިލިއަނަށް އަރާފައިވާ ކަމަށް ތަފާސްހިސާބުތަކުން ދައްކައިފިއެވެ.
އެންމެ ފަހުގެ ތަފާސްހިސާބުތަކުން ދައްކާ ގޮތުގައި ދުނިޔޭގެ އެކި ގައުމުތަކުން ކޮވިޑު ބަލިން ރަނގަޅުވި މީހުންގެ އަދަދު ވަނީ 30,080,655 (ތިރީސް މިލިއަން އަށްޑިހަ ހާސް ހަސަތޭކަ ފަންސާސް ފަހެއް) ށް އަރާފައެވެ.
ބަލިން ރަނގަޅުވި މީހުންގެ އަދަދު 30 މިލިއަނަށް އަރާފައިމިވަނީ މި ބަލި ޖެހުނު މީހުންގެ އަދަދު 40 މިލިއަނަށް އަރާފައިވަނިކޮށެވެ. އަދި މިހާތަނަށް މި ބަލީގައި 1 މިލިއަނަށް ވުރެ ގިނަ މީހުން ވަނީ މަރުވެފައެވެ.
މިހާތަނަށް ކޮވިޑުގެ އެންމެ ގިނަ ކޭސް ރިޕޯޓު ކޮށްފައިވާ ގައުމަކީ އެމެރިކާއެވެ. އެގޮތުން އެމެރިކާއިން ވަނީ 8 މިލިއަނަށް ވުރެ ގިނަ ކޭސް ރިޕޯޓު ކޮށްފައެވެ. ބުރާސްފަތި ދުވަހު 53000 ކޭސް ރިޕޯޓު ކޮށްފައިވާއިރު އެ ގައުމުން ވައިރަސް ޖެހިގެން މަރުވި މީހުންގެ އަދަދު ވަނީ 2 ލައްކަ އަށް ވުރެ އިތުރުވެފައެވެ. އަދި އެ ގައުމުގައި މި ބަލިން ރަނގަޅުވި މީހުންގެ އަދަދު ވަނީ ފަސް މިލިއަނަށް ވުރެ އިތުރުވެފައެވެ.
ދެވަނަ އަށް އެންމެ ގިނަ ކޭސް ރިޕޯޓު ކޮށްފައިވަނީ އިންޑިއާ އިންނެވެ. މިހާތަނަށް އެ ގައުމުން 7 މިލިއަނަށް ވުރެ ގިނަ ކޭސް ރިޕޯޓު ކޮށްފައިވާއިރު އޭގެ ތެރެއިން ހަ ލައްކަ އަށް ވުރެ ގިނަ މީހުން ވަނީ ބަލިން ރަނގަޅުވެފައެވެ. އަދި ކޮވިޑު ޖެހިގެން އެއް ލައްކަ މީހުން ވަނީ މަރުވެފައެވެ.
