ކޮމިޓީގައި ކުޑަކުއްޖާގެ މައުލޫމާތު ހާމަކުރެވުނީ އޮޅުމަކުން، މައާފަށް އެދެން: ޕީޖީ
15 އޮކްޓޯބަރު 2020 | ބުރާސްފަތި 14:20މި މައުލޫމާތުތައް ހާމަކުރީ ލައިވް ކޮށް ބްރޯޑްކާސްޓް ކުރި ކޮމިޓީ ބައްދަލުވުމެއްގައި
ޕްރޮސިކިއުޓަރ ޖެނެރަލް ހުސައިން ޝަމީމް
ރައްޔިތުންގެ މަޖިލިހުގެ ކޮމިޓީއެއްގައި ޖިންސީ ގޯނާގެ ޝިކާރައަކަށް ވީ ކުޑަކުއްޖެއްގެ މައުލޫމާތު ހާމަކުރެވުނު މައްސަލައިގައި ޕްރޮސިކިއުޓަރ ޖެނެރަލް ހުސައިން ޝަމީމް މައާފަށް އެދިވަޑައިގެންފިއެވެ.
ބުދަ ދުވަހު ލައިވް ކުރި ހިއުމަން ރައިޓްސް އެންޑް ޖެންޑަރ ކޮމިޓީގެ ބައްދަލުވުމުގައި މި މައުލޫމާތު ހާމަކުރެއްވީ ޕްރޮސިކިއުޓަރ ޖެނެރަލް އޮފީހުގެ ޕަބްލިކް ޕްރޮސިކިއުޓަރ އައިޝަތު ނަބާހާއެވެ. އަދި މި ކޮމިޓީގައި އެ ކުއްޖާގެ މައްސަލައިގައި ހާމަވާން ނުޖެހޭ އެތައް ތަފްސީލެއް ވަނީ ހިއްސާކުރައްވާފައެވެ.
މި މައްސަލައިގައި މައާފަށް އެދިވަޑައިގެން ކުރެއްވި ޓްވީޓުގައި ޕީޖީ ޝަމީމް ވިދާޅުވީ، އެއީ އެ ކޮމިޓީ ބްރޮޑްކާސްޓް ކުރަމުން ދާކަން ނޭނގި ހުރެ އޮޅުމަކުން ހިއްސާކުރެވުނު މައުލޫމާތެއް ކަމަށެވެ. އަދި މި ފަދަ ކަމެއް ތަކުރާރު ނުވާނޭހެން އިންތިޒާމްތައް ހަމަޖައްސާފައިވާ ކަމަށް ވިދާޅުވިއެވެ.
ޖިންސީ ކުށުގެ ގާނޫނުގައިވާ ގޮތުން، ޖިންސީ އަނިޔާގެ ނުވަތަ ޖިންސީ ގޯނާގެ ޝިކާރައަކަށްވާ ކުޑަކުދިންގެ މައުލޫމާތު ހާމަކުރުމަކީ ކުށެކެވެ.
އެގޮތުން އެ ގާނޫނުގެ 59 ވަނަ މާއްދާގެ (ހ) ގައި ވަނީ، އެ ކުށުގެ ޝިކާރައަށްވީ މީހަކީ ކާކުކަން ދެނެގަނެވިދާނެ އެއްވެސް މައުލޫމާތެއް، މީޑިއާގައި ހާމަކުރުމަކީ، ހުއްދަ ކަމެއް ނޫން ކަމަށެވެ. މި އުސޫލާ ހިލާފުވާ ފަރާތްތަކުގެ މައްސަލަ ކޯޓަށް ހުށައެޅުމުގެ ބާރު ޖެންޑަަރ މިނިސްޓަރަށް ލިބިދީފައިވާ އިރު، ކުށް ސާބިތުވާ މީހުން 10،000ރ. އާއި 15،000ރ. ދެމެދުގެ އަދަދަކުން ޖޫރިމަނާ ކުރުމުގެ ބާރު ކޯޓަށް ލިބިދެއެވެ.
ކުށުގެ ޝިކާރައަކަށް ވެފައިވާ ކުދިންގެ މައުލޫމާތު ހާމަކުރުމަކީ ކުޑަކުދިންގެ ހައްގުތައް ހިމާޔަތްކުރުމުގެ ގާނޫނުގެ ދަށުން ވެސް މަނާކޮށްފައިވާ ކަމެކެވެ. އެގޮތުން އެ ގާނޫނުގެ 33 ވަނަ މާއްދާގައި ބަޔާންކުރަނީ، ކުޑަކުދިންގެ ކަރާމާތައް އުނިކަން އަންނަ ގޮތަކަށް އެ ކުދިންގެ ޒާތީ މައުލޫމާތު ހާމަކޮށްގެން ނުވާނެ ކަމަށެވެ.
