ކުޑަކުއްޖާގެ ކަރުގައި ތާށިވި ރުފިޔާ ނަގައިފި
ކުއްޖާގެ އޮޕަރޭޝަނަށް 30 މިނިޓް ހޭދަވި
އައިޖީއެމްއެޗް: ކުޑަކުއްޖާގެ އޮޕަރޭޝަން ކުރީ އައިޖީއެމްއެޗްގައި
ކުޑަކުއްޖެއްގެ ކަރުގައި ތާށިވި ރުފިޔާ ފޮތި ނަގައިފިއެވެ.
އެރުފިޔާފޮތި ނަގާފައިވަނީ އާދީއްތަ ދުވަހު ހެނދުނު އައިޖީއެމްއެޗްގައި ކުރި ގާތްގަނޑަކަށް 30 އަކަށް މިނިޓްގެ އޮޕަރޭޝަނަކަށް ފަހުކަމަށް އާއިލާއިން ވަނީ ބުނެފައެވެ.
ރުފިޔާފޮއްޗެއް ކަރުގައި ތާށިވެގެން މާލެ ގެނައީ ށ. ފޭދޫ އުމުރުން 2 އަހަރުގެ ކުއްޖެކެވެ. އެކުއްޖާ ފުރަތަމަ ގެންދެވުނީ އެރަށު ސިއްހީ މަރުކަޒަށެވެ. އަދި އޭގެ ފަހުން ވަނީ އެއަތޮޅު ކުޅުދުއްފުށީ ރީޖަނަލް ހޮސްޕިޓަލަށް ގެންގޮސްފައެވެ.
ކުޅުދުއްފުށީ ރީޖަނަން ހޮސްޕިޓަލްގެ މީޑިޔާ އޮފިޝަލް ފާތިމަތު ހަސަން ހޮނިހިރު ދުވަހުގެ ރޭ ވިދާޅުވީ އެ ކުއްޖާއަށް އެކަށީގެންވާ ފަރުވާއެއް ހޮސްޕިޓަލުން ދެވޭނެ ގޮތެއް ނެތިގެން މާލެ ފޮނުވުމަށް ނިންމާފައިވާ ކަމަށެވެ.
މީޑިޔާ އޮފިޝަލް ވިދާޅުވީ މާލެ ގެންދަން ޖެހުނީ އޮޕަރޭޝަން ޑޮކްޓަރު ޗުއްޓީގައި ހުންނެވުމުން ދެވޭނެ ފަރުވާއެއް ނެތިގެން ކަމަށެވެ.
