ހިޔާނާތުގެ ލިސްޓުން ނަން ނަގައިދިނުމަށް އެދި އަދުރޭ އަދީބާއި ބައްދަލުކުރި

އެމްއެމްޕީއާރުސީގެ ހިޔާނާތާއި ގުޅޭ ގިނަ ބައެއްގެ ނަންތައް ކުރީގެ ނައިބު ރައީސް އަހުމަދު އަދީބު ހާމަކުރެއްވުމުން، އެ ލިސްޓުން ނަން ނަގައިދިނުމަށް އެދި ޕީއެންސީގެ ރައީސް އަބްދުއްރަޙީމް އަބްދުﷲ، އަދީބާއި ބައްދަލުކުރިކަން ރާއްޖެޓީވީއަށް އެނގިއްޖެއެވެ.

ނަން ނުޖެހުމަށް ޝަރުތުކޮށް ޕީޕީއެމް ޕީއެންސީގެ ކައުންސިލް މެންބަރެއް ރާއްޖެޓީވީއަށް މައުލޫމާތު ދެމުން ބުނީ އެމްއެމްޕީއާރުސީގެ ހިޔާނާތުގެ މައްސަލައިގައި ޝާމިލުވާ މީހުންގެ ތެރޭގައި އަބްދުއްރަހީމްގެ ނަން އޮތްކަން އެނގިގެން، އަދީބަށް ހުކުމް ކުރުމުގެ ކުރިން އޭނާ އަދީބަށް ގުޅައިގެން އެކަމާ ވާހަކަ ދައްކާފައިވާ ކަމަށެވެ. އަދި އެކަމުގެ ތެރެއިން އަބްދުއްރަހީމް އަދީބާއި ބައްދަލުކޮށްފައިވާ ކަމަށް ވެސް ކައުންސިލް މެންބަރު ވަނީ ބުނެފައެވެ.

އެ ކައުންސިލް މެމްބަރު އިތުރަށް ބުނީ މި ހިޔާނާތުގައި ހިމެނޭ ޕީޕީއެމްގެ ގިނަ އަދަދެއްގެ މީހުންގެ ނަންތައް އެންޓި ކޮރަޕްޝަން ކޮމިޝަން (އޭސީސީ) އަށް އަދީބުގެ ފަރާތުން ހުށަހަޅާފައިވާ ކަމަށެވެ. އަދި އަބްދުއްރަހީމް އަކީ އޭގެ ތެރޭގައި ހިމެނޭ އިސް މީހެއްގެ ގޮތުގައި އޭނާ ވަނީ ތުހުމަތު ކޮށްފައެވެ.

އަދީބާއި ބައްދަލުކޮށް ހިޔާނާތުގެ ލިސްޓުން ނަން ނެގުމުގެ ތުހުމަތު އަބްދުއްރަހީމްގެ މައްޗަށް ކުރެވުނު އިރު، ބުދަ ދުވަހު އޮތް މަޖިލީހުގެ މިނިވަން މުއައްސަސާތަކުގެ ކޮމިޓީ ބައްދަލުވުމުގައި އޭސީސީގެ ރައީސް މަރިޔަމް ޝިއުނާ ވަނީ އެމްއެމްޕީއާރުސީގެ ހިޔާނާތުގެ މައްސަލައިގައި ޝާމިލުވާ ކަމަށް ތުހުމަތު ކުރެވޭ 30 މީހެއްގެ މައްސަލަ، ހާއްސަ އިސްކަމެއް ދީގެން ބަލަމުން އަންނަ ކަން ހާމަކޮށްފައެވެ. އަދި އެ މައްސަލައިގެ ތުހުމަތު އެތައް ބައެއްގެ މައްޗަށް ކުރެވޭއިރު، ތަހުގީގުކޮށް، ދައުވާ ކުރުމަށް ވެސް ފޮނުވާނީ ވަކިވަކި މީހުންގެ މައްޗަށް ކަމަށް ޝިއުނާ ވަނީ ވިދާޅުވެފައެވެ.

ސަރުކާރަށާއި ރައީސް އިބްރާހީމް މުހައްމަދު ޞާލިހަށް ވަރަށް ބޮޑަށް ފާޑު ވިދާޅުވަމުން އަންނަ އަބްދުއްރަހީމް ވަނީ އަންގާރަ ދުވަހު ޕްރޮގްރެސިވް ކޯލިޝަނުން ބޭއްވި ޖަލްސާއެއްގައި ވަރަށް ބޮޑަށް ޖަޒުބާތުގައި ޖެހިވަޑައިގެން އަމިއްލައަށް ޖަލަށް ދާން ބޭނުންވެގެން އެކަން ކޮށްދިނުމަށް ވަރަށް އާދޭހާއެކު ދަންނަވާފައެވެ. އަދި މި ސަރުކާރުން އޭނާ ޖަލަށް ލުމަކީ ލިބޭނެ ފަހުރެއް ކަމަށް ވެސް ބުނެފައިވެއެވެ.

މި މޭރުމުން އަބްދުއްރަހީމް ވާހަކަ ދެއްކުމުން ސިޔާސީ ބައެއް ފަރާތްތަކުން އަންނަނީ އޭނާގެ ބައިވެރިވުން އެމްއެމްޕީއާރުސީގެ ހިޔާނާތުގެ މައްސަލައިގައި އޮތް ނަމަ އެކަން އަވަހަށް ތަހުގީގުކޮށް ހުކުމް ކުރުމަށް އެދި ގޮވާލަމުންނެވެ.