އަހަރުގެ ކުރިއަށް އޮތް ދުވަސްތަކުގައި ލައްކައަކަށްވުރެ ގިނަ ފަތުރުވެރިން އަންނާނެކަމަށް ލަފާކުރެވޭ: ޑރ. މައުސޫމް

އަހަރުގެ ކުރިއަށް އޮތް ދުވަސްތަކުގައި ރާއްޖެއަށް ލައްކައަކަށްވުރެ ގިނަ ފަތުރުވެރިން އަންނާނެކަމަށް ލަފާކުރެވޭކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

ޕެސިފިކް އޭޝިއާ ޓްރެވަލް އެސޯސިއޭޝަން (ޕާޓާ) އާއި ބީބީސީ ގުޅިގެން ކުރިއަށްގެންދިޔަ ވެބް ސެމިނަރއެއްގައި ވާހަކަދައްކަވަމުން މިނިސްޓަރ މައުސޫމް ވިދާޅުވީ ބޯޑަރު ހުޅުވާލިިފަހުން ރާއްޖެ އަންނަ ފަތުރުވެރިންގެ އަދަދު އިތުރުވަމުން އަންނަ ކަމަށެވެ. އަދި ޤައުމުތަކުން ކަރަންޓީންގެ އުސޫލުތައް ހަރުކަށި ކުރަމުން ގެންދިއުމުގެ ސަބަބުން ދަތިތައް ކުރިމަތިވަމުން އަންނަކަން ފާހަގަކުރައްވާ މިނިސްޓަރ މައުސޫމް ވިދާޅުވީ ހޯމް ކަރަންޓީންގެ އުސޫލުތައް ޤައުމުތަކުން ނަގައިފިނަމަ އެއީ "ގޭމް ޗޭންޖަރ" އަކަށް ވާނެކަމަށެވެ.

ރާއްޖޭގައި ފަތުރުވެރިން މަޑުކުރާ މުއްދަތު އިތުރުކަން ފާހަގަކޮށް މިނިސްޓަރ މައުސޫމް ވިދާޅުވީ ރާއްޖެއަށް ގިނައިން ފަތުރުވެރިން އަންނަ ޤައުމުތަކުގެ ފަތުރުވެރިން އެވްރެޖްކޮށް، ރާއްޖޭގައި ހޭޭދަކުރާ މުއްދަތު ދެ ހަފުތާއަށް އިތުރުކޮށްފައިވާކަން މިނިސްޓަރ ފާހަގަކުރެއްވިއެވެ. ޑރ. މައުސޫމް ވަނީ ރާއްޖޭގެ 80 ރިސޯޓެއް އަލުން އޮޕަރޭޝަނަށް ގެނެވި 25000 އަށްވުރެ ގިނަ އެނދު އޮޕަރޭޝަނަށް ގެނެވިފައިވާކަންވެސް ފާހަގަކުރައްވާފައެވެ.

ބައެއް ޤައުމުތަކުން ރާއްޖެއަށް ގިނަ އަދަދެއްގެ ފަތުރުވެރިން އަންނަކަމަށާއި، އަދި ފްލައިޓްތައްވެސް ބާރު ބޮޑުވެފައިވާކަމަށް މިނިސްޓަރ ވިދާޅުވިއެވެ. ކުރިއަށް އޮތީ ބިޒީ ދުވަސްތަކަކަށް ވާނެކަމަށް އުއްމީދުކުރާ ކަމަށް މިނިސްޓަރ ވިދާޅުވިއެވެ.

މިނިސްޓަރ މައުސޫމް ވަނީ، ސަރުކާރާއެކު ފަތުރުވެރިކަމުގެ ސިނާއަތުގައި މަސައްކަތްކުުރާ ފަރާތްތަކުން އެކުގައި ކުރާ ބުރަ މަސައްކަތް ފާހަގަކޮށްފައެވެ. އަދި ރާއްޖެ ޕްރޮމޯޓްކުރުމުގައިވެސް އެ ފަރާތްތަކުގެ ދައުރު ބޮޑުކަން ފާހަގަކޮށް، މިނިސްޓަރ ވަނީ ޝުކުރު އަދާކުރައްވާފައެވެ.