ކުރީގެ ނައިބް ރައީސް ޑރ. މުހައްމަދު ޖަމީލް އަޙްމަދަށް ވޭނަކަށް ނުވާ އެއްވެސް ވެރިކަމެއް ނެތް ކަމަށާއި އެންމެ ބުއްދިވެރިވާނީ އެ ވޭނުގައި ނޫޅުއްވާ އަމިއްލަ މަސައްކަތް ކުރެއްވުން ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ ކުރީގެ މެމްބަރު އަލީ ނިޒާރު ވިދާޅުވެއްޖެއެވެ.
ރާއްޖެޓީވީ ސިޔާސީ ދުނިޔެ ޕްރޮގްރާމްގައި ވާހަކަ ދައްކަވަމުން ނިޒާރު ވިދާޅުވީ ރައީސް ޔާމިންގެ ނައިބް ރައިސްއަކަށް ވަޑައިގެންނެވުމުން ވޭނަކަށް ވެވަޑައިގެން ނައިބް ރައީސް ކަމުން ބޭރުކޮށްލި ކަމަށާއި ރައީސް މައުމޫނާއި އެކު ވެސް މަސައްކަތް ނުކުރެއްވިގެން ދުރަށް ޖެހިވަޑައިގެންނެވި ކަމަށެވެ.
އެމްޑީޕީ އަށް ވެރިކަން ލިބޭ ކޮންމެ ފަހަރަކު ދިރިއުޅުން ވޭނަކަށްވާ ކަމަށް ޖަމީލު ވިދާޅުވުމާއި ގުޅިގެން އެކަމަށް ރައްދު ދެއްވައި، ނިޒާރު ވިދާޅުވީ އެންމެ ފުރަތަމަ ދިވެހި ގައުމީ ޕާޓީއާއި އެކު މަސައްކަތް ކުރެއްވި ނަމަވެސް އެކަންވެސް ވޭނަކަށް ވެގެން އެކަމުން ދުރަށް ޖެހިވަޑައިގެންނެވި އިރު ޖުމްހޫރީ ޕާޓީ އަދި ޕީޕީއެމްއާއި އެކުވެސް ނޫޅެވިގެން ވޭނަކަށް ވެގެން ދުރަށް ވަޑައިގެންނެވި ކަމަށެވެ.
އަދި މި ވެރިކަން ގެންނަން ވެސް މަސައްކަތް ކުރެއްވުމަށްފަހު އަނެއްކާވެސް، މި ވެރިކަން ވެސް ގޯސްވެ ވޭނަކަށްވެ އަނެއް ފަހަރަށް ޖަމީލް ހިޔާލު ބަދަލު ކުރެއްވިތަން ދިވެހި ރައްޔިތުންނަށް ފެނިގެންދިޔަ ކަމަށް ނިޒާރު ވިދާޅުވިއެވެ.
މިއީ އެމްޑީޕީގެ މައްސަލައެއް ނޫން ކަމަށާއި މައްސަލަ އަކީ ޖަމީލް ކަންކަމާއި މެދު ވިސްނާގޮތް ގޯސްވެވުމުން ކަަމަށް ވެސް ނިޒާރު ވިދާޅުވިއެވެ.
އެހެންކަމުން ޖަމީލަކީ ސިޔާސީ ހަޔާތުގައި އެއްތަނެއްގައި ފައި ހަރުނުލާ މީހެއް ކަމަށާއި ރަނގަޅަށްދާ ކޮންމެ ކަމެއްގައި ވެސް ޖަމީލް މަސައްކަތް ކުރައްވަނީ އެކަންތައް ގޯސް ކުރައްވަން ކަމަށް ނިޒާރު ވިދާޅުވިއެވެ.
އަދި ފާއިތުވި އެއްވެސް ވެރި ކަމަކީ ޖަމީލަށް ރަނގަޅު ވެރިކަމަކަށް ނުވާއިރު، ސިޔާސީ ބޭފުޅަކަށްވެ ހުރެ ދައްކަވާ ވާހަކަތައް ވެސް އެ ދައްކާ އެއް ޒާތަކަށް ދައްކަވަން އެނގިވަޑައިގަންނަވަން ޖެހޭނެ ކަމަށް ނިޒާރު ވިދާޅުވިއެވެ.
ޖަމީލު ހޮނިހިރު ދުވަހު ކުރެއްވި ޓްވީޓެއްގައި ވިދާޅުވީ ލައްކަ ދުވަހު އުޒުރު ދެއްކިއްޖެ ކަމަށާއި ދިވެހިންނަށް ދެ ފިކުރުގެ ތަފާތު މިހާރު ސާފުވެފައިވާ ކަމަށެވެ. އެގޮތުން އެމްޑީޕީ އަށް ވެރިކަން ލިބޭ ކޮންމެ ފަހަރަކު އުޅޭ ގޮތުން މިނިވަންކަން ގެއްލި، ދަރަނި ބޮޑުވެ، ދިރިއުޅުން ވޭނަކަށްވާ ކަމަށް ޖަމީލު ވިދާޅުވިއެވެ.
މިކަމަށް ރައްދު ދެއްވައި ނިޒާރު ވިދާޅުވީ އެމްޑީޕީގައި ހުންނެވި ނަމަ މަނިކުފާނަށް ވަޒީފާ ލިބޭނެ. ނިކަމެތި ހާލުގައި ނުހުންނަވާ ރަށަށް ދުރުވެ ދަނޑުވެރިކަން ކުރައްވާ. އަޅުގަނޑުވެސް މިކުރަނީ އެމަސައްކަތް~ ހިތަދޫ ދެކުނު ދާއިރާގެ ކުރީގެ މެމްބަރު އަލީ ނިޒާރު
މިހާރުގެ ސަރުކާރު ގެންނަވަން މަސައްކަތް ކުރައްވެމަށްފަހު، މިހާރު ސަރުކާރަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވާ ޖަމީލަކީ، ކުރީގެ ރައީސް އަބްދުﷲ ޔާމީންގެ ވެރިކަން ބަދަލުކުރުމަށް ވެސް ވަރަށް އިސްކޮށް އުޅުއްވި ބޭފުޅެކެވެ.
އެގޮތުން އޭރުގެ ސަރުކާރުގެ ކޮރަޕްޝަނާއި ވައްކަމުގެ ވާހަކަތައް ރައްޔިތުންނާއި ހަމައަށް ޖަމީލު ވަނީ ވަރަށް ސާފުކޮށް ތިލަ ކޮށްދެއްވާފައެވެ.
ނަމަވެސް މިދިޔަ ރައްޔިތުންގެ މަޖިލީހުގެ އިންތިހާބުން ލިބުނު ނާކާމިޔާބީއާއެކު ޖަމީލު ވަނީ އޭރު އޭނާ ހުންނެވި ޖުމްހޫރީ ޕާޓީން ވެސް ދުރަށް ޖެހިވަޑައިގެން މި ސަރުކާރަށް ފާޑު ވިދާޅުވާން ފައްޓަވާފައެވެ.
އަދި މިހާރުގެ އިދިކޮޅު ފަރާތްތަކާއެކު ޖަމީލު މަސައްކަތް ކުރައްވަން ފެއްޓެވިއިރު، ކުރީގެ ރައީސް ޔާމީންގެ ގާނޫނީ ވަކީލުންގެ ޓީމުގައި ވެސް އެންމެ އިސްކޮށް ހުންނަވަނީ ޖަމީލެވެ.
