ރާއްޖޭގައި ނަފްސާނީ ބަލިތަކަށް ފަރުވާ ދިނުމުގައި އަދިވެސް ގިނަ ގޮންޖެހުންތަކެއް އެބަ ހުރި ކަމަށް ރައީސް އޮފީހުގެ އަންޑާ ސެކެޓްރީ ޑރ. އަބްދުލް މަލިކް ވިދާޅުވެއްޖެއެވެ.
ދުނިޔޭގެ ނަފްސާނީ ބަލިތަކުގެ ދުވަހުގެ މުނާސަބަތުގައި މޯލްޑިވިއަން ރެޑްކްރެސަންޓުން އިސްނަގައިގެން ޔުނިސެފްއާއި ގުޅިގެން ކުރިއަށް ގެންދިޔަ ވެބިނާގައި ވާހަކަ ދައްކަވަމުން ޑރ. މަލިކް ވިދާޅުވީ ރާއްޖޭގައި ނަފްސާނީ ބަލިތަކަށް ފަރުވާ ދިނުން ހަރުދަނާ ކުރުމަށް ގިނަ ކަންތައްތަކެއް ކުރަން ޖެހޭ ކަމަށެވެ.
އެގޮތުން މާލޭ ސަރަހައްދަށް ސެންޓްރަލައިޒްވެގެން ފަރުވާ ލިބޭ ލިބުން ބަދަލު ކުރަން ޖެހިފައިވާ އިރު، ނަފްސާނީ ބަލިތަކަށް ފަރުވާ ދިނުމަށް ބޭނުންވާ ޓެކްނިކަލް ކެޕޭސިޓީ ވެސް އިތުރު ކުރަން ޖެހިފައިވާ ކަމަށް ޑރ. މަލިކް ފާހަގަކުރެއްވިއެވެ. މިވަގުތު މުޅި ރާއްޖޭގައި ވެސް ހުރީ 13 ސައިކެޓްރިސްޓުން ކަން ފާހަގަކުރައްވާ، ނަފްސާނީ ބަލިތަކަށް ފަރުވާދޭ އިރު، މަލްޓި ޑިސިޕްލިނަރީ ޓީމެއް ބޭނުންވާނެ ކަމަށް ވިދާޅުވިއެވެ.
އަދި ބައެއް ރީޖަނަލް ހޮސްޕިޓަލް ތަކުގައި ސައިކެޓްރިސްޓުން ތިބި ނަމަވެސް އެންމެ އެކަށީގެންވާ ގޮތުގައި ފަރުވާ ނުދެވޭ ކަމަށާއި އައިޖީއެމް ހޮސްޕިޓަލްގައި ވެސް ސައިކެޓްރިކް ޕޭޝަންޓުންނަށް އެޑްމިޓް ކޮށްގެން ފަރުވާ ދިނުމަށް ގިނަ ގޮންޖެހުންތަކާއި ކުރިމަތިލާން ޖެހޭ ކަމަށް ޑރ. މަލިކް ވިދާޅުވިއެވެ.
ޑރ. މަލިކް އިތުރަށް ވިދާޅުވީ، މާލޭ ސަރަހައްދުން ރައްޔިތުންނަށް ލިބޭ ފަރުވާތަަށް އަތޮޅުތެރޭގެ ރަށްތަކުން ވެސް އެންމެ އެކަށީގެންވާ ގޮތުގައި ފޯރުކޮށްދިނުމަށް މަސައްކަތްތައް ކުރަން ޖެހޭ ކަމަށެވެ.
މި ސަރުކާރުން އެމަރޖެންސީކޮށް ނުވަތަ އެއް ފަހަރު، ދެ ފަހަރު ތެރަޕީ ބޭނުންވާ ފަރާތްތަކަށް އާސަންދައިގެ ދަށުން އެކަން ކުރެވޭނެ މަގު ފަހިކޮށްދީފައި ވާއިރު، ދާއިމީކޮށް ތެރަޕީ ނަގަން ބޭނުންވާ ފަރާތްތަކަށް އެންސްޕާގެ ދަށުން އެކަން ކުރެވޭނެ ނިޒާމެއް މިހާރު ވަނީ ގާއިމް ކޮށްފައެވެ. މިކަންތައްތަކުގެ މައުލޫމާތު ރައްޔިތުންނަށް އެންމެ އެކަށީގެންވާ ގޮތުގައި ލިބިފައިނުވާކަން ވެސް މަލިކް ވަނީ ފާހަގަ ކުރައްވާފައެވެ.
