ކުރީގެ ދަރަނިތައް މި ސަރުކާރަށް ދައްކަން ޖެހުނުއިރު އާމްދަނީއެއް ނެތް: ރައީސް ނަޝީދު
ގިނަ ލޯނުތައް ދައްކަން ޖެހެނީ 2021 އިން 2023 އަށް ކަމަށާއި އެހެންނަމަވެސް މިވަގުތު ސަރުކާރުގައި އާމްދަނީއެއް ނެތް ކަމަށް ނަޝީދު ވިދާޅުވި
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ދަރަނީގެ ނުރައްކަލަކީ ދަރަނި އަނބުރާ ދައްކަންޖެހޭއިރު އެވަރަށް ފައިސާ ނެތުންކަމަށް ވިދާޅުވެ އެކަމުގެ ކަންބޮޑުވުން ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދު ފާޅުކުރައްވައިފިއެވެ.
އެކަމާއި ގުޅިގެން ރައީސް ނަޝީދު ކުރެއްވި ޓްވީޓެއްގައި ވިދާޅުވީ 2012 ވަނަ އަހާރައި 2018 ވަނަ އަހަރާ ދެމެދު ސަރުކާރުން ނަގާފައިވާ ގިނަ ދަރަނިތަކުގެ ގްރޭސް ޕީރިއަޑް ހަމަވެ ދައްކަން ޖެހިފައިވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރަށް ކަމަށެވެ. އޭގެ ތެރެއިން ގިނަ ލޯނުތައް ދައްކަން ޖެހެނީ 2021 އިން 2023 އަށް ކަމަށާއި އެހެންނަމަވެސް މިވަގުތު ސަރުކާރުގައި އާމްދަނީއެއް ނެތް ކަމަށް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެމަނިކުފާނު ދެކިވަޑައިގަންނަވާ ގޮތުގައި މިއަދުގެ ހާލަތުގައި އެންމެ ބުއްދިވެރި ގޮތަކީ 2012-2018 ގެ ދަރަނި އިތުރު ޖޫރިމަނާއަކާއި ނުލާއި ރިސްޓްރަކްޗާރ ކުރުންކަމަށެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ޗައިނާއިން ބޮޑެތި ލޯނުތަކެއް ނަންގަވާފައިވާތީ އެކަމުގެ ކަންބޮޑުވުން ނަޝީދު ގެންދަވަނީ އަބަދުވެސް ފާޅުކުރައްވަމުންނެވެ.
ދާދިފަހުން ރައްޔިތުންގެ މަޖިލީހުގައި ވާހަކަ ދައްކަވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވެފައިވަނީ ރާއްޖެއިން އެކި ގައުމުތަކުން ނަގާފައިވާ ލޯނުތައް ލުއި ކޮށްދިނުމަށް ކުރެވެމުންދާ މަޝްވަރާތައް ކުރިއަށް ދާ ކަމަށެވެ. ކޮވިޑް-19 ގެ މި ހާލަތާއި ގުޅިގެން ރާއްޖެއަށް އިތުރު ގޮންޖެހުންތަކެއް ކުރިމަތިވެފައިވާތީ މި ގޮންޖެހުންތަކުން އަރައިގަތުމަށް ޖީ-20 ގައުމުތަކުގެ ޑެޓް ސަސްޕެންޝަން އިނީޝިއޭޓިވްގައި ރާއްޖެއިން ބައިވެރިވެގެން މަސައްކަތް ކުރަމުންދާ ކަމަށް އަމީރު ވިދާޅުވިއެވެ.
ކޮވިޑާ ގުޅިގެން ގައުމީ އުފެއްދުންތެރިކަން ދަށަށް ދިއުމާއި އެކު ރާއްޖޭގެ ހާލަތު ދެމެހެއްޓެނިވި މިންގަނޑަކަށް ގެންދިއުމަށްޓަކައި ލޯނު ދޫކޮށްފައިވާ ފަރާތްތަކާއި އެކު މަޝްވަރާކުރަމުންދާ ކަމަށްވެސް މިނިސްޓަރ ވިދާޅުވިއެވެ.
ރާއްޖެއިން ނަގާފައިވާ ލޯނުތައް ދެއްކުމުގެ މުއްދަތު ފަސްކޮށްދޭން ޗައިނާއިން ވަނީ ނިންމާފައެވެ. އަދި ޖީ-20 ގައުމުތަކުން ކުދި އަދި ކުރިއަރަމުން އަންނަ އިގްތިސާދުތަކުން އެ ގައުމުތަކަށް ދައްކަން ޖެހޭ ދަރަނި ދެއްކުން މި އަހަރުގެ ނިޔަލަށް މަޑުޖައްސާލަން ނިންމާފައިވާ ނިންމުން މުރާޖައާ ކުރުމަށް ވެސް ދިވެހި ސަރުކާރުން ވަނީ ގޮވާލާފައެވެ.
ކޮވިޑާއި ގުޅިގެން ރާއްޖެއަށް ލިބޭ އާމްދަނީ ބޮޑުތަނުން ދަށްވެފައިވާއިރު ދަރަނިވަނީ އިތުުރުވެފައެވެ. ފިނޭންސް މިނިސްޓްރީގެ ތަފާސްހިސާބުތަކަށް ބަލާއިރު ދައުލަތުގެ ދަރަނި އުޅެނީ 73.9 ބިލިއަން ރުފިޔާގައެވެ. މީގެ ކުރިން ފިނޭންސް މިނިސްޓަރު އިބްރާހީމް އަމީރު ވަނީ ދައުލަތުގެ ދަރަނިތައް ދެއްކުން ލަސްކުރެވިއްޖެ ނަމަ ހަތަރު ބިލިއަން ރުފިޔާ ސަލާމަތް ކުރެވޭނެ ކަމަށް ވިދާޅުވެފައެވެ.
