ހުޅުމާލޭ ޖަލުން ޕޮޒިޓިވްވި މީހުން ރަނގަޅުވެ، ޖަލު އާންމު ޙާލަތަށް!
ހޮނިހިރު ދުވަހުން ފެށިގެން ޖަލު އާންމު ޙާލަތައް ގެނެވިފައިވޭ
ހުޅުމާލޭ ޖަލުގެ އޮފިސަރުންތަކެއް- ހުޅުމާލޭ ޖަލުން ޕޮޒިޓިވް ކޭސްތަކެއް ފެނުމާއެކު ގިނަ އޮފިސަރުންނާއި ޤައިދީންގެ ސާމްޕަލް އޭރު ނަގާފައިވޭ
ހުޅުމާލޭ ޖަލުން ޕޮޒިޓިވްވި އެންމެން ރަނގަޅުވެ، ޖަލު އާންމު ޙާލަތަށް ގެނެސްފިއެވެ.
އެކަމާ ގުޅޭގޮތުން ކޮމިޝަނަރ އޮފް ޕްރިޒަންސް އަހުމަދު މުޙައްމަދު ފުޅު ހޮނިހިރު ދުވަހު ކުރެއްވި ޓްވީޓެއްގައި ވިދާޅުވީ، ހުޅުމާލޭ ޖަލުން ކޮވިޑަށް ޕޮޒިޓިވްވި ޤައިދީނާއި ބަންދު މީހުން ބަލިން ރަނގަޅުވެފައިވާ ކަމަށެވެ. އަދި އެއާއެކު ޖަލުގައި އޮތް ކަރަންޓީނު މުއްދަތު ނިމުމަކަށް އައުމުން ހޮނިހިރު ދުވަހުން ފެށިގެން ޖަލު އާންމު ޙާލަތައް ގެނެވިފައިވާކަމަށް ކޮމިޝަނަރ ވިދާޅުވިއެވެ.
ކޮމިޝަނަރުގެ ޓްވީޓުގައި ވަނީ މި ޙާލަތުން އަރައިގަތުމަށް މަސައްކަތް ކޮށްދެއްވި އޮފިސަރުންނަށާއި އެކި ފަރާތްތަކަށް ޝުކުރު އަދާކުރައްވާފައެވެ.
ހުޅުމާލޭ ޖަލުން ޕޮޒިޓިވްވި މީހުންނާ ގުޅޭގޮތުން ކަރެކްޝަނުން އާއްމު ކޮށްފައިވާ ބަޔާނެއްގައި ބުނީ، ޕޮޒިޓިވްވި ހަ މީހުންގެ ތެރެއިން ފަސް މީހުންނަކީ އިމިގްރޭޝަން ޤާނޫނާ ޚިލާފުވެގެން ފުރުވާލެވެންދެން ބައިތިއްބާފައި ތިބި ފަސް ބިދޭސީންނާއި، ހުޅުމާލެ ޖަލުގައި ހުކުމް ތަންފީޒު ކުރަމުންދިޔަ ގައިދީއެއް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އަންގާފައިވާ ކަމަށެވެ. އަދި އެއާ ގުޅިގެން ނެގުނު ސާމްޕަލްތަކަށްފަހު އިތުރު ޤައިދީންނާއި ބަންދު މީހުން ޕޮޒިޓިވްވެފައިވެއެވެ.
ހުޅުމާލޭ ޖަލުގައި ކޮވިޑް ވައިރަސް ވަދެފައި ކަމަށް ބެލެވެނީ އަލަށް ގެނެވުނު ބިދޭސީންގެ ފަރާތުން ކަމަށް ކަރެކްޝަނުން ވަނީ ބުނެފައެވެ. އަދި ކޮވިޑު ކޭސްތަކެއް ފެނުމާއި ގުޅިގެން ގިނަ އޮފިސަރުންނާއި، ނަރުހުންގެ އިތުރުން ޤައިދީންގެ ސާމްޕަލް އޭރު ނަގާފައިވެއެވެ.
