ޖަކާޓަރގައި މަސައްކަތްތެރިންގެ ހައްގުގައި ކުރަމުންދާ މުޒާހަރާގައި 400ށް ވުރެ ގިނަ މީހުން ހައްޔަރުކޮށްފި
9 އޮކްޓޯބަރު 2020 | ހުކުރު 03:36އެގާނޫނުގެ ސަބަބުން މަސައްކަތްތެރިންގެ ހައްގުތައް ވަރަށް ބޮޑަށް ގެއްލޭ
މަސައްކަތްތެރިންގެ ގާނޫނާ މެދު ހިތްހަމަ ނުޖެހިގެން އިންޑޮނޭޝިޔާގެ ބޮޑެތި ސިޓީގައި އާންމުންގެ ގިނަ ބަޔަކު ދަނީ މުޒާހަރާތައް ކުރަމުން
އިންޑޮނޭޝިޔާގެ މަސައްކަތްތެރިންގެ ގާނޫނަށް ގެނައި އައު އިސްލާހުތަކާއި މެދު ހިތްހަމަ ނުޖެހިގެން ޖަކާޓަރގައި ކުރިއަށް ގެންދިޔަ މުޒާހަރާގައި 400ށް ވުރެ ގިނަ މީހުން ހައްޔަރުކޮށްފިއެވެ.
ބޭރުގެ މީޑިއާތަކުގައި ރިޕޯޓު ކޮށްފައިވާ ގޮތުގައި އިންޑޮނޭޝިޔާގެ މަސައްކަތްތެރިންގެ ގާނޫނަށް އައު އިސްލާހުތަކެއް ގެނެސް އެ ގާނޫނު ވަނީ ފާސްކޮށްފައެވެ. ނަމަވެސް އެގާނޫނުގެ ސަބަބުން މަސައްކަތްތެރިންގެ ހައްގުތައް ވަރަށް ބޮޑަށް ގެއްލޭ ކަމަށް މުޒާހަރާގެ ބައިވެރިން ބުނެއެވެ. އަދި މި ގާނޫނަކީ ތިމާވެށި ރައްކާތެރިކުރުމަށް މަސައްކަތް ކުރާ ކޮމިއުނިޓީތަކުގެ ހައްގުތަކަށް ވެސް ބެލުމެއް ނެތި އަވަސް އަރުވާލައިގެން ފާސްކޮށްފައިވާ ބިލެއް ކަމަށް ރިޕޯޓުތަކުން ބުނެއެވެ.
މިއީ މަސައްކަތްތެރިންގެ ހައްގުގައި ކުރަމުންދާ މުޒާހަރާތަކެއް ކަމަށާއި، ވީހާ ވެސް ގިނަ ބަޔަކު ބައިވެރިވުމަށް މުޒާހަރާގެ ބައިވެރިން ދަނީ ގޮވާލަމުންނެވެ.
މިގާނޫނާ ދެކޮޅަށް އިންޑޮނޭޝިޔާގެ ބޮޑެތި ސިޓީތަކުގައި މުޒާހަރާ ކުރަމުންދާތާ ތިން ދުވަސް ވެފައިވާއިރު، އެގައުމުގެ ރައީސް ޖޮކޯ ވިޑޯޑޯ ވިދާޅުވެފައިވަނީ މިގާނޫނުގެ ސަބަބުން ގިނަ ވަޒީފާތައް އުފެދި ލޭބަރ ރެގިއުލޭޝަން ކަންތައްތައް ހަރުދަނާ ކުރެވޭނެ ކަމަށެވެ. އަދި ބޭރުގެ އިންވެސްޓްމެންޓްތައް ގެނައުމަށް ވެސް މަގުފަހިވެގެންދާނެ ކަމަށެވެ.
މުޒާހަރާތަކާ ގުޅިގެން ޖަކާޓަރގެ ފުލުހުން ބުނެފައިވަނީ ހިނގާދިޔަ ކުރިމަތިލުންތަކުގެ ސަބަބުން ބައެއް އޮފިސަރުންނަށް އަނިޔާވެ ފަރުވާ ދޭން ޖެހިފައިވާ ކަމަށެވެ.
މުޒާހަރާގެ ބައިވެރިން ދަނީ ތަންތަން ހަލާކުކުރުމާއި، ހުޅުޖެހުމުގެ ކަންތައްތައް ކުރަމުންނެވެ. ހާލަތު ގޯސްވަމުންދާއިރު، މުޒަހަރާތައް ކޮންޓްރޯލް ކުރުމަށް ޖަކާޓަރގެ 9000ށް ވުރެ ގިނަ ފުލުހުން ހަރަކާތްތެރިވަމުންދާ ކަމަށް ރިޕޯޓުތަކުން ބުނެއެވެ.
މީގެ އިތުރުން އިންޑޮނޭޝިޔާގެ ރެޑް ކްރޮސް އިން ބުނެފައިވަނީ މުޒާހަރާތައް ކޮންޓްރޯލް ކުރުމަށް ކަރުނަ ގޭހާއި، ފެން ޖެހުމުން މުޒަހަރާގެ ބައިވެރިންނަށް ނޭވާލާން ދަތިވެ އެކިވަރުގެ އަނިޔާތައް ލިބިފައިވާ ކަމަށެވެ.
