އިންޑިއާ، ނޭޕާލް އަދި ބަންގްލަދޭޝް އަށް ކުރަމުންދާ މޫސުމީ ވިއްސާރައިގައި 221 މަރު

އިންޑިއާ، ނޭޕާލް އަދި ބަންގްލަދޭޝް އަށް ކުރަމުންދާ މޫސުމީ ވިއްސާރައިގައި މަދުވެގެން 221 މީހުން މަރުވެއްޖެ ކަމަށާއި އަދި 1.5 މިލިއަން މީހުން ގެދޮރުދޫކޮށް ދާން ޖެހިފައިވާ ކަމަށް އޮފިޝަލުން ބުނެފިއެވެ.

ނޭޕާލްގެ ހޯމް މިނިސްޓަރު އަންގާރަ ދުވަހު އެގައުމުުގެ ގާނޫނު ހަދާ މަޖިލީހުގައި ބުނެފައި ވަނީ އެގައުމަށް ކުރަމުންދާ ވިއްސާރާގައި 111 މީހުން މަރުވެއްޖެ ކަމަށާއި 35 މީހަކު ހޯދާ ނުފެނިފައިވާ ކަމަށެވެ. އަދި ބޯކޮށް ވާރޭވެހި ފެންބޮޑުވުމުގެ އަސަރު އާބާދީގެ 20 އިން ސައްތަ އަށް ކޮށްފައިވާ ކަމަށެވެ.

ރިޕޯޓުތައް ބުނާ ގޮތުން ބޯކޮށް ވާރޭ ވެހުމުގެ ސަބަބުން ބަންގްލަދޭޝްގެ ތިންބައިކުޅަ އެއްބަޔަަށް ވަނީ ފެންބޮޑުވުމުގެ އަސަރު ވަރަށް ބޮަޑަށް ކޮށްފައެވެ. އަދި މަދުވެގެން 29 މީހަކު ވަނީ މަރުވެފައެވެ. އަދި ފެންބޮޑުވުމުގެ ސަބަބުން 1.5 މިލިއަން މީހުން ވަނީ ރައްކާތެރި ސަރަހައްދުތަކަށް ބަދަލުވާން ދަތިތަކާ ކުރިމަތިލާން ޖެހިފައެވެ.

އިންޑިއާ އަށް ބަލާއިރު ބޯކޮށް ވާރޭވެހުމުގެ ސަބަބުން ބިހާރް، ވެސްޓް ބެންގަލް އަދި އައްސާމް ސްޓޭޓުން ވަނީ 81 މީހުން މަރުވެފައެވެ. ރިޕޯޓުތައް ބުނާ ގޮތުން އުތުުރު އިންޑިއާގައި ރޭލުގެ ޚިދުމަތް ވަނީ މުޅިން ކެނޑިފައެވެ. އަދި އައްސާމް ސްޓޭޓްގެ އިމާޖެންސީ ކޭމްޕްތަކުގައި މަދުވެގެން 200,000 މީހުން ދަނީ ބޯހިޔާވަހިކަން ހޯދަމުންނެވެ.

އިންޑިއާ، ނޭޕާލް އަދި ބަންގްލަދޭޝް އަށް ޖޫން އިން ސެޕްޓެމްބަރާ ހަމައަށް ކުރާ މޫސުމީ ވިއްސާރައަކީ ދަނޑުވެރިންނަށް މުހިންމު ވިއްސާރައެކެވެ. އެހެން ނަމަވެސް ކޮންމެ އަހަރަކު ވެސް މިގައުމުތަކުން ފުރާނަތަކެއް ގެއްލި ތަކެއްޗަށް ދަނީ ބޮޑެތި ގެއްލުންތަކެއް ވަމުންނެވެ.