މުޒާހަރާގައި މަރުވި ކިޔަވާ ކުއްޖާ މަރާލީ ސިފައިން: ވެނެޒުއޭލާގެ ޗީފް ޕްރޮސިކިއުޓަރު
ވެނެޒުއޭލާ ގައި ސަރުކާރާއި ދެކޮޅަށް ދަނީ ބޮޑެތި މުޒާހަރާތައް ކުރަމުން
ވެނެޒުއޭލާގެ ސަލާމަތީ ބާރުތަކާ އާންމުންނާ ދެމެދު ދަނީ ބޮޑެތި ހަމަނުޖެހުންތައް ހިނގަމުން
ވެނެޒުއޭލާގެ ވެރިރަށް ކަރަކަސް ގައި މިދިޔަ މަހު ބޭއްވި ސަރުކާރާ ދެކޮޅު މުޒާހަރާގައި މަރުވި ކިޔަވާ ކުއްޖާ މަރުވީ ސިފައިންގެ ނެޝެނަލް ގާޑުން އެއްލި ޓިއާ ގޭސް ކެނިސްޓާއެއްގެ ސަބަބުން ކަމަށް ވެނެޒުއޭލާގެ ޗީފް ޕްރޮސިކިއުޓަރު ވިދާޅުވެއްޖެއެެވެ.
ހުއާން ޕަބްލޯ ޕާނެލީޓް މަރުވީ ޓިއާ ގޭސް ކެނިސްޓާ އެއްލުމުގެ ސަބަބުން ލިބުނު ޝޮކަކުން ކަމަށް ރިޕޯޓުތައް ބުނެއެވެ.
ޕާނެލީޓްގެ މަރާ ބެހޭ ގޮތުން ވެނެޒުއޭލާގެ ސަރުކާރުގެ ބައެއް އޮފިޝަލުން ބުނެފައި ވަނީ އޭނާ މަރާލައިފައި ވަނީ މީހަކު "ބޯލްޓް ގަން" އެއް ބޭނުންކޮށްގެން ކަމަށެވެ.
ވެނެޒުއޭލާގެ ޗީފް ޕްރޮސިކިއުޓާ ލުއިސާ އޯރޓޭގާ ނޫސްވެރިންގެ ބައްދަލުވުމެއްގައި ވިދާޅުވީ، މަންޒަރު ދުށްމީހުންގެ ހެކި ބަހުންނާއި އަދި ފޮރެންސިކް ހެކިތަކުން އެެނގެނީ ޕާނެލީޓް މަރުވެފައި ވަނީ ޓިއާ ގޭސް ކެނިސްޓާއެއް އެއްލުމުގެ ސަބަބުން ކަަމަށެވެ. އިތުރަށް އޯޓޭގާ ވިދާޅުވީ، ޓިއާ ގޭސް ކެނިސްޓާ ސީދާ އެއްލި އޮފިސަރު "ކުރިއަށް ހުރި" ދުވަސްތަކުގައި ދެނެގަނެވޭނެ ކަމަށެވެ.
އޭޕްރީލްއިން ފެށިގެން ކޮންމެ ދުވަހަކެއްގައި ވެނެޒުއޭލާ ގައި ދަނީ ސަރުކާރާ ދެކޮޅު މުޒާހަރާތައް ބާއްވަމުންނެވެ.
ވެނެޒުއޭލާގައި ހަލަބޮލިކަން ބޮޑުވެފައިވާއިރު އެމެރިކާއިން ވަނީ ވެެނެޒުއޭލާގެ ސުޕްރީމް ކޯޓުގެ ފަނޑިޔާރުންނަށް ދަތި ކުރުމުގެ ފިޔަވަޅު ވެސް ދާދިފަހުން އަޅަފައެވެ. އެމެރިކާ އިން ދަތި ކުރުމުގެ ފިޔަވަޅު އެޅީ ވެނެޒުއޭލާގެ ސުޕްރީމް ކޯޓުގެ އިސް ފަނޑިޔާރަށާއި އަދި އިތުރު ހަތް ފަނޑިޔާރުންގެ މައްޗަށެވެ. އެމެރިކާ އިން ދަތި ކުުރުމުގެ ފިޔަވަޅު އެޅި އިރު، ސްޕްރީމް ކޯޓުން މިއަހަހަރު ކުރީކޮޅު ގާނޫނު ހަދާ މަޖިލީހުގެ ބާރުތައް ވަނީ ނިގުޅައިގެންފައެވެ. ގާނޫނު ހަދާ މަޖިލިސް ކޮންޓްރޯލް ކުރަމުން ދިޔައީ އިދިކޮޅު ފަރާތްތަކުންނެވެ.
