އިންޑިއާ، ބަންގްލަދޭޝް އަދި ނޭޕާލް އަށް ކުރަމުންދާ މޫސުމީ ވިއްސާރާގައި މަރުވި މީހުން އަދަދު 1200 އަށް އަރައިފި ކަމަށް އޮފިޝަލުން ބުނެފިއެވެ.

މި ތިން ގައުމަށް ކޮންމެ އަހަރަކުވެސް ޖޫން އިން ސެޕްޓެމްބަރު މަހަަށް ކުރާ މޫސުމީ ވިއްސާރާގައި އާންމުކޮށް ފެންބޮޑުވެއެވެ. އަދި ބޮޑެތި ގެއްލުންތައް ލިބެއެވެ. އެހެން ނަަމަވެސް އެހެން އަހަރުތަކާ ހިލާފަށް މިއަހަރު ލިބޭ ގެއްލުންތައް ބޮޑު ކަމަށް ބައިނަލްއަގްވާމީ އެހީދޭ ޖަމާއަތްތަކުން ބުނެއެވެ. އެގޮތުން އެ ތިން ގައުމުގެ ބައެއް ވިލެޖުތަކަށް އެހީދިނުމަށް ދަތިވެފައިވާ ކަމަށާއި އާާންމުން ކާބޯތަކެއްޗާއި އަދި ސާފުފެނުން ދުވަސްތަކަކަށް މަހުރޫމުވެފައިވާ ކަމަށް އޮފިޝަލުން ބުނެއެވެ.

އިންޑިއާގެ ބޮޑު ވަޒީރު ނަރެންދުރަ މޯދީ ވަނީ ހޮނިހިރު ދުވަހު ފެންބޮޑުވެފައިވާ ބިހާރު ސްޓޭޓުގެ މަތިން ދަތުރު ކުރައްވާ ލިބިފައިވާ ގެއްލުންތައް ބައްލަވާލައްވައިފަ އެވެ. އަދި އެހީގެ ގޮތުގައި އެ ސްޓޭޓަށް 78 މިލިއަން ޑޮލަރު ދެއްވާނެ ކަމަށް ވިދާޅުވެފައެވެ. ބިހާރުގެ އޮފިޝަލުން ހުކުރު ދުވަހު މީޑިއާތަކަށް ވިދާޅުވެފައި ވަނީ ފެންބޮޑުވުމުގައި ގުޅިގެން އެ ސްޓޭޓުން ވޭތުވެދިޔަ މަދުދުވަސްތަކުގައި އެކަނިވެސް، 379 މީހުން މަރުވެފައިވާ ކަމަށެވެ.

ނޭޕާލް އާއި ބޭހޭގޮތުން އދ އިން ބުނެފައި ވަނީ 150 މީހުން އެގައުުމުގައި ފެންބޮޑުވުމުގެ ސަބަބުން މަރުވެފައިވާ ކަމަށާއި އަދި 90،000 ގެ ހަލާކުވެފައިވާ ކަމަށެވެ.

ބަންގްލަދޭޝް އާއި ގުޅޭގޮތުން ލިބޭ ރިޕޯޓުތަކަށް ބަލާއިރު އެގައުމަށް ކުރަމުންދާ ވިއްސާރައިގައި މަދުވެގެން 134 މީހުން މަރުވެފައިވެއެވެ. އަދި 5.7 މިލިއަން މީހުންނަށް އަސަރުކޮށްފައިވެއެވެ.