ސީރިޔާގައި ދިން ކެމިކަލް ހަމަލާ: ސެރިން ގޭސް ނުވަތަ އެފަދަ މާއްދާއެއް ބޭނުންކޮށްފައިވޭ

މިމަހު ކުރީކޮޅު ސީރިޔާގައި ދިން ކެމިކަލް ހަމަލާގައި ބޭނުންކޮށްފައިވާ ކެމިކަލް ހަތިޔާރަކީ ސެރިން ގޭސް ނުވަތަ އެފަދަ މާއްދާއެއް ކަމަަށް "އޯގަނައިޒޭޝަން ފޯ ދަ ޕްރޮހިބިޝަން އޮފް ކެމިކަލް ވެޕަންސް" (އޯޕީސީޑަބްލިއު) އިން ބުނެފިއެވެ.

ކެމިކަލް ހަތިޔާރާއި ބެހޭ މުއާހަދާ އިމްޕްލިމެންޓް ކުރާ ޖަމާއަތުން ކުރި ޓެސްޓުތަކުން ހާމަވެފައި ވަނީ "އެއްވެސް ޝައްކެތްނެތް މިންވަރަށް"، މިމަހު ކުރީކޮޅު ދިން ކެމިކަލް ހަަމަލާގައި ސެރިން ނަަމަކަށް ކިޔާ ކެމިކަލް ހަތިޔާރެއް ނޫނީ ސެރިން ފަދަ މާއްދާއެއް ބޭނުންކޮށްފައިވާ ކަމަށެވެ. އޯޕީސީޑަބްލިއު ގެ ހެޑް އަހްމަޓް އުޒުމްކު ވިދާޅުވީ އެ ޖަަމާއަތުން ކުރި ތަހުގީގުގައި، ކެމިކަލް ހަމަލާގެ ޝިކާރައަކަށްވި 10 މީހެއްގެ ސާމްޕަލް، ހަތަރު ލެބޯޓްރީއެއްގައި ތަހުލީލު ކޮށްފައިވާ ކަމަށެވެ.

އުޒްމުކް އިތުރަށް ވިދާޅުވީ ހާން ޝެއިހޫންގެ ސަލާމަތީ ކަންކަން ތަންދޭނަމަ ކެމިކަލް ހަމަލާގެ ސަބަބުން ލިބިފައިވާ ގެއްލުން އިތުރަށް ބެލުމަށްޓަކައި ފެކްޓް-ފައިންޑިން މިޝަނެއް ފޮނުވުމަށްވެސް އެ ޖަމާއަތުން ތައްޔާރު ކަމަށެވެ.

ސީރިޔާގެ ހަނގުރާމަވެރިންގެ ބާރުގެ ދަށުގައި އޮންނަ ޓައުނެއް ކަމަށްވާ ހާން ޝެއިހޫން ގައި މިމަހު ކުރީކޮޅު ދިން ކެމިކަލް ހަމަލާގައި 87 މީހުން މަރުވެފައިވެއެވެ. އޭގެ ތެރޭގައި ގިނަ އަދަދެއްެގެ ކުޑަކުދިންވެސް ހިމެނެއެވެ.

މިހަމަލާއާ ގުޅިގެން ބައިނަލްއަގްވާމީ މުޖުތަމައު އިން އިނގިލި ދިއްކުރަނީ ރައީސް ބައްޝާރުލް އަސަދުގެ ސަރުކާރަށެވެ. ނަމަވެސް އަސަދުގެ ސަރުކާރުން ބުނަމުން ދަނީ އެފަދަ ހަމަލާއެއް ނުދޭ ކަމަށެވެ.

ކެމިކަލް ހަމަލާގެ ރައްދުގައި ސީރިޔާގެ ވައިގެ ބޭސްއަށް 59 ކްރޫސް މިސައިލް ބޭނުންކޮށްގެން އެމެރިކާއިން ހަމަލާދީފައިވާއިރު، އެމެެރިކާގެ ޑިފެންސް ސެކްރެޓަރީ ޖޭމްސް މެޓިސް ވިދާޅުވީ އެމެރިކާއިން ދިން ހަމަލާގައި ސީރިޔާގައި އޮޕަރޭޓު ކުރާ ޖެޓުތަކުގެ 20 އިން ސައްތަ ހަލާކުވި ކަމަށެވެ.