ކުޑަކުދިންގެ ހައްގުތައް ކަށަވަރު ކުރުމުގައި އިދާރާތަކުން އިހުމާލުވެފައިވާ މައްސަލަތައް ތަހުޤީގު ކުރަނީ
ކޮމިޝަނުން ވަނީ ހަތަރު ޕްރެލިމިނަރީ ރިޕޯޓް އެކުަލަވާލާފައި
ފިޔަވަތި
ޤާނޫނީ ނިޒާމުގެ ތެރެއިން ކުޑަކުދިންގެ ހައްގުތައް އެންމެ ފުރިހަމަައަށް ކަށަވަރު ކުރެވޭކަން ވަޒަން ކުރުމަށްޓަކައި ކަމާއި ގުޅޭ ޤާނޫނުތައް ރިވިއު ކުރުމުގެ މަސައްކަތާއި، ދައުލަތުގެ އިދާރާތަކުން އިހުމާލު ވެފައިވާ ކަމަށް ފާހަގަ ކުރެވޭ މައްސަލަތަކާއި ގުޅޭ ތަހުޤީގުގެ މަސައްކަތް ފަށައިފިއެވެ.
ކުޑަކުދިންނަށް ކުރާ އަނިޔާތަކުގެ މައްސަލަތައް ބަލާ ކޮމިޝަނުން ބުރާސްފަތި ދުވަހު ނެރެފައިވާ ބަޔާނެއްގައި ވަނީ ދައުލަތުގެ ބެލުމުގެ ދަށުގައި ކުޑަކުދިން ބައި ތިއްބާ މަރުކަޒުތަކުގެ ހާލަތު ވަޒަންކޮށް، އެމަރުކަޒުގައި އެކުދިންނާއި މެދު އަމަލު ކުރެވެމުންދާ ގޮތްތައް ދެނެގަތުމަށްޓަކައި ދައުލަތުގެ ބެލުމުގެ ދަށުގައި ކުޑަކުދިން ބައިތިއްބާ 5 މަރުކަޒަކަށް 2020 މާރޗް 20ން 2020 އެޕްރީލް 14ށް ޒިޔާރަތް ކޮށްފައިވާ ކަމަށެވެ.
އެގޮތުން އެ ކޮމިޝަނުން އެންމެ ފުރަތަމަ ކުޑަކުދިންގެ ހިޔާއަށް ކުރި ޒިޔާރަތުން ފާހަގަ ކުރެވުނު ކަންކަމާއި، ކުޑަކުދިންގެ ހިޔާގައި އިސްލާހު ކުރަން ޖެހޭ ކަންކަން ފާހަގަކޮށް 26 މާރޗް 2016 ގައި ޕްރެލިމިނަރީ ރިޕޯޓެއް ތައްޔާރުކޮށް ރައީސް އާ ހިއްސާ ކުރެވިފައިވާނެ ކަމަށެވެ.
މި ރިޕޯޓްގައި ފާހަގަކޮށްފއިވާ ރިކޮމެންޑޭޝަންތައް ތަންފީޒު ކުުރުމަށްޓަކައި މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސާރވިސަސް އިން ޕްލޭނެއް އެކުލަވާލައި، އެ ޕްލޭނާއި އެއްގޮތަށް މަސައްކަތް ކުރަމުންދާ ކަމަށެވެ.
އެއަށްފަހު 12 މާރޗް 20202 އާއި 8 އެޕްރީލް 2020 ދޫނިދޫ އަދި އަތޮޅު ވެހި ކަސްޓޯޑިއަލްއަށާއި، 16 މާރޗް 2020 ގައި އައްސޭރި ޖަލަށް އެ ކޮމިޝަނުން ކުރި ޒިޔާރަތްތުގައިި، އެ މަރުކަޒުގެ ސާފުތާހިރުކަމާއި ތަނުގެ ރައްކައުތެރިކަމާއި، އެތަންތަނުގައި ތިބޭ ކުދިންނަށް ލިބޭ ހިދުމަތްތަކާއި އެތަންތަނުގައި ހުރި ލައިފް/ހެލްތް ރިސްކްތަކާއި އެ މަރުކަޒުގައި ކުދިންނާއިމެދު އަަމަލުކުރެވެމުންދާ އުސޫލުތަކާއިމެދު މައުލޫމާތު އެއްކޮށް، އެ މަރުކަޒުތަކުގައި ރަނގަޅު ކުރަންޖެހޭ ކަންކަން ވަނީ ދެނެގަނެވިފައި ކަމަށެވެ.
އަދި މި ކަންކަމާއި ގުޅިގެން މިހާރުން މިހާރަށް އިސްލާހު ކުރަންޖެހޭ ކަންކަމާއި އެކަންކަން އިސްލާހު ކުރުމަށްޓަކައި ކޮމިޝަނުން ހުށަހަޅާ ހުށަހެޅުންތައް ބަޔާންކޮށް ކޮމިޝަނުން ތައްޔާރު ކޮށްފައިވާ ހަތަރު ޕްރިލިމިނަރީ ރިޕޯޓް 23 ޖޫން 2020 ގަ އާއި 23 ޖުލައި 20202 ގައި ވަނީ ރައީސުލްޖުމްހޫރިއްޔާ އާ ހިއްސާކުރެވިފައި ކަމަށް ބަޔާނުގައި ވެއެވެ.
އަދި 8 ސެޕްޓެމްބަރު 2020 ގައި ރައީސުލްޖުމްހޫރިއްޔާ އާއި ކޮމިޝަނާއި އެކު ބޭއްވުނު ބައްދަލުވުމިުގައި ކުޑަކުދިން ބަލަހައްޓާ މަރުކަޒުތަކުގައި ކުދިންނަށް ލިބެމުންދާ ޚިދުމަތްތަކާއި، އެތަންތަނުގައި ތިބޭ ކުދިންގެ ސަލާމަތާއި ރައްކައުތެރިކަމާއި، އެ މަރުކަޒުތަކުގެ ހާލަތާއި ގުޅޭގޮތުން ކޮމިޝަންގެ ކަންބޮޑުވުންތައް އެމަނިކުފަނާއި ހިއްސާކޮށްފައިވާ ކަމަށެވެ.
ހަމަ އެއާއެކު 14 ސެޕްޓެމްބަރު 2020 ގައި ފިޔަވަތި މަރުކަޒާއި، ދޫނިދޫ ކަސްޓޯޑިއަލް އާއި އައްސޭރި ޖަލާއި ގުޅޭ ޕްރެލިމިނަރީ ރިޕޯޓްތައް އެ ކޮމިޝަންގެ ފަރާތުން ކަމާއި ބެހޭ ހުރިހާ މުއައްސަސާތަކަށް ފޮނުވާފައިވާނެ ކަމަށާއި، އެ ޕްރިލިމިނަރީ ރިޕޯޓްގައި ފިޔަވަތި މަރުކަޒުގައި އިސްލާހު ކުރަންޖެހޭ ކަންކަން ބަޔާންކޮށް 15 ރިކޮމެންޑޭޝަން، ދޫނިދޫ ކަސްޓޯޑިއަލް އާއި އަތޮޅުވެހި ކަސްޓޯޑިއަލްގައި އިސްލާހު ކުރަންޖެހޭ ކަންކަން ބަޔާންކޮށް 11 ރިކޮމެންޑޭޝަން، އަދި އައްސޭރި ޖަލުގައި އިސްލާހު ކުރަންޖެހޭ ކަންކަން ބަޔާންކޮށް 13 ރިކޮމެންޑޭޝަން ކޮމިޝަނުން ހުށަހަޅާފައިވާނެ ކަމަށެވެ.
މީގެ އިތުރުން ކުޑަކުދިންނަށް ކުރާ އަނިޔާގެ މައްސަލަތަކުގައި ކަމާއި ބެހޭ މުއައްސަސާތަކުން އަމަލު ކޮށްފައިވާގޮތް ދެނެގަތުމަށްޓަކައި ޖެންޑަރ މިނިސްޓްރީ އާއި ފުލުހަށް ހުށަހެޅޭ މައްްސަލަތަކުގެ ފައިލް އޮޑިޓެއްގެ މަސައްކަތް ކޮމިޝަނުން ކުރަމުންގެންދާ ކަމަށެވެ.
ކޮވިޑް-19 ޕެންޑަމިކްގެ ހާލަތާއި ގުޅިގެން ކޮމިޝަންގެ މަސައްކަތްތައް ހަލުވި ކަމާއެކު ކުރިއަށް ގެންދިއުމަށް ހުރަސްތަކެއް ކުރިމަތުވެގެންދިޔަ ކަމުގައިވިނަމަވެސް ، ކޮމިޝަންގެ އަމާޒަކީ ވީ އެންމެ އަވަހަށް ކޮމިޝަންގެ މަސައްކަތްތައް ފުރިހަމަކޮށް، ކުޑަކުދިންގެ ހައްގުތައް ކަށަވަރު ކޮށްދިނުމަށްޓަކައި ނިޒާމީ ގޮތުން ގެންނަން ޖެހޭ ބަދަލުތަކާއި ކުޑަކުދިންނަށް ޚިދުމަތްތައް ފޯރުކޮށްދޭ މުއައްސަސާތަކުގައި ރަނގަޅު ކުރަންޖެހޭ ކަންކަން ދެނެގަނެ އެކަންކަން އިސްލާހު ކުރެވޭނެ ގޮތްތައް ހުށަހަޅައި، ކޮމިޝަންގެ ހުށަހެޅުންތައް ތަންފީޒު ކުރުމަށް ބާރުއެޅުން ކަމަށް ބަޔާނުގައިވެއެވެ.
ކޮމިޝަނުން ކުރަމުންގެންދާ މަސައްކަތުގައި ހުރިހާ މުއައްސަސާއަކުން ކޮމިޝަނަށް ދެމުންގެންދާ އެއްބާރުލުން ފާހަގަކޮށް ވަނީ ޝުކުރު އަދާކޮށްފައެވެ.
