ސާކް ސަމިޓާ ގުޅިގެން ފުވައްމުލަކުގައި ސެކިއުރިޓީ ބަލަހައްޓަން ބަޔަކާ ހަވާލުކުރުމުގައި ކޮރަޕްޝަނެއްނެތް: އޭސީސީ

ކުރީގެ ރައީސް މުހައްމަދު ނަޝީދުގެ ސަރުކާރުން ފުވައްމުލަކު ގައުމީ އިދާރާ މެދުވެރިވެގެން، ސާކް ސަމިޓާއި ގުޅިގެން ތައްޔާރު ކުރެވުނު ތަންތަނުގެ ތެރޭގައި ހިމެނޭ ތުނޑީ ސަރަހައްދުގައި ހަދާފައިވާ ތަންތަނާއި ބަންޑާރަ ކިޅީގައި ތައްޔާރު ކުރެވުނު ތަންތަނުގެ ސެކިއުރިޓީ ބެލެހެއްޓުމުގެ މަސައްކަތް ކުރުމަށް ހަވާލުކުރުމުގައި ކޮރަޕްޝަންގެ އަމަލެއް ހިންގާފައި ނުވާކަމަށް އެންޓި ކޮރަޕްޝަން ކޮމިޝަން (އޭސީސީ)އިން ބުނެފި އެވެ.

އޭސީސީން ހޯމަ ދުވަހު އާއްމުކޮށްފައިވާ ރިޕޯޓެއްގައި ބުނެފައިވަނީ ސާކް ސަމިޓާއި ގުޅިގެން ފުވައްމުލަކުގައި ތައްޔާރު ކުރެވުނު ތަންތަނުގެ ތެރޭގައި ހިމެނޭ ތުނޑީ ސަރަހައްދުގައި ހަދާފައިވާ ތަންތަނާއި ބަންޑާރަ ކިޅީގައި ތައްޔާރު ކުރެވުނު ތަންތަނުގެ ސެކިއުރިޓީ ބެލެހެއްޓުމުގެ މަސައްކަތް ކުރުމަށް ހަވާލުކޮށްފައިވަނީ އެކަން ކޮށްދޭނެ ފަރާތެއް ހޯދުމަށް އިއުލާން ނުކޮށް ކަމަށް، ފުވައްމުލަކު ގައުމީ އިދާރާގެ އޮޑިޓް ރިޕޯޓްގައި ފާހަގަކޮށްފައިވާ މައްސަލަ އޭސީސީން ތަހުގީގު ކުރިއިރު އެމައްސަލާގައި ކޮރަޕްޝަންގެ އަމަލެއް ހިންގާފައިވާ ކަމަށް ފާހަގަކުރެވިފައި ނުވާ ކަމަށެވެ.

އޭސީސީން ބުނީ އެމައްސަލައިގެ ތަހުގީގަށް ލިބިފައިވާ، ލިޔުންތަކުން ފުވައްމުލަކު ތުނޑި (ކަލްޗަރަލްވިލެޖް) އާއި ބަންޑާރަކިޅީގެ ސެކިއުރިޓީ ބެލެހެއްޓުމުގެ މަސައްކަތް ކޮށްދޭނެ ފަރާތެއް ހޯދާފައިވަނީ އިއުލާންނުކޮށް ކަމަށް މިމައްސަލައިގެ ޝަކުވާގައި ބުނެފައިވާއިރު، ސާކްސަމިޓާ ގުޅިގެން ފުވައްމުލަކު ގައުމީ އިދާރާއިން ތައްޔާރުކޮށްފައިވާ ތަންތަނުގެ ސެކިއުރިޓީ ބެލެހެއްޓުމުގެ މަސައްކަތަކީ 25،000ރ އަށްވުރެ ދަށުގެ މަސައްކަތަކަށް ވުމުންނާއި، މަސައްކަތް ކުރާނެ ފަރާތެއް ހޯދާފައިވަނީ ދައުލަތުގެ މާލިއްޔަތުގެ ގަވާއިދުގެ 8.14 ވަނަ މާއްދާއާ އެއްގޮތަށް ތިން ފަރާތަކުން ކޯޓޭޝަން ހޯދައިގެން ކަމަށްވާތީއާއި، ސެކިއުރިޓީ ބެލެހެއްޓުމުގެ މަސައްކަތް ހަވާލުކޮށްފައިވަނީ ވަކިފަރާތަކަށް ނާޖާއިޒު ފައިދާއެއް ލިބޭގޮތަކައްކަން ތަހުގީގަށް ފާހަގަކުރެވިފައިނުވާ ކަމަށެވެ.

އެހެންކަމުން މި މައްސަލައިގައި، ކޮރަޕްޝަން ހުއްޓުވުމާއި މަނާކުރުމުގެ ޤާނޫނުގައި ބުނާފަދަ ކޮރަޕްޝަންގެ ޢަމަލެއް ހިންގާފައިވާކަމަށް އޭސީސީގެ ތަހުގީގަށް ބެލެވެން ނެތުމުން، އެންޓި ކޮރަޕްޝަން ކޮމިޝަނުގެ ޤާނޫނުގެ 25 ވަނަ މާއްދާގެ (ހ) ގެ (1) ވަނަ ނަންބަރުގައިވާ ފަދައިން މިމައްސަލައަކީ ކޮރަޕްޝަނުގެ ކުށެއް އެކުލެވިގެންނުވާ މައްސަލައެއްކަމަށް ކަނޑައަޅާ ކަމަށް އޭސީސީގެ އެރިޕޯޓުގައި ވެއެވެ.