ބްރެޒިލް އިން ކޮވިޑް- 19 ޖެހުނު މީހުންގެ އަދަދު ފަސް މިލިއަނަށް ވުރެ މައްޗަށް އަރައިފި
8 އޮކްޓޯބަރު 2020 | ބުރާސްފަތި 11:48އަންގާރަ ދުވަހު އެކަނިވެސް އެގައުމުން31،553 މީހުންނަށް މިބަލި ޖެހިފައިވޭ
މި ބަލި އެންމެ ހަލުވިކަމާއެކު ފެތުރެމުންދާ ގައުމަކީ ބްރެޒިލް
ބްރެޒިލް އިން ކޮވިޑް- 19 ޖެހުނު މީހުންގެ އަދަދު ފަސް މިލިއަނަށް ވުރެ މައްޗަށް އަރައިފިއެވެ.
އެގައުމުގެ އޮފިޝަލުން ބުނެފައިވަނީ މިހާރު އެގައުމުގައި ކޮވިޑް ޖެހުނު މީހުންގެ ޖުމްލަ އަދަދު ފަސް މިލިއަނަށްވުރެ މައްޗަށް އަރާފައިވާ ކަމަށެވެ. ބްރެޒިލްގެ ހެލްތް މިނިސްޓްރީއިން ބުނެފައިވަނީ އަންގާރަ ދުވަހު އެކަނިވެސް އެގައުމުން 31،553 މީހުންނަށް މިބަލި ޖެހިފައިވާ ކަމަށެވެ. އެއާ އެކު އެގައުމުގައި ކޮވިޑް ޖެހިފައިވާ މީހުންގެ އަދަދު ވަނީ 5,000,694 އަށް އަރާފައެވެ.
އެމެރިކާ އަދި އިންޑިއާ އަށްފަހު ކޮވިޑްގެ ނުރައްކާ އެންމެ ބޮޑު އަދި މި ބަލި އެންމެ ހަލުވިކަމާއެކު ފެތުރެމުންދާ ގައުމަކީ ބްރެޒިލްއެވެ. މީގެ އިތުރުންވެސް އެގައުމުގެ ރައީސް ބޮލްސޮނާރޯ އަށް ވަނީ ގިނަ ބެއެއްގެ ފާޑުކިޔުން ތަކެއް އަމާޒުވެފައެވެ. އެއީ ސިއްހީ މާހިރުން ދެމުން ގެންދާ އިރުޝާދު ތަކަށް މާބޮޑު ސަމާލުކަމެއް ނުދެއްވާތީ ކަމަށް ބޭރުގެ މީޑިއާތަކުން ރިޕޯޓް ކުރެއެވެ.
ފާއިތުވި އޮގަސްޓް މަހު އެ ގައުމުގެ ނައިބު ރައީސް ވަނީ މި ކަމަށް ރައްދު ދެއްވާފައެވެ. އަދި ރައްޔިތުން އިޖްތިމާއީ ގައިދުރުކަން ނުބަހައްޓާ ކަމަށާއި ވައިރަސް އިން ރައްކާތެރިވުމަށް އަޅާފައިވާ ފިޔަވަޅުތަކަށް ބޯނުލަނބާ ކަމަށް ވަނީ ވިދާޅުވެފައެވެ.
