ރައީސް ޔާމީންގެ އެކައުންޓްތައް ފްރީޒްކުރި މައްސަލާގައި ސުޕްރީމް ކޯޓުން މިއަދު ގޮތެއް ނިންމަނީ!
8 އޮކްޓޯބަރު 2020 | ބުރާސްފަތި 05:36އެންމެފަހުން ބޭއްވި އަޑުއެހުމުގައި ވަނީ، ދެފަރާތުން ހުލާސާ ބަޔާން އިއްވައި އަޑުއެހުންތައް ވަނީ ނިންމާލާފައި
ކުރީގެ ރައީސް ޔާމީންގެ ބޭންކް އެކައުންޓްތައް ފްރީޒްކުރި މައްސަލާގައި ސުޕްރީމް ކޯޓުން އެންމެފަހުން ބޭއްވި އަޑުއެހުމުގެ ތެރެއިން މަންޒަރެއް
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ބޭންކް އެކައުންޓުތައް ފްރީޒް ކޮށްފައިވާތީ، ސުޕްރީމް ކޯޓުގައި އިސްތިއުނާފްކޮށްފައިވާ މައްސަލައިގެ ޝަރީއަތުގެ އަޑުއެހުމެއް ބުރާސްފަތި ދުވަހަށް ތާވަލްކޮށްފިއެވެ.
ރައީސް ޔާމީންގެ އެކައުންޓްތައް ފްރީޒް ކުރުމުގެ އަމުރާ ގުޅިގެން ސުޕްރީމް ކޯޓަށް ހުށަހަޅާފައިވާ އިސްތިއުނާފް މައްސަލައިގެ ޝަރީއަތުގެ އަޑުއެހުން ސުޕްރީމް ކޯޓުގައި ތާވަލުކޮށްފައި ވަނީ ބުރާސްފަތި ދުވަހުގެ 13:00 އަށެވެ.
މިދިޔަ ސެޕްޓެމްބަރު މަހުގެ 21 ވަނަ ދުވަހު، މި މައްސަލާގައި ބޭއްވި އެންމެފަހު އަޑުއެހުމުގައި ދައުލަތުގެ ފަރާތުންނާއި ރައީސް ޔާމީންގެ ފަރާތުން ހުލާސާ ބަޔާން އިއްވުމަށްފަހު އަޑުއެހުންތައް ވަނީ ނިންމާލާފައެވެ. އެހެންކަމުން، މި މައްސަލާގައި ފަނޑިޔާރުން އިތުރުކަމެއް ސާފުކުރަން ނެތްނަމަ، ބުރާސްފަތި ދުވަހުގެ ޝަރީއަތުގެ އަޑުއެހުމަކީ ހުކުމް ކުރުމަށް ބޭއްވޭ ޝަރީތުގެ މަޖިލީހެވެ.
އެންމެފަހުން ބޭއްވި އަޑުއެހުމުގައި، ދައުލަތުން ދައްކާ ވާހަކަތަކުގައި ދެކޮޅު ޖައްސަން ތަންކޮޅެއް އުނދަގޫ ވާކަމަށް މި މައްސަލަ ބައްލަވާ ސުޕްރީމް ކޯޓުގެ ފަނޑިޔާރުންގެ ބެންޗުގެ އިސްފަނޑިޔާރު ހުސްނުއް ސުއޫދު ވިދާޅުވިއެވެ. އަދި ފަނޑިޔާރުންގެ ބެންޗުން ވަނީ ދައުލަތުގެ ވަކީލުންނަށް މި މައްސަލާގައި ގިނަ ސުވާލުތަކެއް އަމާޒުކުރައްވާފައެވެ.
އެގޮތުން ފަނޑިޔާރު ސުއޫދު ވިދާޅުވީ، ރައީސް ޔާމީންގެ 8 އެކައުންޓުގައި ހުރީ ޝައްކު ކުރެވޭ އަދި ތުހުމަތު ކުރެވޭ ފައިސާއޭ، ދައުލަތުން ވިދާޅުވާއިރު، އެ 8 އެކައުންޓް ފްރީޒް ކުރުމުގެ އަމުރު ހައިކޯޓުން ބާތިލްކުރުމުން، އޭގެ ފަހުން އަމުރަކަށް އެދިވަޑައިގެންނެވީ، އެތަނުން އެންމެ އެކައުންޓެއް ފްރީޒްކުރަން ކަމަށެވެ. އަދި ދެންހުރި އެކައުންޓައްތައް ފްރީޒް ކުރަން އެދިވަޑައިނުގެންނެވި ނަމަވެސް، އެ 8 އެކައުންޓްގައި ހުރި ފައިސާއަކީ ތުހުމަތުގެ ފައިސާ ކަމަށް ސުޕްރީމް ޝަރީއަތުގެ މަޖިލީހުގައި ދައުލަތުން ވިދާޅުވާ ކަމަށެވެ.
ފަނޑިޔާރުގެ ސުވާލަށް ޖަވާބުދެއްވަމުން ދައުލަތުގެ ވަކީލު ވިދާޅުވީ، ދެންހުރި އެކައުންޓްތައް ފްރީޒްކުރަން ބޭނުންވިނަމަވެސް، މޮނީޓަރިންގ އަމުރެއްނެތި އެކައުންޓް ފްރީޒް ނުކުރެވޭނެ ކަމަށް ހައިކޯޓުން ނިންމާފައިވާ ކަމަށެވެ. އަދި އިސްލާމިކް ބޭންކް އެކައުންޓުގައި ހުރި ފައިސާ ފްރީޒް ކުރަން ކްރިމިނަލް ކޯޓުން އަމުރެއް ނެރުނީ، އެ އެކައުންޓުގައި ހުރި ފައިސާގެ މައްސަލައެއް މައުލޫއީ ގޮތެއްގައި ކުރިއަށް ގެންގޮސް އެ ކޯޓުން ސާބިތުވާކަމަށް ނިންމާފައިވާ މައްސަލައަކަށްވާތީ އެކަމުގެ މައްޗަށް ރިއާޔަތްކޮށް ކަމަށެވެ.
އޭގެއިތުރުން، ރައީސް ޔާމީންގެ އެކައުންޓްތައް ފްރީޒް ކުރުމަށް ކްރިމިނަލް ކޯޓުން ނެރުނު އަމުރު ހައިކޯޓުން ބާތިލް ކުރުމުން، 8 އެކައުންޓް ފްރީޒް ކުރަން އެދެނީ ރައީސްގެ މަގާމުގައި ހުންނެވި ދުވަސްވަރު މުސާރައާ ނުބައްދަލު ގިނަ އަދަދެއްގެ ފައިސާ ރައީސް ޔާމީންގެ އެކައުންޓައް ވަދެފައިވާތީ ކަމަށް ދައުލަތުގެ ވަކީލު ވިދާޅުވިއެވެ. އަދި މިހާރުވެސް ބައެއް މައްސަލަތުގެ ތަހުގީގު ކުރިއަށްދާތީ، ހައިކޯޓުގެ ނިންމުން ބަދަލުކޮށް ދިނުމަށް ސުޕްރީމް ކޯޓުގައި އިލްތިމާސް ކުރެއްވީ ކަމަށް ވިދާޅުވިއެވެ.
ދައުލަތުގެ ވަކީލު އިތުރަށް ވިދާޅުވީ، ރައީސް ޔާމީންގެ އެކައުންޓްތަކަށް ވަދެފައިވާ ފައިސާއަކީ، ކުށްކޮށްގެން ހޯދާފައިވާ ފައިސާކަމަށް ތުހުމަތު ކުރެވޭތީ، ރައީސް ޔާމީންގެ އެކައުންޓްތައް ފްރީޒް ނުކޮށްފިނަމަ، އެ ފައިސާ ދައުލަތަށް އަނބުރާ ހޯދުމަށް ދަތިތަކެއް ކުރިމަތިވެ، ގެއްލުމަކީ ގަބޫލު ކުރެވޭ ކަމެއް ކަމަށެވެ.
ސުޕްރީމް ކޯޓަށް ހުށަހެޅިފައިވާ މައްސަލައިގެ ތެރެއިން އެ ކޯޓުން ވަނީ މި މައްސަލައަށް ވަކިގޮތެއް ޝަރީއަތުން ކަނޑައެޅެންދެން ރައީސް ޔާމީންގެ ބޭންކް އެކައުންޓްތައް ފްރީޒް ކުރުމަށް ވަގުތީ އަމުރެއް ނެރެފައެވެ.
ކްރިމިނަލް ކޯޓުގެ އަމުރެއްގެ ދަށުން ރައީސް ޔާމީންގެ އެކައުންޓުތައް ފްރީޒް ކޮށްފައިވަނީ 2018 ވަނަ އަހަރުގެ ޑިސެމްބަރު 13 ގައެވެ. ކްރިމިނަލް ކޯޓުގެ އަމުރު ހައިކޯޓުން ބާތިލް ކޮށްފައިވަނީ 31 މާރޗު 2019 ގައެވެ. އެއާއެކު، އެ އަހަރުގެ މެއި މަހުގެ 13 ވަނަ ދުވަހު މި މައްސަލަ ސުޕްރީމް ކޯޓުގައި އިސްތިއުނާފު ކުރަމުން ދައުލަތުން ބުނެފައި ވަނީ، ހައިކޯޓުން ކުރި ހުކުމް ބާތިލް ކުރުމަށް އެދިލައްވާ ކަމަށާއި ރައީސް ޔާމީންގެ އެކައުންޓުގައި ހުރި ފައިސާ ދޫވެއްޖެނަމަ ދައުލަތުން ލިބޭ ފައިސާ ގެއްލިދާނެ ކަމަށް ބެލެވޭ ކަމަށެވެ.
އެގޮތުން ފައިސަލާ ކުރެވޭ ހުކުމެއް ނެރެވެންދެން އެމަނިކުފާނުގެ ނަންފުޅުގައި ބޭންކް އޮފް މޯލްޑިވްސް (ބީއެމްއެލް) އާއި މޯލްޑިވްސް އިސްލާމިކް ބޭންކް (އެމްއައިބީ) އަދި މޮރިޝަސް ކޮމާރޝަލް ބޭންކް (އެމްސީބީ) ގައި ހުޅުވާފައިވާ 8 އެކައުންޓުން މުއާމަލާތް ކުރެވޭ ގޮތް ހުއްޓުވުމަށް އެދިލައްވާ ކަމަށް ދައުލަތުން ފާހަގަ ކޮށްފައިވެއެވެ.
މި މައްސަލައިގައި ރައީސް ޔާމީންގެ ދިފާއީ ވަކީލުން ވިދާޅުވެފައިވަނީ އެންޓި ކޮރަޕްޝަން ކޮމިޝަން (އޭސީސީ) ގެ ބެލުމުގެ ދަށުގައި ހުރި ފައިސާއަކީ ގެއްލިގެން ދާނެ ފައިސާއެއް ކަމަށް ނުބެލެވޭ ކަމަށާއި އެހެން ކަމުން ހައިކޯޓުގެ އަމުރަށް ތާއީދު ކޮށްދިނުމަށް އެދިވަޑައިގަންނަވާ ކަމަށެވެ.
ރައީސް ޔާމީންގެ އެކައުންޓުތައް ފްރީޒް ކުރަން ކޯޓުން އަމުރު ކުރީ ރައީސުލްޖުމްހޫރިއްޔާ ކަމުގައި ހުންނަވައިގެން ގާނޫނާ ހިލާފަށް މާލީ މުއާމަލާތްތަކެއް ހިންގާފައިވާ ކަމަށް ތުހުމަތު ކުރެވޭ މައްސަލައިގައެވެ. އެގޮތުން ޔާމީންގެ އެކައުންޓުތައް ފްރީޒް ކޮށްފައިވާކަން ފުލުހުން ހާމަކޮށްފައި ވަނީ 2018 ވަނަ އަހަރުގެ ޑިސެމްބަރު 14 ވަނަ ދުވަހުއެވެ. އޭރު އެމަނިކުފާނުގެ އެކައުންޓްތަކުގައި 100 މިލިއަނަށް ވުރެ ގިނަ ރުފިޔާ ހުރި ކަމަށް ފުލުހުން ވަނީ ބުނެފައެވެ.
