މިހާރު މަހާ ޖައްރާފުގެ ހުރިހާ ފަޅުވެރިންނަކީ ދިވެހިން
17 ފަޅުވެރިން ތިބޭނެ
މަހާ ޖައްރާފްގެ ފަޅުވެރިންނަށް ދިވެހިން ހަމަޖެއްސުމުގެ ގޮތުން ބޭއްވި ރަސްމިއްޔާތެއްގެ ތެރެއިން
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން (އެމްޓީސީސި) ގެ ޑްރެޖާ މަހާ ޖައްރާފުގެ ހުރިހާ ފަޅުވެރިން 07 އޮކްޓޯބަރ 2020 ވަނަ ދުވަހު ދިވެހިންނަށް ބަދަލުކޮށްފިއެވެ.
2017 ވަނަ އަހަރު އެމްޓީސީސީއިން ރާއްޖެ ގެނައި މަހާ ޖައްރާފަކީ މި ސަރަހައްދުގައިވެސް އޮތް އެންމެ ބޮޑު އެއް ޑްރެޖަރެވެ. އެމްޓީސީސީން ބުނި ގޮތުގައި ބިދޭސީ ފަޅުވެރިންނާއިއެކު މަސައްކަތް ފެށި މަހާޖައްރާފުގައި ބުދަ ދުވަހުން ފެށިގެން މަސައްކަތް ކުރާނީ 17 ދިވެހިންނެވެ. އެއީ ބޯޓުގެ ކެޕްޓަން، ދެ ޗީފް އޮފިސަރުން، ޗީފް އިންޖިނިއަރު، ސެކަންޑް އިންޖިނިއަރު، 4 ޕައިޕް އޮޕަރޭޓަރުންނާއި އިލެކްޓްރޯ ޓެކްނިކަލް އޮފިސަރުގެ އިތުރުން ކްރޫއިންނާއި ކައްކާއިންނެވެ.
އެމްޓީސީސީން ބުނީ، މަހާ ޖައްރާފުގެ ފަޅުވެރިން ދިވެހިންނަށް ބަދަލުކުރުމުގެ ގޮތުން 2018 ވަނަ އަހަރުން ފެށިގެން ބޯޓުގައި ތިބި ބިދޭސީ ފަޅުވެރިންގެ އިލްމާއި ތަޖުރިބާގެ އެންމެ ފުރިހަމަ ބޭނުން ހިފާ އެ މީހުންގެ ގާތުން ދިވެހި ފަޅުވެރިންނަށް ބޭނުންވާ ތަމްރީން ދީފައިވާނެ ކަމަށެވެ. މަހާ ޖައްރާފްގައި މި ވަގުތު މަސައްކަތް ކުރާ ދިވެހި މުވައްޒަފުންނަކީ މަސައްކަތަށް ގާބިލް މުވައްޒަފުންކަމުގެ ޔަގީީންކަންދޭ އެމްޓީސީސީން ދެއެެވެ.
އެ ކުންފުނިން ބުނީ، މަހާ ޖައްރާފުގައި ދިވެހި ފަޅުވެރިން ބައިތިއްބަން ނިންމި ނިންމުމުގެ ސަބަބުން ބިދޭސީ ފަޅުވެރިންގެ މުސާރައިގެ ގޮތުގައި ދިވެހި ރާއްޖޭއިން ބޭރުވާ ފައިސާ ރާއްޖޭގައި ހިފެހެއްޓި، ދިވެހިންނަށް އިތުރު ވަޒީފާގެ ފުރުސަތުތަކެއް ފަހިވެ އެކަމުގެ ހެޔޮ އަސަރު ރާއްޖޭގެ އިގްތިސާދަށް ކުރާނެ ކަމަށެވެ.
ދިގުމިނުގައި 92.95 މީޓަރު އަދި ފުޅާ މިނުގައި 16.25 މީޓަރު ހުންނަ އައިއެޗްސީގެ އީޒީ ޑްރެޖް ސީރީޒްގެ ހޮޕާ ސަކްޝަން ޑްރެޖާ، މަހާ ޖައްރާފަކީ 50 މީޓަރު އަޑިން ވެލި ނެގުމުގެ ގާބިލްކަން ލިބިފައިވާ އުޅަނދެކެވެ. މިއުޅަނދަށް އެއްފަހަރާ 3,700 ކިއުބިކް މީޓަރުގެ ވެލި ބަރުކުރެވެއެވެ. މަހާ ޖައްރާފް ޑިޒައިން ކޮށްފައިވަނީ ބާރު ދުވުލީގައިވެސް ތެލުގެ ހަރަދު ކުޑަވާނެފަދަ ޓެކޮނޮލޮޖީއާ އެކުގައެވެ. އެ އުޅަނދަކީ ތިމާވެއްޓަށް ގެއްލުން ނުލިބޭ ފަދަ ގޮތަކަށް ބިން ހިއްކުމުގެ ގާބިލްކަން ލިބިފައިވާ އުޅަނދެކެވެ.
