މަހާނަ ހަދައިގެން ހައްޔަރުކުރި މީހުންގެ ބަންދުގެ އަމުރު އިސްތިއުނާފަށް ހުށައަޅައިފި
މަހާނަ ހެދީ ސިހުރު ފަންޑިތަ ހެދުމަށް ނޫން
އުކުޅަހުގެ މަގުމަތީގައި ހެދި މަހާނަ ކައިރީގައި ބަޔަކު: މި މައްސަލައިގައި މީހުން ހައްޔަރުކުރިއިރު، އެ މީހުންގެ މައްޗަށް ތުހްމަތުކޮށްފައިވަނީ ސިހުރި ހެދި ކަމަށް
ސިހުރު ހަދައި ރައްޔިތުންގެ ހިތްތަކުގައި ބިރުވެރިކަން އުފެއްދުމުގެ ތުހުމަތުގައި އުކުޅަހުން ހައްޔަރުކުރި ހަ މީހުން ގެ ބަންދުގެ މުއްދަތު އިތުރު ކުރުމަށް ކްރިމިނަލް ކޯޓުން ކުރި އަމުރު ހައި ކޯޓަށް އިސްތިއުނާފަށް ހުށައަޅައިފިއެވެ.
އެ ހަ މީހުންގެ ގާނޫނީ ވަކީލް ނާޒިމް އަބްދުއް ސައްތާރު ވިދާޅުވީ އުކުޅަހުން ހައްޔަރުކުރި މީހުންނަން ކްރިމިނަލް ކޯޓުން ޖަހައިފައިވާ 15 ދުވަހުގެ ބަންދުގެ މުއްދަތު އިސްތިއުނާފް ކުރަން ހައި ކޯޓަށް ބުދދުވަހު ހުށަހަޅާފައިވާ ކަމަށެވެ. ބަންދުކުރުމަށް ކުރި އަމުރު އިސްތިއުނާފް ކުރީ އެމީހުންނަން ލިބެމުން ދަނީ ގާނޫނާ ހިލާފް ބޮޑު އަދަބަކަށް ވާތީ ކަމަށް ނާޒިމް ވިދާޅުވިއެވެ.
އެހެން ނަމަވެސް ހައި ކޯޓުން މި މައްސަލަ ބަލައިގަތްކަން އަންގާފައި ނުވާ ކަމަށް ވެސް އޭނާ ވިދާޅުވިއެވެ.
ފުލުހުންގެ ހާއްސަ ޓީމެއް އުކުޅަހަށް ގޮސް ހައްޔަރުކޮށްފައި ވަނީ އެރަށު ފުސްވިލާގޭ، އިބްރާހިމް ސުޒެއިނާއި، ރަތްވިލާގޭ އަބްދުﷲ ވާހިދު އަލީ، ވިންޓަރ ވިލާ، ސައުދުﷲ އިބްރާހިމް، ފެންފިޔާޒުގެ، ފިކުރީ ހަނިފްގެ އިތުރުން ފިނިފެން ބަގީޗާ، އަބްދުﷲ ސައީދެއެވެ.
ނާޒިމް ވިދާޅުވީ ބުދަ ދުވަހު ފުލުހުންގެ ތަޙްގީގަށް އެމީހުން ބަޔާން ދީފި ކަމަށެވެ. އެހެން ނަމަވެސް އެކަމާ ގުޅިގެން ފުލުހުންގެ ބަހެއް ނުލިބެ އެވެ.
އއ. އަތޮޅު ކައުންސިލްގެ ނައިބް ރައީސް މޫސާ ނައީމްގެ އިތުރުން ފަސް މީހަކު ހައްޔަރުކުރީ އެމްޑީޕީގެ އެކްޓިވިސްޓް މެމްބަރު ޝިނާޒު މޫސާ ޕީޕީއެމަށް ސޮއިކުރުމުން، އެ ގޭގެ ދޮރުމަތީގައި މަހާނައެއް ހަދައިގެންނެވެ.
އުކުޅަހު ކައުންސިލް މެމްބަރު އަލީ ޒަމީރު ވިދާޅުވީ ކުރިއަށް އޮތް ލޯކަލް ކައުންސިލް އިންތިހާބުގައި އެރަށުގެ މެޖޯރިޓީ، ވެރިކަންކުރާ ޕީޕީއެމުން ހޯދުމަށްޓަކައި ރައްޔިތުންނަން ބިރުދައްކަމުން އަންނަ ކަމަށެވެ. އެރަށު އެމްޑީޕީގެ ހަ މެމްބަރުން ފުލުހުން ހައްޔަރުކުރީ ސީދާ ލޯކަލް ކައުންސިލް އިންތިހާބުގެ މެޖޯރިޓީ ހޯދުމަށްޓަކައި އިތުރު ގޮތެއް ނެތުމުން ކަމަށް ވެސް ޒަމީރު ވިދާޅުވިއެވެ.
