އީސީގެ ނައިބް ރައީސް އަކްރަމް ކޮވިޑަށް ޕޮޒިޓިވްވެއްޖެ
އެންމެ ފަހުން އޮފީހަށް ވަޑައިގެންނެވީ ހޯމަ ދުވަހު
އީސީގެ ނައިބް ރައީސް އަހުމަދު އަކްރަމް ބައްދަލުވުމެއްގައި
އިލެކްޝަން ކޮމިޝަންގެ ނައިބް ރައީސް އަހުމަދު އަކްރަމް ކޮވިޑް-19 އަށް ޕޮޒިޓިވް ވެއްޖެއެވެ.
އަކްރަމްގެ އިތުރުން އޭނާގެ އަނބިކަނބަލުން ވެސް ވަނީ ކޮވިޑަށް ޕޮޒިޓިވް ވެފައެވެ. އޭނާ ކޮވިޑް-19 އަށް ޕޮޒިޓިވްވިކަން އެނގުނީ އާއިލާ މެމްބަރަކު ޕޮޒިޓިވްވެގެން އަންގާރަ ދުވަހު ނެގި ސާމްޕަލްގެ ނަތީޖާ އިންނެވެ.
''ރާއްޖެ.އެމްވީ'' އާ ވާހަކަ ދައްކަވަމުން އަކްރަމް ވިދާޅުވީ، އޭނާގެ ހާލު ރަނގަޅު ކަމަށެވެ. އީސީގެ ނައިބް ރައީސް ކޮވިޑަށް ޕޮޒިޓިވްވެފައިވާއިރު ހޯމަ ދުވަހު އިލެކްޝަން ކޮމިޝަންގެ އޮފީހުގައި އޮތް ބައްދަލުވުމެއްގައި އޭނާ ވަނީ ބައިވެރިވެ ވަޑައިގެންފައެވެ. އެކަމަކު މި ފަހަކަށް އައިސް ބައްދަލުވުންތައް ކުރިޔަށް ގެންދަނީ އެޗްޕީއޭގެ ގައިޑްލައިންތަކާއި އެއްގޮތަށެވެ.
ރާއްޖެއިން މިހާތަނަށް ކޮވިޑް-19 އަށް 10,621 މީހަކު ވަނީ ޕޮޒިޓިވްވެފައެވެ. ބަލި ޖެހުނު މީހުންގެ ތެރެއިން 9466 މީހަކު ވަނީ ބަލިން ފަސޭހަވެފައެވެ. މިވަގުތު ފަރުވާދެމުންދަނީ 1114 މީހުންނަށެެވެ.
