ބުދަ ދުވަހުގެ ޖަލްސާގައި ފިނޭންސް މިނިސްޓަރާއި ސުވާލުކުރަނީ
6 އޮކްޓޯބަރު 2020 | އަންގާރަ 21:06ސުވާލުކުރުމަށް ހުށައަޅުއްވާފައިވަނީ ކާށިދޫ ދާއިރާގެ މެމްބަރު އަބްދުﷲ ޖާބިރު
ފިނޭންސް މިނިސްޓަރ އިބްރާހިމް އަމީރު، ރައްޔިތުންގެ މަޖިލީހުގެ ޖަލްސާއެއްގައި
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ފިނޭންސް މިނިސްޓަރ އިބްރާހިމް އަމީރުއާ ސުވާލުކުރުމަށް އެޖެންޑާކޮށްފިއެވެ.
މިނިސްޓަރާއި ސުވާލުކުރުމަށް ހުށައަޅުއްވާފައިވަނީ ކާށިދޫ ދާއިރާގެ މެމްބަރު އަބްދުﷲ ޖާބިރުއެވެ. މެމްބަރު މިނިސްޓަރާއި ކުރައްވާ ސުވާލަކީ މި ސަރުކާރުން މަސްވެރިންނަށްވެފައިވާ ވައުދުތައް ނުފުއްދައި ދައުލަތުގެ ދަރަނިތައް ބޮޑުކޮށް، ދައުލަތުން އެލަވަންސް ދިނުން ހައްޤުވާ ދިވެހި މަސްވެރިންނާއި ދަނޑުވެރި ޢާއިލާތަކަށް އެލަވަންސް ނުދެއްވަނީ ކީއްވެތޯއެވެ. އަދި އެ ފަރާތްތަކަށް އެލަވަންސް ދެއްވާނީ ކޮންއިރަކުތޯއެވެ.
އޭގެ އިތުރުން، ކޮވިޑް-19 ގެ ސަބަބުން ދިވެހިރާއްޖޭގެ އިޤްތިޞާދަށް އައި ކުއްލި ލޮޅުމުގައި މަސްވެރި ޢާއިލާތަކަށް ފޫނުބެއްދޭވަރުގެ ބޮޑެތި ގެއްލުންތައް ލިބި، މަސްވެރި ޢާއިލާތައް ބިކަވެފައިވާއިރު، ދިވެހި ސަރުކާރާއި ޗައިނާއާ ދެމެދު ހަދާފައިވާ ފްރީ ޓްރޭޑް އެގްރިމެންޓްގެ ދަށުން ދިވެހި މަސްވެރިންނަށް ލިބެންޖެހޭ މަންފާތައް ހިފަހައްޓައި އަދި މި ސަރުކާރުން މަސްވެރިންނަށްވެފައިވާ ވައުދުތައް ނުފުއްދާ ކަމަށް ވިދާޅުވެފައެވެ.
މަޖިލިހުގެ ބުދަ ދުވަހުގެ ޖަލްސާގައި އެޖެންޑާކޮށްފައިވާ އިތުރު ކަންކަމަށް ބަލާއިރު، ހަތަރު ބިލެއްގެ މަސައްކަތް ހިމެނެއެވެ. އޭގެ ތެރޭގައި ހިމެނޭ ޕޭމަންޓް ސިސްޓަމާއި ޕޭމަންޓް ޚިދުމަތްތަކުގެ ބިލަކީ އަލަށް މަޖިލިހަށް ހުށައެޅޭ ބިލެކެވެ.
