ފިނޭންސް މިނިސްޓްރީގެ ސާޅިސް މުވައްޒަފުންނަށް ވަޒީފާ އުވިފައިވާ ކަމަށް ބުނެ ލިޔުން ދީފި އެވެ.
ރާއްޖެ އެމްވީ އަށް މައުލޫމާތު ލިބިފައިވާ ގޮތުގާ އެ މިނިސްޓްރީގެ 15 ވަރަކަށް މުވައްޒަފުުންނަށް ވަޒީފާ އުވިފައިވާ ކަމުގެ ލިޔުން ދީފައިވާ އިރު މި މުވައްޒަފުންނަށް އިތުރު އެއްވެސް ގޮތެއް އެ މިނިސްޓްރީން ހަދާ ދީފައެއް ނުވެ އެވެ. މި ފަަނަރަ މުވައްޒަފުންފެ ތެރޭގައި މިވަގުތު ނޯ ޕޭ ލީވްގައި ތިބި މުވައްޒަފުންނާ، މެޓަރނިޓީ ލީވްގައި ތިބި މުވައްޒަފުން ހިމެނެ އެވެ. އަދި އިތުރު 25 މުވައްޒަފަކަށް ވަޒީފާ އުވިފައިވާ ކަން އަންގާފައިވާ އިރު އެ މުވައްޒަފުންނަށް ސަރުކާރުގެ އެހެން ވުޒާރާތަކުން ބޭނުންވާ ވަޒީފާއެއް އޮތް ނަމަ އެކަން އެންގުމަށް ފިނޭންސް މިނިސްޓްރީން ވަނީ އަންގާފައެވެ. މިފަދަ ބަދަލެއް ގެންނަން ޖެހުނީ ފިނޭންސް މިނިސްޓްރީގެ ވަޒީފާ އާއި ބެހޭ އޮނިގަނޑަށް ގެނެވުނު ބަދަލުތަކަކާއި ގުޅިގެން ކަމަށް ވެސް މައުލޫމާތު ލިބެ އެވެ.
މިކަމާ ގުޅޭ ރަސްމީ ބައެއް ހޯދުމަށް ފިނޭންސް މިނިސްޓްރީ އަށް ގުޅުމަށް ކުރި މަސައްކަތް ވަނީ ކާމިޔާބު ވާގޮތް ނުވެފަ އެވެ.
މީގެ ކުރިންވެސް ވަނީ ފިނޭންސްގެ 75 މުވައްޒަފަކަށް ވަޒީފާ އިން ވަކިވުމުގެ ނޯޓިސްދީފަ އެވެ. އެކަމާ ގުޅިގެން ފިނޭންސްގެ މުވައްޒަފުން ހަޅުތާލުކުރުމުން އެފަހަރު އެ މަސައްކަތް ހުއްޓާލި އެވެ. ނަމަވެސް ފިނޭންސްގެ މުވައްޒަފުން އެފަދަ އިހްތިޖާޖުކުރުމުން، ރައީސް އަބްދުﷲ ޔާމިން ހިތްހަމަ ނުޖެހުން ފާޅުކުރެއްވެވި އެވެ.
