ބޯޑަރު އަލުން ހުޅުވާލިފަހުން، ފުރަތަމަ ޔޮޓް އުލިގަމަށް ބަނދަރުކޮށްފި
6 އޮކްޓޯބަރު 2020 | އަންގާރަ 13:23މިއީ އަލުން ބޯޑަރު ހުޅުވާލި ފަހުން އުލިގަމަށް ބަނދަރުކުރި ފުރަތަމަ ޔޮޓް
ބޯޑަރު އަލުން ހުޅުވާލުމުން ހއ. އުލިގަމަށް އައި ފުރަތަމަ ޔޮޓް
ކޮވިޑް-19 ޕެންޑަމިކްއާ ގުޅިގެން، ރާއްޖޭގެ ބޯޑަރު ބަންދުކުރުމަށްފަހު، އަލުން ހުޅުވާލިފަހުން ފުރަތަމަ ފަހަރަށް ބޭރުގެ ޔޮޓެއް ހއ. އުލިގަމުގައި ބަނދަރު ކޮށްފިއެވެ.
ކޮވިޑް-19 އާ ގުޅިގެން ރާއްޖޭގެ ރިސޯޓްތަކަށް ފަތުރުވެރިން ރާއްޖެއަށް ޒިޔާރަތްކުރުމާއި ބޭރުގެ ޔޮޓްތައް ރާއްޖެއަށް އައުން ހުޓިގެންދިޔައީ، މިއަހަރުގެ މާރޗު މަހުގެ 27 ވަނަ ދުވަހު ރާއްޖޭގެ ބޮޑަރު ބަންދު ކުރުމާ ގުޅިގެން ގެންނެވެ. ޖުލައި 15 އިން ފެށިގެން ބޯޑަރު ހުޅުވާލުމާއެކު، ރާއްޖޭގެ ބައެއް ރިސޯޓްތައް ހުޅުވައި، ފަތުރުވެރިން ރާއްޖެއަށް ޒިޔާރަތްކުރާ ފަތުރުވެރިންގެ އަދަދުތައް އަންނަނީ އިތުރުވަމުންނެވެ.
އުލިގަމަކީ، ރާއްޖޭގެ ޓޫރިޒަމް ފެށުނީއްސުރެން އެންމެ ގިނަ ބޭރުގެ ޔޮޓު ފަހަރު ބަނދަރުކުރާ ރަށެވެ. ނަމަވެސް ކޮވިޑް-19 އާ ގުޅިގެން ރާއްޖޭގެ ބޯޑަރުވެސް ބަންދުކުރުމުން ބޭރުގެ ޔޮޓް ފަހަރުތައް އައުން މުޅިން ހުއްޓިގެން ދިޔައެވެ. އަދި އަލުން ބޯޑަރު ހުޅުވާލިފަހުން ފުރަތަމަ ޔޮޓް އުލިގަމުގައި ބަނދަރުކުރިއިރު، ކުރިއަށް އޮތީ ފަތުރުވެރިކަމުގެ ސީޒަނެވެ.
ބޯޑަރު އަލުން ހުޅުވިފަހުން ފުރަތަމަ ޔޮޓް އުލިގަމުގައި ބަނދަރު ކުރުމުން، އުލިގަމު ނިސްބަތްވާ ހޯރަފުށި ދާއިރާގެ މެމްބަރު އަހުމަދު ސަލީމް ކުރެއްވި ޓްވީޓެއްގައި ވިދާޅުވީ، ކޮވިޑް-19 ގެ ހާލަތާ ގުޅިގެން ދުވަސްތަކަކަށްފަހު، ފުރަތަމަ ޔޮޓް އުލިގަމުގައި ބަނދަރުކޮށްފި ކަމަށެވެ. އަދި މިއީ އުފާވެރި އުއްމީދީ މަންޒަރެއް ކަމަށެވެ. އަދި އުލިގަމު ޔޮޓް ބަނދަރު ތަރައްގީ ކުރުމަށް ސަރުކާރުން ފެއްޓެވި މަސައްކަތަކީ މުޅި ސަރަހައްދުގެ ކުރިއެެރުމަށް ވަރަށް މުހިއްމު މަސައްކަތެއް ކަމަށް ވިދާޅުވިއެވެ.
ސަރުކާރުން ވަނީ، އުލިގަމުގައި ސިޓީ ހޮޓަލަކާއެކު ޔޮޓު މެރީނާއެއް ތަރައްޤީކުރުުމަށް ޝައުޤުވެރިވެރިވާ ފަރާތްތަކުން އެކަމަށް އެދި ބިޑު ހުށަހެޅުމުގެ ފުރުސަތު ހުޅުވާލާފައެވެ.
ރާއްޖެއެމްވީ އަށް ދެއްވި ހާއްސަ އިންޓަވިއުއެއްގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް ވަނީ، ރާއްޖޭގެ އުތުރުގެ ސަރަހައްދުގައި ފަތުރުވެރިކަން އިތުރަށް ތަރައްގީ ކުރުމަށް ބޭނުންވާ މަޝްރޫއުތަކުގެ ތެރެއިން ހުއްޓިފައި މަޝްރޫއުތައް ވަރަށް އަވަހަށް ފައްޓަވާނެ ކަމަށް ވިދާޅުވެފައެވެ. އެގޮތުން، ބޮޑު ތިލަދުއްމަތީގެ ބެޑް ކެޕޭސިޓީ އިތުރު ކުރުމަށްޓަކައި، ހިންގަން ރާވާފައިވާ މަޝްރޫއުތަކެއް އެބަހުރި ކަމަށް މައުސޫމް ވިދާޅުވިއެވެ.
އޭގެ އިތުރުން ހދ. ހަނިމާދޫ އެއަރޕޯޓަކީ މިހާރުވެސް އިންޓަރނޭޝަނަލް އެއަރޕޯޓެއް ނަމަވެސް އެއެއަރޕޯޓު އިތުރަށް ތަރައްގީ ކުރުމާއި ހއ. ހޯރަފުށީގައި ހަދާ އެއަރޕޯޓް ހުޅުވުމާއި ކުޅުދުއްފުށީގައި ހިންގާ އިގްތިޞާދީ ހަރަކާތްތަކާއެކު، މުޅި ބޮޑު ތިލަދުންމައްޗަށް އަމާޒުކޮށްގެން ބެޑް ކެޕޭސިޓީ އިތުރު ކުރުމަށް މަޝްރޫއުތަކެއް ހިންގަވާނެ ކަމަށް މައުސޫމް ވިދާޅުވިއެވެ.
