ރަޝިއާގެ އިދިކޮޅު ލީޑަރު ނަވަލްނީގެ ހާލުކޮޅު އަންނަނީ ރަނގަޅުވަމުން

ވިހަދިން ރަޝިޔާގެ އިދިކޮޅު ލީޑަރު އެލެކްސީ ނަވަލްނީގެ ހާލުކޮޅު ކުރިޔަށްވުރެ ބޮޑަށް މިހާރު ރަނގަޅުވަމުން އަންނަ ކަމަށް އޭނާ ވިދާޅުވެއްޖެއެވެ.

ޖަރުމަނުގެ ބާލިންސް ޗަރިއްޓެ ހޮސްޕިޓަލުގައި ފަރުވާ ހޯއްދެވި ނަވަލްނީ ވަނީ ހޮސްޕިޓަލުން ދޫކޮށްލާފައެވެ. ހޮސްޕިޓަލުން ދޫކޮށްލުމަށް ފަހު ހިއްސާކުރެއްވި ފުރަތަމަ ވީޑިއޯގައި ނަވަލްނީ ވިދާޅުވީ، އޭނާގެ ހާލު އެހާ އަވަހަށް ރަނގަޅުވަމުންދާތީ ޑޮކްޓަރުންވެސް ތިބީ ވަރަށް ބޮޑަށް ހައިރާންވެފައި ކަމަށެވެ.

ކޮރަޕްޝަނާ ދެކޮޅަށް އަޑު އުފުއްލަވަމުން ގެންދަވާ ނަވަލްނީގެ ސިއްހީ ހާލުކޮޅު ގޯސްވީ އޮގަސްޓު މަހުގެ 20 ވަނަ ދުވަހު ސައިބީރިޔާއިން މޮސްކޯއަށް ދަތުރު ކުރަމުން ދިޔަ ފްލައިޓެއްގެ ތެރެއިން ސައިފޮދެއް ހިއްޕެވި ފަހުންނެވެ.

ނަވަލްނީއަށް ރަޝިޔާގެ ހޮސްޕިޓަލެއްގައި ދެ ދުވަސް ވަންދެން ފަރުވާ ދިނުމަށްފަހު، އިތުރު ފަރުވާއަށް ވަޑައިގެންނެވީ ޖަރުމަންވިލާތަށެވެ. މިހާރުވެސް ނަވަލްނީ ފަރުވާ ހޯއްދަވަނީ އެ ގައުމުގެ ހޮސްޕިޓަލެއްގައެވެ.

ނަވަލްނީގެ ސަޕޯޓަރުންގެ އިތުރުން ޔޫރަަޕްގެ ލީޑަރުން ބުނާ ގޮތުން އޭނާއަށް ވިހަ ދީފައިވަނީ ރަޝިޔާގެ ސަރުކާރުގެ އޯޑަރަށެވެ. މި ވާހަކަތައް ދޮގުކޮށް ރަޝިޔާއިން ބުނެފައިވަނީ، އެ މީހުން ހެދި ޓެސްޓުތަކުން ނަވަލްނީގެ ހަށިގަނޑުން ވިހައިގެ އަސަރު ފެނިފައި ނުވާ ކަމަށެވެ.