ކްލައިމެޓް ވަލްނަރަބަލް ފޯރަމްގެ ބައްދަލުވުމެއް އދ. ގެ އާންމު މަޖިލީހުގެ ހަވާސާގައި ބާއްވަނީ
5 އޮކްޓޯބަރު 2020 | ހޯމަ 15:06މި ފަހަރުގެ ބައްދަލުވުން އޮންނާނީ ވަރޗުއަލްކޮށް، ރިޔާސަތު ބަލަހައްޓާނީ ބަންގްލަދޭޝްއިން
ކްލައިމެޓް ވަލްނިރަބަލް ފޯރަމްގެ ބައްދަލުވުމެއްގައި ރައީސް ނަޝީދު ތަގުރީރުކުރައްވަނީ
ކްލައިމެޓް ވަލްނިރަބަލް ފޯރަމްގެ (ސީވީއެފް) ލީޑަރސް އިވެންޓެއް ބައްދަލުވުމެއް އދ. ގެ އާންމު މަޖިލީހުގެ ހަވާސާގައި ބޭއްވުމަށް ތާވަލުކޮށްފިއެވެ.
މި ފޯރަމް އިންތިޒާމު ކުރަނީ ސީވީއެފްގެ ރިޔާސަތު ބަލަހައްޓަމުން އަންނަ ބަންގްލަދޭޝްއިންނެވެ. އޮކްޓޫބަރު މަހުގެ 7 ވަނަ ދުވަހު ވަރޗުއަލްކޮށް ބާއްވާ ސަމިޓުގައި ބަންގްލަދޭޝްގެ ބޮޑުވަޒީރު ޝޭހް ހަސީނާއާއި، އދ. ގެ ކުރީގެ ސެކެޓްރީ ޖެނެރަލް ބަން ކީ-މޫން، އިޓަލީވިލާޓުގެ ބޮޑުވަޒީރު ޖުސެޕޭ ކޮންޓޭ ބައިވެރިވަޑައިގަންނަވާނެއެވެެ. މި ގައުމުތަކުގެ އިތުރުން މި ބައްދަލުވުމުގައި އިތިއޯޕިއާ، ނޭޕާލް، ފީޖީ، މަރޝަލް އައިލެންޑްސް، ކޮސްޓަ ރީކާ އަދި ކެމްބޯޑިއާގެ ވެރިން ބައިވެރިވެވަޑައިގެން، ތަގުރީރު ކުރައްވާނެއެވެ.
އޭގެ އިތުރުން އިނގިރޭސިވިލާތުގެ ބޮޑުވަޒީރު ބޯރިސް ޖޯންސަންއަށް ވެސް މި ބައްދަލުވުމުގައި ބައިވެރިވުމަށް އެދި ބަންގްލަދޭޝްގެ ފަރާތުން ވަނީ ދައުވަތު އަރުވާފައެވެ. އިނގިރޭސިވިލާތަކީ އަންނަ އަހަރު ބާއްވަން ހަމަޖެހިފައިވާ ކޮޕް26 ކްލައިމެޓް ސަމިޓު ބާއްވާ ގައުމެވެ.
މި ބައްދަލުވުމުގައި ބައިވެރިވުމަށް އިނގިރޭސި ބޮޑުވަޒީރަށް ފޮނުއްވެވި ސިޓީގައި ޝޭހް ހަސީނާ ވިދާޅުވީ، ދުނިޔޭގެ އެއް ބިލިއަން މީހުން ވަނީ މޫސުމަށް އަންނަ ބަދަލުތަކުގެ ސަބަބުން ނުރައްކަލަށް ހުށައެޅިފައިވާ ކަމަށެވެ. އަދި މި ދަނޑިވަޅުގައި އެކުވެރި ގައުމުތަށް ގުޅިގެން މަސައްކަތް ކުރުމަކީ، ނުހުނު ބޭނުންތެރި ކަމެއް ކަމަށް ވިދާޅުވިއެވެ.
ޝޭހް ހަސީނާ ވިދާޅުވީ ސީވީއެފްގެ ދައުރު އެންމެ ފުރިހަމަ ގޮތުގައި އަދާކުރެވޭނީ، ބައިނަލްއަގްވާމީ ފެންވަރުގައި މަޝްވަރާ ކުރެވިގެން ކަމަށެވެ. އަދި މޫސުމަށް އަންނަ ބަދަލުތަކާއި ދެކޮޅަށް އިސް ސަފުގައި ގުޅިގެން މަސައްކަތް ކުރަން ތައްޔާރަށް ހުންނެވި ކަމަށް ވެސް ވިދާޅުވިއެވެ.
ކްލައިމެޓް ވަލްނިރަބަލް ފޯރަމް އަކީ މޫސުމަށް އަންނަ ބަދަލުތަކުގެ ސަބަބުން ނުރައްކަލަށް ހުށައެޅިފައިވާ ތަރައްގީވަމުން އަންނަ ގައުމުތަކުގެ އަޑު އިއްވުމުގެ ގޮތުން ދިވެހިރާއްޖެއިން އުފައްދާފައިވާ ފޯރަމެކެވެ. 2009 ވަނަ އަހަރު އުފެއްދި މި ފޯރަމްގައި 48 ގައުމަކުން ވަނީ ބައިވެރިވެފައެވެ.
