ނައިބު ރައީސް އެޗް.އީ.ސީ.ސީ ގެ މެންބަރުންނާއެކު ބައްދަލުވުމެއް ބާއްވައިފި
މި ބައްދަލުކުރެއްވުން ބާއްވާފައި ވަނީ ދަރުބާރުގޭގަ
ނައިބު ރައީސް ފައިސަލް ނަސީމް އެޗް.އީ.ސީ.ސީގެ މެންބަރުންނާއެކު ބޭއްވެވި ބައްދަލުވުމުގެ ތެރެއިން
ނައިބު ފައިސަލް ނަސީމް ހެލްތު އެމަރޖެންސީ ކޯޑިނޭޝަން ކޮމިޓީ (އެޗް.އީ.ސީ.ސީ) ގެ މެންބަރުންނާ ބައްދަލު ކުރައްވައިފިއެވެ.
ހޮނިހިރު ދުވަހު މެންދުރު ބޭއްވި މި ބައްދަލުކުރެއްވުން ބާއްވާފައި ވަނީ ދަރުބާރުގޭގައެވެ.
މި ބައްދަލުވުމުގައި، ކޯވިޑް-19 ގެ މިހާރުގެ ހާލަތުގެ ރާއްޖޭގެ އެންމެ ފަހުގެ މަޢުލޫމާތު ކޮމިޓީގެ މެންބަރުން ނައިބު ރައީސް އާއި ވަނީ ހިއްސާކޮށްފައެވެ. އެގޮތުން މި މަސައްކަތްތައް ކުރުމުގައި ދިމާވާ ގޮންޖެހުންތަކާއި ގުޅޭގޮތުން ވެސް ބައްދަލުވުމުގެ ބައިވެރިން ނައިބު ރައީސް އާއެކު ފުޅާ ދާއިރާއެއްގައި ވަނީ މަޝްވަރާ ކުރައްވާފައެވެ.
ނައިބު ރައީސް ފައިސަލް ނަސީމް ވަނީ ބައްދަލުވުމުގެ ބައިވެރިން ފާހަގަކުރެއްވެވި ކަންތައްތަކުގައި ކުރިއަށްދާނެ ގޮތުގެ އިރުޝާދު ދެއްވާފައެވެ. މީގެ ތެރޭގައި ވިޔަފާރިތައް އިންސްޕެކްޓް ކުރުމާއި، ބޭނުންވާ ބައެއް ވަސީލަތްތައް ހޯދުމުގެ އިތުރުން މިހާރުގެ ހާލަތުން އަރައިގަތުމަށް ބައެއް ލުއިތައް ދިނުމުގައި، އަދި އަލުން ފަތުރުވެރިކަން ހުޅުވާލައިގެން ކުރިއަށް ދިޔުމުގައި ހެލްތް ޕްރޮޓެކްޝަން އޭޖެންސީގެ ގައިޑްލައިންތަކާއި އެއްގޮތަށް ޢަމަލުކުރުމުގެ މުހިންމުކަން ބައްދަލުވުމުގެ ބައިވެރިން ވަނީ ފާހަގަކުރައްވާފައެވެ.
މި ބައްދަލުވުމުގައި ނައިބު ރައީސް ފައިސަލް ނަސީމް ދެއްކެވި ވާހަކަފުޅުގައި، ކޯވިޑް-19 ގެ މި ހާލަތަކީ މީހުން ބިނާކުރުމުގެ މުހިންމުކަން އިތުރަށް އިހުސާސްވެގެން ދިޔަ ދަނޑިވަޅެއްކަން ފާހަގަކުރައްވައި، ރައީސުލްޖުމްހޫރިއްޔާ އެންމެ އިސްކަމެއް ދެއްވާ އެއް ކަމަކީ ވެސް ތަޢުލީމު ކުރިއަރުވައި މީހުން ބިނާ ކުރުންކަމުގައި އެމަނިކުފާނު ފާހަގަކުރެއްވިއެވެ.
އަދި، އެމަނިކުފާނު ވަނީ މިއަދު ފާހަގަކުރަމުން މިދާ ދުނިޔޭގެ މުދައްރިސުންގެ ދުވަހުގެ ތަޙުނިޔާއާއި ހެޔޮއެދުންތައް ހެލްތު އެމަރޖެންސީ އޮޕަރޭޝަންސް ސެންޓަރުގެ ބޭފުޅުންނާއި އެ މަނިކުފާނު އަމިއްލަ ނަންފުޅުގައި ރާއްޖޭގެ ހުރިހާ މުދައްރިސުންނަށް އަރިސް ކުރައްވާފައެވެ.
