އެންއައިސީ އަށް އައްޔަނު ކުރުމަށް ރައީސް ފޮނުއްވި ނަން ދިރާސާ ކުރުމަށް ކޮމިޓިއަށް
5 އޮކްޓޯބަރު 2020 | ހޯމަ 06:01ނަން ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފައި
ރައްޔިތުންގެ މަޖިލީހުގެ ޖަލްސާގެ ތެރެއިން
ނޭޝަނަލް އިންޓަރގްރިޓީ ކޮމިޝަން (އެންއައިސީ)އަށް އައްޔަނުކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރައްޔިތުންގެ މަޖިލީހަށް ފޮނުއްވި ނަން ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށް ފޮނުވައިފި އެވެ.
ހޯމަ ދުވަހުގެ ޖަލްސާއަށް ވަނީ މިކަމާއި ގުޅިގެން ރައީސް ރައްޔިތުންގެ މަޖިލީހަށް ފޮނުއްވާފައިވާ ސިޓީފުޅު ތަޅުމަށް އިއްވާފައެވެ. އެސިޓީފުޅުގައި ރައީސުލްޖުމްހޫރިއްޔާ ވިދާޅުވެފައިވަނީ އެންއައިސީއަށް ކުރިމަތިލުމަށް ހުޅުވާލި ފުރުސަތުގައި އެކަމަށް އެދި ހުށަހެޅި ފަރާތްތަކުގެ ތެރެއިން މަޖިލީހުން ގޮތެއް ނިންމުމަށް ނަމެއް ފޮނުއްވާ ކަމަށެވެ. އެގޮތުން ފޮނުއްވާފައިވަނީ ޅ. ނައިފަރު / ނިކަގަސްދޮށުގޭ ގާސިމް އަބްދުލްކަރީމްގެ ނަމެވެ.
މިނިމާމެދު ގޮތެއް ނިންމުމަށް ފޮނުއްވި ނަމަވެސް އެކަމަށް ކުރިމަތި އަދި ޝަރުތު ހަމަވެފައިވާ އެހެން ފަރާތްތަކުގެ ނަންތައް ވެސް ފޮނުއްވާފައިވާނެ ކަމަށް ރައީސް ވިދާޅުވިއެވެ.
ނޭޝަނަލް އިންޓެގްރިޓީ ކޮމިޝަނަށް މެމްބަރަކު މި އައްޔަނު ކުރަނީ އެ ކޮމިޝަންގެ ރައީސްގެ މަޤާމުގައި ހުންނެވި އަހުމަދު ސުލެއިމާން މަޤާމުން ވަކި ކުރެއްވުމަށްފަހު އެވެެ. ސުލައިމާން ވަކި ކުރުމަށް ރައީސުލްޖުމްހޫރިއްޔާއަށް ލަފާ އެރުއްވުމަށް ފާސްކޮށްފައިވަނީ ރައްޔިތުންގެ މަޖިލީހުންނެވެ. އަދި ރައްޔިތުންގެ މަޖިލީހުގެ ލަފާފުޅާއެކު ރައީސް ސޯލިހް ވަނީ ސުލައިމާން ވަކިކުރައްވާފަ އެވެ.
އޭގެއިތުރުން ނޭޝަނަލް އިންޓެގްރިޓީ ކޮމިޝަނަށް 3 މެމްބަރަކު އައްޔަން ކުރުމުގެ މަސައްކަތް ރައްޔިތުންގެ މަޖިލީހުން އަންނަނީ ކުރިއަށްގެންދަމުންނެވެ. އެންއައިސީގެ ތިން މެމްބަރުން އިސްތިއުފާ ދެއްވާފައިވާތީ އެ މަގާމުތަކަށް ކުރިމަތިލުމަށް ހުޅުވާލި ފުރުސަތުގައި އެކަމަށް އެދުނު 17 ބޭފުޅުންގެ ނަންތައް އިތުރަށް ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފަ އެވެ.
އެންއައިސީ އަކީ ފަސް މެމްބަރުންގެ މައްޗަށް އެކުލެވިފައިވާ ކޮމިޝަނަކަށްވާއިރު ކޮމިޝަންގައި މިހާރު ހުންނަވަނީ ދާދި ފަހުން މެމްބަރަކަށް އައްޔަން ކުރެއްވި ކާނަލް (ރޓޑ) އަހްމަދުޖިހާދު އެކަންޏެވެ.
