ދައުރު ފެށުނުއިރު މަޖިލީހުގެ ރައީސް ހިމެނިވަޑައިގަންނަވާ ގޮތަށް ތިން މެމްބަރަކު އައިސޮލޭޝަންގައި
5 އޮކްޓޯބަރު 2020 | ހޯމަ 04:24އައިސޮލޭޝަންގައި ތިން މެމްބަރަކު ތިއްބެވި އިރު ލޮކްޑައުންގައި އެއް މެމްބަރަކު
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައްޔިތުންގެ މަޖިލީހުގެ ތިން ވަނަ ދައުރުގެ ޖަލްސާތައް ހޯމަ ދުވަހު ފެށުނު އިރު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ހިމެނިވަޑައިގަންނަވާ ގޮތަށް ތިން މެމްބަރަކު އައިސޮލޭޝަންގައި ތިއްބެވި ކަމަށް މަޖިލީހުގެ ނައިބު ރައީސް އީވާ އަބްދުﷲ ވިދާޅުވެއްޖެ އެވެ.
ހޯމަ ދުވަހުގެ ޖަލްސާ ފައްޓަވަމުން އީވާ ވިދާޅުވީ އައިސޮލޭޝަންގައި ތިން މެމްބަރަކު ތިއްބެވި އިރު ލޮކްޑައުންގައި އެއް މެމްބަރަކު ހުންނެވި ކަމަަށެވެ. ރައްޔިތުންގެ މަޖިލީހުގެ ރައީސް އައިސޮލޭޝްނަގައި ހުންނެވީ އެމަނިކުފާނު އިނގިރޭސިވިލާތަށް ވަޑައިގެން އެނބުރި ވަޑައިގެންނެވުމާއި ގުޅިގެންނެވެ.
ރައީސް ނަޝީދު ނުރަސްމީ ދަތުރުފުޅެއްގައި އިނގިރޭސިވިލާތަށް ފުރާވަޑައިގެންނެވީ، އޯގަސްޓް މަހުގެ 28 ވަނަ ދުވަހުގެ ހެނދުނުގެ ވަގުތެއްގައެވެ. އެމަނިކުފާނު އެނބުރި ވަޑައިގެންނެވީ ސެޕްޓެމްބަރ މަހުގެ 22 ވަނަ ދުވަހު އެވެ. އަދި އޭގެފަހުން މާލެ ވަޑައިގަތުމާއެކު ކަރަންޓީނުގައި ހުންނެވިކަމަށް މަޖިލީހުގެ އިދާރާއިން ވަނީ ބުނެފައެވެ. ރާއްޖޭގައި ކޮވިޑްގެ ބަލިމަޑުކަން އޮތް ދުވަސްވަރެއްގައި، ރާއްޖެއިން ބޭރުން އަންނަ ކޮންމެ ފަރާތެއް ވެސް 14 ދުވަހުގެ ކަރަންޓީން މުއްދަތެއް ފުރިހަމަކޮށް ޓެސްޓް ކުރަން ޖެހެއެވެ.
އެމަނިކުފާނުގެ 14 ދުވަސް ހަމާވާނީ އޮކްޓޯބަރ މަހުގެ 6 ވަނަ ދުވަހު އަށެވެ.
މީގެއިތުރުން އެމްޑީޕީގެ ޗެއަރ ޕާސަން އަދި ހެންވޭރު ހުޅަނގު ދާއިރާގެ މެމްބަރ ހަސަން ލަތީފުގެ މަންމަ ކޮވިޑް-19 އަށް ޕޮޒިޓިވްވުމާއި ގުޅިގެން ހޯމް ކަރަންޓީނުގައި ހުންނެވި ކަމަށް ވަނީ ވިދާޅުވެފައެވެ. ސެޕްޓެމްބަރ މަހުގެ 28 ވަނަ ދުވަހު އެކަން ހާމަކުރައްވާ ކުރެއްވި ޓްވީޓެއްގައި ހަސަން ލަތީފު ވިދާޅުވީ މަންމަ އާ ޑައިރެކްޓް ކޮންޓެކްޓަކަށް ވެފައިވުމާއެކު ގޭގައި ކަރަންޓީނުވެގެން ހުންނެވި ކަމަށެވެ.
މަސް ދުވަހުގެ ޗުއްޓީއަކަށްފަހު ރައްޔިތުންގެ މަޖިލީހުގެ މިދައުރުގެ ތިން ވަނަ ދައުރުގެ ޖަލްސާތައް ހޯމަ ދުވަހު ފަށާފައިވާއިރު މިޖަލްސާގައި ހައުސިންގ މިނިސްޓަރ މުހައްމަދު އަސްލަމާއި ސުވާލު ކުރެއްވުން އެޖެންޑާގައި އޮތްއިރު ތިން ބިލަކަށް ބަހުސް ކުރުމަށް ވެސް ވަނީ އެޖެންޑާކޮށްފައެވެ.
