ޕެސްޓިސައިޑް ބޭނުން ނުކޮށް ރާއްޖޭގައި ގަސް ނުހެއްދޭ: މިނިސްޓްރީ
4 އޮކްޓޯބަރު 2020 | އާދީއްތަ 20:10ަގަސްތަކާ ބެހޭ ގިނަ މައުލޫމާތުތައް މިނިސްޓްރީން ދަނީ ފޯރުކޮށްދެމުން
ފަލަސުރުހީ ޕްރޮގްރާމްގެ ތެރެއިން
ޕެސްޓިސައިޑް ބޭނުން ނުކޮށް ރާއްޖޭގައި ގަސް ނުހެއްދޭ ކަމަށާއި، މަސައްކަތް ކުރަނީ ގަސްހައްދާ ފަރާތްތަކަށް ރަނގަޅު މައުލޫމާތު ފޯރުކޮށްދިނުމަށް ކަަމަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ބުނެފިއެވެ.
ފަލަސުރުހީ ޕްރޮގްރާމްގައި މިނިސްޓްރީގެ ޑިރެކްޓަރ ޕްލާންޓް އެންޑް ކްރަންޓީން ސެކްޝަން ގާސިދު މުހައްމަދު ވިދާޅުވީ މިދުވަސްވަރު ރާއްޖެއަށް ތަފާތު ވައްތަރުގެ ގަސްތައް އެތެރެ ކުރުން ވަރަށް ބޮޑަށް އިތުރުވެފައިވާ ކަމަށެވެ. އެގޮތުން މާބަގީޗާ ހައްދާ މީހުންނާއި، ގަހުގެ ވިޔަފާރި ކުރާ މީހުން ވެސް އިތުރުވެފައިވާކަން އޭނާ ފާހަގަކުރެއްވިއެވެ.
ގާސިދު ވިދާޅުވީ ގަސްތަކަށް ޖެހޭ ބައްޔާއި، ގަސްތަކަށް ދޭނެ ފަރުވާއާއި، ގަސް ހައްދާނެ ގޮތްތަކާއި އަދި ގަސްތަކާއި ބެހޭ ގިނަ މައުލޫމާތުތައް މިނިސްޓްރީން ފޯރުކޮށްދެމުންދާ ކަަމަށެވެ. އަދި ގަސްތަކަށް ބޭނުން ކުރާ ގަސްކާނާއާ، ގަސްކާނާ އެތެރެ ކުރާ ފަރާތްތަކުން ވެސް ހޭލުންތެރިކުރުވުމަށް ގިނަ މަސައްކަތްތަކެއް ކުރަމުންދާ ކަމަށް ގާސިދު ވިދާޅުވިއެވެ.
މިނިސްޓްރީން ކުރަމުންދާ މަސައްކަތްތަކަށް އަލިއަޅުއްލައްވާ ގާސިދު ވިދާޅުވީ މީގެ ކުރިން މައުލޫމާތު ފޯރުކޮށްދިނުމުގެ ތަފާތު ޕްރޮގްރާމްތަށް މާލޭގެ އިތުރުން އަތޮޅު ތެރޭގައި ކުރިއަށްދާ ކަމަށެވެ. ނަމަވެސް މިހާރުގެ ހާލަތާއި ގުޅިގެން ފޭސްބުކް، ޓްވިޓަރ މެދުވެރިކޮށް މައުލޫމާތު ހިމެނޭ ޕޯސްޓަރުތަކާއި ވީޑިއޯތައް އާންމު ކުރަމުންދާ ކަމަށް ގާސިދު ވިދާޅުވިއެވެ. ސޯޝަލް މީޑިއާގެ ފްލެޓްފޯމްތަކުން އާންމު ކުރަމުންދާ ސުވާލުތަކަށް ވެސް ޖަވާބުދީ ގަސް އިންދުމަށް ހިތްވަރު ދެމުންދާ ކަމަށް އޭނާ ވިދާޅުވިއެވެ. އަދި ދަނޑުވެރިކަން ކުރާ ފަރާތްތަކަށް މައުލޫމާތު ފޯރުކޮށްދިނުމަށް ޚާއްސަ ހޮޓްލައިންއެއް ގާއިމްކޮށްފައިވާކަން ގާސިދު ފާހަގަކުރެއްވިއެވެ.
ޕެސްޓިސައިޑް ބޭނުން ކުރުމާ ބެހޭ ގޮތުން ގާސިދު ވިދާޅުވީ މިހާރު ފެސްޓިސައިޑް ބޭނުން ނުކޮށް ވެސް ގަސް ނުހެއްދޭ ކަމަށާއި، މި ބޭނުން ކުރުމުގައި ވެސް ދެކޮޅު އޮންނަ ކަމަށެވެ. އެގޮތުން އެބޭނުން ކުރަންވާ ހާލަތްތަކާއި، މިންވަރަށް ބޭނުން ކުރާ ނަމަ ގެއްލުންނުވާނެ ކަމަށް އޭނާ ވިދާޅުވިއެވެ.
ގާސިދު ވިދާޅުވީ ކުރިއަށް އޮތްތާގައި ޕެސްޓިސައިޑް ކެޓަގަރައިޒް ކުރުމާއި، ދަނޑުވެރިންނަށް މައުލޫމާތު ދޭނެ ގޮތްތަކާއި، ގުދަން ކުރާ ތަންތަނާއި، ވިޔަފާރި ކުރާ ތަންތަން މޮނިޓަރ ކުރެވި އުސޫލުތައް ހެދިގެންދާނެ ކަމަށެވެ.
ދަނޑުވެރިކަމުގެ މިނިސްޓްރީން އަބަދުވެސް މަސައްކަތް ކުރަނީ މީހުންނަށް ޗެލަންޖަކަށް ނުވާނެ ފަދަ ގޮތަކަށް އެހީތެރިކަން ފޯރުކޮށްދިނުމަށް ކަމަށް ގާސިދު ވިދާޅުވިއެވެ.
