ރައީސް މައުމޫނުގެ ޕާސަނަލް އެސިސްޓެންޓްގެ ޕާސްޕޯޓް ކެންސަލްކޮށް، ހޯދުމަށް އިންޓަޕޯލްގައި އެދިއްޖެ
އިކޮނޮމިކް ކްރައިމް ޑިޕާޓްމަންޓުން ތަހުޤީޤު ކުރަމުންދާ މައްސަލައަކާ ގުޅިގެން
ރައީސް މައުމޫން އަބްދުލްގައްޔޫމްގެ ޕާސަނަލް އެސިސްޓެންޓް އަހުމަދު ސޮފްވާން
ފުލުހުން ހޯދުމަށް އިއުލާނުކޮށްފައިވާ ރައީސް މައުމޫން އަބްދުލްގައްޔޫމްގެ ޕާސަނަލް އެސިސްޓެންޓްގެ ޕާސްޕޯޓް ކެންސަލް ކޮށް، އޭނާ ހޯދުމަށް އިންޓަޕޯލްގެ އެހީތެރިކަމަށް ފުލުހުން އެދިއްޖެ އެވެ.
މ. ހިމްމިޔާ، އަހުމަދު ސޮފްވާން އަކީ ރައީސް މައުމޫންގެ ޕާސަނަލް ސެކެރެޓަރީގެ އިތުރުން، ޕީޕީއެމްގެ ކައުންސިލް މެމްބަރެއްވެސްމެ އެވެ.
ސޮފްވާން ހޯދުމަށް ފުލުހުން އިއުލާނުކުރީ މިމަހުގެ 10 ވަނަ ދުވަހު އެވެ. ފުލުހުން ކުރި އިއުލާނެއްގައި ބުނެފައިވަނީ، އޭނާ ހޯދަނީ އިކޮނޮމިކް ކްރައިމް ޑިޕާޓްމަންޓުން ތަހުޤީޤު ކުރަމުންދާ މައްސަލައަކާ ގުޅިގެން ކަމަށެވެ.
ބުދަ ދުވަހު ފުލުހުން ބުނީ ތަހުގީގަށް އެއްބާރުލުން ދީފައިނުވާ މައްސަލައާ ގުޅިގެން ސޮފްވާނުގެ ޕާސްޕޯޓް އިމިގްރޭޝަން މެދުވެރިކޮށް ކެންސަލްކޮށްފައިވާ ކަމަށެވެ. އަދި އޭނާ ހޯދުމަށް އިންޓަޕޯލްގެ އެހީތެރިކަމަށް އެދިފައިވާ ކަމަށް ވެސް ފުލުހުން ބުނެ އެވެ.
ސޮފްވާނު ހޯދުމަށް އިންޓަޕޯލްގެ އެހީތެރިކަމަށް ފުލުހުން އެދިފައިވީ ނަމަވެސް، އަދި މިހާތަނަށް އިންޓަޕޯލްގެ ވެބްސައިޓުގައި އޭނާ ހޯދުމަށް އިއުލާނުކޮށްފައި ނުވެ އެވެ.
