ރަޝިޔާއިން ކޮވިޑް-19 އަށް އުފެއްދި ވެކްސިންގެ ޝިޕްމަންޓް ވެނެޒުޔޭލާއަށް ގެންގޮސްފި
މިމަހު އެގައުމުގައި ކުރިޔަށްދާ މިވެކްސިންގެ ޓްރެއަލްގައި 2000 މީހުން ބައިވެރިވާނެ
ރަޝިޔާގެ ވެކްސިން މީހެއްގެ ގަޔަށް ޖެހުމަށް ތައްޔާރުވަނީ
ރަޝިޔާއިން ކޮވިޑް-19 އުފެއްދި ވެކްސިން ކަމުގައިވާ ސްޕޮޓްނިކް ވީ ގެ ފުރަތަމަ ޝިޕްމެންޓް ވެނެޒުޔޭލާ އަށް ލިބިފައިވާ ކަމަށް އެގައުމުގެ ނައިބު ރައީސް ޑެލްސީ ރޮޑްރިގޭޒް ވިދާޅުވެއްޖެ އެވެ.
މިއީ ލެޓިން އެމެރިކާގެ ގައުމަކަށް ރަޝިޔާގެ ކޮވިޑް-19 ވެކްސިން ލިބުނު ފުރަތަމަ ފަހަރެވެ. މިއާއެކު ވެނެޒުޔޭލާގައި މިވެކްސިންގެ ޓްރެއަލްތައް ފަށާނެ ކަމަށް ރޮޑްރިގޭޒް ވަނީ ވިދާޅުވެފައެވެ. އެގައުމުގެ މައި އެއަރޕޯޓްގައި ހުންނަވާ ޓީވީ މެދުވެރި ކުރައްވާ ވާހަކަ ދައްކަވަމުން ރޮޑްރިގޭޒް ވިދާޅުވީ މިއީ ވެކްސިނާއި ގުޅޭގޮތުން ރަޝިޔާ އާއި ވެނެޒުޔޭލާ އާ ދެމެދު ކުރިޔަށްދިޔަ ވާހަކަތަކުގެ ނަތީޖާތައް ކަމަށެވެ.
އެހެންނަމަވެސް ވެނެޒުޔޭލާއަަށް ރަޝިޔާއިން ފޮނުވީ ކިތައް ޑޯޒް ކަމެއް ރޮޑްރިގޭޒް ވިދާޅެއްނުވެ އެވެ. އެގައުމުގެ ހެލްތު މިނިސްޓަރ ވިދާޅުވީ މި މަހު އެގައުމުގައި ކުރިޔަށްދާ މިވެކްސިންގެ ޓްރެއަލްގައި 2000 މީހުން ބައިވެރިވާނެ އެވެ.
އެގައުމުގެ ރައީސް ނިކޮލަސް މަޑޫރޯ ވަނީ ސެޕްޓެމްބަރ މަސްތެރޭގައި އެގައުމުގައި ރަޝިޔާގެ ވެކްސިންގެ ޓެރެއަލްގައި 15،000 މީހުން ބައިވެރިވުމަށް ހުށަހަޅުއްވާފަ އެވެ. އެއީ ކުރިޔަށް އޮތް އިންތިޚާބަށް ވާއިރު ގިނަ ބަޔަކު ބަލިން ސަލާމަތް ވެފައި ތިބޭނެ ކަމަށް ބަލައެވެ. އަދި ކެމްޕެއިންގެ ކަންކަން ރަނގަޅަށް ކުރިޔަށް ގެންދިޔުމަށްޓަކައެވެ.
މިފަހަކުން ވެނެޒުޔޭލާ އާއި ރަޝިޔާ އާ ދެމެދު އޮންނަ ގުޅުންވަނީ ވަރުގަދަވެފައެވެ.
