ސޫރިޔާގައި ރަޝިޔާއިން ދިން ޙަމަލާއެއްގައި 53 މީހުން މަރުވެއްޖެ

އާދިއްތަ ދުވަހުގެ ފަތިހު ސޫރިޔާގައި ހަރަކާތްތެރިވާ ހަނގުރާމަވެރިންނަށް އަމާޒުކޮށްގެން ރަޝިޔާއިން ދިން ވައިގެ ޙަމަލާގައި އާއްމުންގެ 53 މީހަކު މަރުވެފައިވާކަމަށް ރިޕޯޓްތައް ބުނެފިއެވެ.

ސޫރިޔާގެ ޙާލަތު މޮނީޓަރކުރަމުންދާ ސީރިއަން އޮބްޒަވޭޓަރީ ފޮރ ހިއުމަން ރައިޓްސް އިން ބުނީ ސޫރިޔާގެ އިރުމަތީގައި އޮންނަ ދާއިރުއްޒޫރު ޕްރޮވިންސްގެ އަލްޝަފާ އަވަށަށް ދިން މިހަލާގައި މަރުވި މީހުންގެ ތެރޭގައި 21 ކުޑަކުދިން ހިމެނޭކަމަށެވެ. ދާއިރުއްޒޫރަކީ އިސްލާމިކް ސްޓޭޓްގެ ހަނގުރާމަވެރިންގެ އަތްދަށުގައި އޮތް ސޫރިޔާގެ މަދު ސަރަހައްދުތަކުގެ ތެރެއިން ސަރަހައްދެކެވެ. މިހަމަލާގައި މަރުވިކަމަށް އެންމެ ފުރަތަމަ ބެލެވުނީ 34 މީހުންނެވެ. އެހެން ނަމަވެސް އާދިއްތަ ދުވަހު، ޙަމަލާގެ ސަބަބުން ވެއްޓިފައިވާ އިމާރާތްތަކުގެ ދަށުން މީހުން ނަގާ ނިމުނުއިރު މަރުވި މީހުންގެ އަދަދު 53އަށް އަރާފައިވެއެވެ.

ބޮން އަޅާ ހަ މަތިންދާބޯޓެއް ބޭނުންކޮށްގެން އެސަރަހައްދުގައި އާދިއްތަ ދުވަހު އޮޕަރޭޝަންތައް ހިންގާފައިވާކަން ރަޝިޔާއިން ވަނީ ކަށަވަރުކޮށްދީފައެވެ. އެހެން ނަމަވެސް ރަޝިޔާއިން ބުނީ އެޤައުމުން ޙަމަލާތައް އަމާޒުކޮށްފައިވަނީ ހަނގުރާމަވެރިންގެ ޖަގަހަތަކަށްކަމަށެވެ. 2011ވަނަ އަހަރުން ފެށިގެން ހުއްޓުމެއް ނެތި ސޫރިޔާގައި ދާޚިލީ ހަނގުރާމައެއް ހިނގަމުންދާއިރު، މިހަނގުރާމައިގައި ރައީސް ބައްޝާރުލްއައްސަދުގެ ސަރުކާރަށް މަދަދު ދެނީ ރަޝިޔާއިންނެވެ. އެގޮތުން އައްސަދުގެ ސަރުކާރާއި ދެކޮޅު ހަނގުރާމަވެރިންނަށް އަމާޒުކޮށްގެން ދޭތެރެ ދޭތެރެއިން ރަޝިޔާއިން ބޮން އަޅައިދެއެވެ.

ދާއިރުއްޒޫރުގައި ރަޝިޔާއިން ވަރުގަދަ ޙަމަލާއެއް ދިންއިރު، ވެރިރަށް ދިމިޝްޤުގެ ރަށްބޭރުގައި ހަނގުރާމަވެރިން ކޮންޓްރޯލްކުރާ ސަރަހައްދަކަށް އަމާޒުކޮށް ދިން ޙަމަލާއެއްގައިވެސް 23 މީހަކު މަރުވެފައިވެއެވެ. މި ހަމަލާގައި ބޮން އަޅާ މަތިންދާބޯޓުގެ އިތުރުން އެއްގަމު މަގުން ބަރު ހަތިޔާރުވެސް ބޭނުން ކުރިއެވެ. އިރުމަތީ ޣޫތާ އަވަށް ހިފުމަށް ވަރުގަދަ ހަމަލާތަކެއް ދޭން ފަށާފައިވާއިރު، އެއަވަށުގައި ތިބި މީހުން ބަނޑަށް ޖެހިފައިވާކަމަށް އދއިން ވަނީ ބުނެފައެވެ.

މިހަނގުރާމައަށް ނިމުމެއް ގެނެވޭތޯ ބައިނަލްއަޤްވާމީ މުޖްތަމައުން މީގެ ކުރިން ގިނަ މަސައްކަތްތަކެއް ކޮށްފައިވީނަމަވެސް، ހައްލެއް އައިސްފައެއް ނުވެއެވެ. އަދި ސުލްހައިގެ ވާހަކަތަކުގެ އިތުރު ބުރެއް އަންނަ ހަފްތާގައި ސްވިޓްޒަލޭންޑްގެ ޖެނީވާގައި ބޭއްވުމަށް ވަނީ ހަމަޖެހިފައެވެ.