އެމެރިކާގެ ރައީސް ޑޮނާލްޑް ޓްރަމްޕާއި ރަޝިޔާގެ ރައީސް ވްލެޑްމިއަރ ޕޫޓިންގެ "ސިއްރު" ބައްދަލުކުރެއްވުމެއް ދާދިފަހުން ބޭއްވުނު ޖީ20 ސަމިޓުގައި ބޭއްވެވިކަމަށް ދެކެވޭ ވާހަކަ ރަޝިޔާއިން ދޮގުކޮށްފިއެވެ. 

މިކަން ދޮގުކުރަމުން ރަޝިޔާއިން ބުނީ ރޭގަނޑުގެ ފަރީއްކޮޅެއްގައި ދެބޭފުޅުން ނުރަސްމީ ގޮތެއްގައި ވާހަކަފުޅުދެއްކެވި ކަމަށާއި އިތުރު ގޮތަކަށް އެހެން ބަޔަކު ވާހަކަ ފެތުރުމަކީ "ޔަގީނުންވެސް މޮޔަކަމެއް" ކަމަށެވެ.

ރައީސް ޕޫޓިންގެ ޕްރެސް ސެކްރެޓަރީ ޑިމިޓްރީ ޕެސްކޮވް، ދައުލަތުގެ ޓީވީއަށް ދެއްވި ބަސްދީގަތުމެއްގައި ވިދާޅުވީ، އެއްވެސް ސިއްރު ބައްދަލުވުމެއް ދެގައުމުގެ ވެރިން ނުބާއްވަވާ ކަމަށާއި ރަސްމީ ގޮތުން ދެގައުމުގެ ވެރިން ބައްދަލު ކުރެއްވި ކަމަށާއި އެއަށްފަހު އެކި ފަހަރު މަތިން ދެގައުމުގެ ވެރިން ހާވާސާގައި ކަންކަމާ ބެހޭ ގޮތުން ޚިޔާލު ބަދަލު ކުރެއްވި ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕާއި  ރަޝިޔާގެ ރައީސް ވްލެޑްމިއަރ ޕޫޓިން "ސިއްރު" ބައްދަލުކުރެއްވުމެއް ބޭއްވެވިކަމަށް ދެކެވޭ ވާހަކަ އާއި ގުޅިގެން އެމެރިކާގެ ވައިޓް ހައުސްގެ އޮފިޝަލުންނާ ހަވާލާދީ ވީއޯއޭއިން ބުނީ ދެ ރައީސުން "ދެވަނަ ބައްދަލުކުރެއްވުމެއް ނުބާއްވަވާ ކަމަށާއި ރޭގަނޑުގެ ފަރީއްކޮޅަށްފަހު ވަރަށް ކުރުކޮށް ވާހަކަފުޅު ދެއްކެވި" ކަމަށެވެ. ދެގައުމުގެ ވެރިން ވަނީ ޖީ20 ސަމިޓުގައި ރަސްމީކޮށް ބައްދަލުކުރެއްވުމެއް ބާއްވަވާފައެވެ.

މީޑިއާ ރިޕޯޓުތައް ބުނާގޮތުން ރައީސް ޓްރަމްޕާއި ރައީސް ޕޫޓިން އާއި ކުރެއްވި ބައްދަލުވުމުގެ އޮފިޝަލް ރިކޯޑުތަކެއް އެމެރިކާ ސަރުކާރަކުނެތެވެ. ސަބަބަކީ އެމެރިކާގެ އޮފިޝަލެއް ދެބޭފުޅުންގެ އަރިހުގައި ނެތުމެވެ. ދެ ރައީސުން ބައްދަލު ކުރެއްވެވީ އެކަހެރިކޮށެވެ.