އޮކްސްފޯޑް ޔުނިވަރސިޓީން ކޮވިޑް-19 އަށް އުފެއްދި ވެކްސިން ބުރާސްފަތި ދުވަހު އަޖުމަ ބަލަނީ

އިނގިރޭސި ވިލާތުގެ މަޝްހޫރު އޮކްސްފޯޑް ޔުނިވަރސިޓީން ކޮވިޑް-19 އަށް އުފެއްދި ވެކްސިން އިންސާނުންގެ ގަޔަށް ޖަހައިގެން އަޖުމަ ބެލުމުގެ ހުއްދަ އެޤައުމުގެ ސަރުކާރުން ދީފިއެވެ.

އިނގިރޭސި ވިލާތުގެ ސެކްރެޓަރީ އޮފް ސްޓޭޓް އެންޑް ހެލްތު ކެއަރ މެޓް ހެންކޮކް ވިދާޅުވީ، ކޮވިޑް-19 އަށް ވެކްސިންއެއް އުފެއްދި އޮކްސްފޯޑްގެ ފަންނީ ޓީމުގެ މަސައްކަތް ސަރުކާރުން ބަލައިގަންނަކަމަށެވެ. އަދި އެޓީމުން އެހާ އަވަސް ފުރުޞަތެއްގައި މިފަދަ ކުރިއެރުމެއް ހޯދާފައިވާތީ އެކަމަށް ވަނީ ތަޢުރީފު ކުރައްވާފައެވެ.

މެޓް ވިދާޅުވީ މި ވެކްސިން އުފެއްދުމަށް ކުރަންޖެހޭ ހުރިހައި ހޭދައެއް ކުރަން ސަރުކާރުން ތައްޔާރަށް އޮތްކަމަށެވެ. އަދި ވެކްސިންގެ އަޖުމަ ބެލުމުގެ މަރުހަލާ ކާމިޔާބުވެއްޖެނަމަ، އެ އުފައްދަން އިންވެސްޓްކޮށް، އިގިރޭސި ރައްޔިތުންނަށް ވީހާވެސް އަވަހަށް ވެކްސިން ލިބޭނެ އިންތިޒާމު ހަމަޖައްސަން ސަރުކާރުން ބޭނުންވާކަމަށެވެ. އަދި އެންމެ ފުރަތަމަ ކާމިޔާބުކަމާއެކު ނުރައްކާތެރި ވައިރަސްއަށް ވެކްސިން އުފެއްދުނު ޤައުމުގެ ފަޚުރު އިނގިރޭސިވިލާތައް ލިބިގެން ދިއުމަކީ ސަރުކާރުން މިކަމަށް ހޭދަކުރާނެ އެއްކަމެއްގެ ގޮތުގައި އޭނާވަނީ ސިފަކުރައްވާފައެވެ.

މިހާރު އިގިރޭސި ސަރުކާރުން ހަމަޖައްސާފައިވާގޮތުންނަމަ، އޮކްސްފޯޑް ޔުނިވަރސިޓީގެ ޓީމަށް 24 މިލިއަން ޑޮލަރު ޚަރަދުކުރާނެއެވެ. އަދި އިތުރު ވެކްސިންއެއް އުފައްދަން މަސައްކަތްކުރަމުންދާ އިމްޕީރިއަލް ކޮލްޖުގެ ސައިންޓިސްޓުންގެ ޓީމަށް 22.5 މިލިއަން ޕައުންޑް ހޭދަކުރާނެއެވެ.

އޮކްސްފޯޑުގެ ޓީމުން ކުރިން އަންދާޒާކޮށްފައިވަނީ އިންސާނުންނަށް ވެކްސިންގެ އަޖުމަ ބެލުމުގެ މަރުޙަލާ ކާމިޔާބު ވެއްޖެނަމަ ސެޕްޓެމްބަރު މަހުގެ ނިޔަލަށް 1 މިލިއަން ޑޯޒްގެ ވެކްސިން އުފެއްދުމަށެވެ. ކޮވިޑް-19 އަށް ވެކްސިން އުފެއްދުމަށް މަސައްކަތް ކުރަމުންދާ އޮކްސްފޯޑު ޔުނިވަސިޓީގެ ޕްރޮޖެކްޓަކީ އެ ޔުނިވަރސިޓީގެ ޖެނަރސް އިންސްޓިޓިއުޓާއި، އޮލްސްފޯޑް ވެކްސިން ގްރޫޕް ގުޅިގެން ހިންގާ ޕްރޮޖެކްޓެކެވެ.

މި ޕްރޮޖެކްޓުގެ ދަށުން، މާރޗް މަހު ވަނީ ކްލިނިކަލް ޓްރަޔަލް ގައިބައިވެރިވާން ބޭނުންވާ އުމުރުން 18 އަހަރާއި 55 އަހަރާއި ދެމެދުގެ ޞިއްޙަތު ރަނގަޅު މީހުންނަށް ފުރުޞަތު ހުޅުވާލާފައެވެ. ވެކްސިން އުފެއްދުމުގެ މަސައްކަތް ފެބްރުއަރީ މަހު ފަށާފައިވާއިރު، އަންނަ ބުރާސްފަތި ދުވަހު ވޮލަންޓިއަރކުރި މީހުން ބޭނުންކޮށްގެން އިންސާނުންގެ ހަށިގަނޑުގައި ވެކްސިން އަޖުމަ ބެލުމުގެ މަރުޙަލާ ފެށުމަށް ވަނީ ހަމަޖެހިފައެވެ. މިކަން އިނގިރޭސި ސަރުކާރުންވެސް ވަނީ އަންގާރަ ދުވަހު އިޢުލާނުކޮށްފައެވެ.

މާރޗްމަހު ވެކްސިންއާއި ބެހޭ ގޮތުން އޮކްސްފޯޑް ޔުނިވަރސިޓީގެ ޖެނަރ އިންސްޓިޓިއުޓްގެ ޑިރެކްޓަރ އެޑްރިއަން ހިލް ވިދާޅުވެފައިވަނީ އޮކްސްފޯޑްގެ ޓީމަކީ މިފަދަ ބަލިބައްޔަށް ވެކްސިން އުފެއްދުމުގެ ޤާބިލުކަން ލިބިގެންވާ ޓީމެއް އޮތް ތަނެއްކަމަށާއި، 2014 ވަނަ އަހަރު އެފްރިކާ ބައްރުގައި ފެތުރުނު ނުރައްކާތެރި އެބޯލާ ވައިރަސްއަށް އެޔުނިވަރސިޓީން އުފެއްދި ވެކްސިން މިކަމުގެ ހެއްކަކަށް ފުދޭ ކަމަށެވެ. އެހެންނަމަވެސް ކޮވިޑް-19 އަށް ވެކްސިންއެއް އުފެއްދުމަކީ ކުރިމަތިވެފަ އޮތް ބޮޑު ގޮންޖެހުމެއްގެ ގޮތުގައި ވިދާޅުވެފައިވެއެވެ.