ކޮވިޑް-19 ބަލި ޖެހިފައިވާ މީހުންނަށް ފަރުވާ ދިނުމަށް ފުއްޕާމޭގެ ތެރެއަށް ޑިސްއިންފެކްޓަންޓް ފޮނުވުން ނުވަތަ ހަށިގަނޑުގެ ތެރެއަށް ޔޫވީ އަލި ފޮނުވަން އެމެރިކާގެ ރައީސް ޑޮނަލްޑް ޓްރަމްޕް ޚިޔާލު ދެއްވައިފި އެވެ.

ޓްރަމްޕް މިހެން ވިދާޅުވީ ރަސްމީ ގެކޮޅު ވައިޓް ހައުސްގައި ބޭއްވި ނޫސްވެރިންގެ ބައްދަލުވުމެއްގައެވެ. ޔޫވީ އަލި ފޮނުވަން ހިޔާލު ހުށައެޅުއްވީ އެމެރިކާގެ ޑިޕާޓްމަންޓް އޮފް ހޯމްލެންޑް ސެކިއުރިޓީގެ ބިލް ބްރަޔަން ދެއްވި ޕްރެޒެންޓޭޝަނަކާއި ގުޅިގެންނެވެ.

ބްރަޔަންގެ ޕްރެޒެންޓޭޝަންގައި އޭނާ ވަނީ، ހޫނު ތަންތަނުގައި ވައިރަސްއަށް ގިނައިރު ނޫޅެވޭ ކަމަށް އޭނާގޭ ދިރާސާކުރާ ޓީމުގެ ހޯދުންތަކުން ދައްކާކަމަށް ވިދާޅުވެފަ އެވެ. އަދި އަވިދޭނަމަ، ވައިރަސް އަވަހަށް މަރުވާ ކަމަށް ބްރަޔަން ވިދާޅުވި އެވެ.

ޕްރެޒެންޓޭޝަނަށް ފަހު ވާހަކަދައްކަވަމުން ޓްރަމްޕް ވިދާޅުވީ، ގަދަ އައްޔެއް ހަށިގަނޑުގެ ތެރެއަށް ފޮނުވާލުމަކީ ހައްލެއް ކަމަށް ދެކެވަޑައިގަންނަވާ ކަަމަށް ވިދާޅުވެފަ އެވެ. އަދި މިކަންކަން ޓެސްޓު ކުރަމުންދާ ކަމަށް އުއްމީދުކުރައްވާ ކަމަށް ވިދާޅުވި އެވެ.

ޓްރަމްޕް ވަނީ ޑިސްއިންފެކްޓަންޓް ބޭނުން ކޮށްގެން ވައިރަސް ނެތިގެންދާ ކަމުގެ ވާހަކަތައް އަޑުއިވިފައިވާ ކަމަށް ވިދާޅުވެ، ފުއްޕާމޭގެ ތެރެއަށް ޑިސްއިންފެކްޓަންޓް ފޮނުވޭން ގޮތެއް ހޯދަން ބްރަޔަންގެ ޓީމުން މަސައްކަތް ކުރުމަށް އެދިވަޑައިގެންފަ އެވެ. އަދި އެކަމަކީ ވަރަށް "ޝައުގުވެރި" ކަމަކަށް ވާނެ ކަމަށް ވިދާޅުވި އެވެ.

ޓްރަމްޕްގެ ހުށައެޅުއްވުމާއި ގުޅިގެން ހޯމްލެންޑް ސެކިއުރިޓީގެ ބްރަޔަންއާ މީޑިއާތަކުން ސުވާލުކުރުމުން، އޭނާ ވިދާޅުވީ ޓްރަމްޕް ވިދާޅުވި ފަދަ އެއްވެސް ޓެސްޓެއް ހެދުމުގެ ހިޔާލެއް ނުގެންގުޅޭ ކަމަށެވެ. އަދި ހޫނު ގަދަ ތަންތަނުގައި ވައިރަސް ނެތިދިއުމުގެ ފުރުސަތު ބޮޑު ނަމަވެސް، މި ވަގުތަށް އެންމެ ރަނގަޅީ އިޖްތިމާއީ ގައިދުރުކަން ބެހެއްޓުން ކަމަށް ވިދާޅުވި އެވެ.

ޓްރަމްޕްގެ ދެއްކެވި ވާހަކަތަކާއި ގުޅިގެން، ސިއްހީ މާހިރުން ވަނީ ކަންބޮޑުވުން ފާޅުކޮށްފަ އެވެ. އެގޮތުން ޑިސްއިންފެކްޓަންޓަކީ އަމިއްލައަށް މަރުވާން ބޭނުންވާ މީހުން ބޭނުންކުރާ އާލާތެއް ކަމަށާއި، އެފަދަ ހިޔާލު ފާޅުކުރެއްވުމަކީ ނުރައްކާތެރި ކަމެއްގެ ގޮތުގައި އެ ފަރާތްތަކުން ވަނީ ސިފަކޮށްފަ އެވެ.

ޓްރަމްޕް ވަނީ މީގެ ކުރިންވެސް ބައެއް ބޭސްތަކަކީ ފަރުވާއެއް ކަމަށް ވިދާޅުވެ ވާހަކަދައްކަވާފަ އެވެ. އަދި މި ބޭސްތަކުގެ ތެރޭގައި މެލޭރިއާއަށް ފަރުވާދޭން ބޭނުންކުރާ ހައިޑްރޮކްސީކޮލޮރޮކުއިން ހިމެނެ އެވެ. ނަމަވެސް، ބައެއް ދިރާސާތަކުން ދައްކާ ގޮތުގައި މި ބޭހުގެ ސަބަބުން ބަލިމީހާ އިތުރު ނުރައްކަލަކަށް ހުށައެޅުމުގެ ފުރުސަތު ބޮޑެވެ.