އެމިރޭޓްސް އިން ރާއްޖެއަށް ބާއްވަމުން އަންނަ ފްލައިޓްތަކުގެ އަދަދު އިތުރުކޮށް، މި މަހުގެ 7 ވަނަ ދުވަހުން ފެށިގެން ކޮންމެ ދުވަހަކު ރާއްޖެއަށް ފްލައިޓްތައް ބޭއްވުމަށް ނިންމައިފި އެވެ.

ވެލާނާ އިންޓަނޭޝަނަލް އެއާޕޯޓް ހިންގަމުން އަންނަ، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ބުނީ ދުބާއީ އިން، ރާއްޖެއަށް އެމިރޭޓްސް އިން މިހާރު ބާއްވަމުން އަންނަނީ ހަފްތާއަކު 6 ފްލައިޓް ކަމަށެވެ. ނަމަވެސް، މި މަހުގެ 7 ވަނަ ދުވަހުން ފެށިގެން ރާއްޖެއަށް ބާއްވަމުން އަންނަ ފްލައިޓްތަކުގެ އަދަދު އިތުރުކޮށް، އެމިރޭޓްސް އިން ހަފްތާގެ ކޮންމެ ދުވަހަކު ރާއްޖެއަށް ފްލައިޓްތައް ބޭއްވުމަށް ނިންމާފައިވާ ކަމަށް އެމްއޭސީއެލުން ބުންޏެވެ.

ޖުލައި މަހުގެ 15 ވަނަ ދުވަހު ރާއްޖޭގެ ބޯޑަރު ހުޅުވާލިފަހުން، އެއާލައިންތަކުން ރާއްޖެއަށް ބާއްވަމުން އަންނަ ދަތުރުތަކުގެ އަދަދުތައް އަންނަނީ އިތުރު ކުރަމުންނެވެ. އަދި ދުނިޔޭގެ ނަން މަޝްހޫރު ގިނަ އެއާލައިންތަކުގެ ދަތުރުތައް ރާއްޖެއަށް ފަށާފައިވާއިރު، އިތުރު އެއާލައިންތަކުގެ ދަތުރުތައް މި މަހުގައި ފެށުމަށް ނިންމާފައިވެއެވެ.

އެއާލައިންތަކުގެ ދަތުރުތައް އިތުރު ކުރަން ފެށުމާއެކު ރާއްޖޭގެ ފަތުރުވެރިކަން އިތުރަށް ރަނގަޅު ވެގެންދާނެ އެވެ.