ވޯލްޑް ހާޓް ޑޭގެ ތަަހުނިޔާ ރައީސް ދެއްވީ ސިއްހީ ރަނގަޅު އާދަތައް އަށަގެންނެވުމަށް އިލްތިމާސްކުރައްވަމުން!
ކޮވިޑް-19ގެ ސަބަބުން ދިރިއުޅުމުގެ އާންމު ދުވެލި މަޑުޖެހުމަކަށް ވަނީ އައިސްފައި
ރައީސް ސޯލިހު، ސިއްހީ ގޮތުން ރަނގަޅު އާދަތައް އަށަގެންނެވުމުގެ މުހިންމުކަމަށް އަލިއަޅުއްވައިލެއްވި
ސިއްހީ ރަނގަޅު އާދަތައް އަށަގެންނެވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އިލްތިމާސްކުރައްވައިފިއެވެ.
"ވޯލްޑް ހާޓް ޑޭ"ގެ މުނާސަބަތާއި ގުޅިގެން ރައީސް ކުރެއްވި ޓުވީޓެއްގައި ވިދާޅުވީ ކޮވިޑް-19ގެ ސަބަބުން ދިރިއުޅުމުގެ އާންމު ދުވެލި މަޑުޖެހުމަކަށް އައިސްފައިވާކަމަށާއި އެއާއި އެކު އިތުރު ހާސްކަމަކާއި ނުތަނަވަސްކަމެއް އާންމު ދިރިއުޅުމަށް ކުރަމުންދާކަމަށެވެ. އަދި "ވޯލްޑް ހާޓް ޑޭ" ފާހަގަކުރަމުން ދާއިރު، ސިއްހީ ގޮތުން ރަނގަޅު އާދަތައް އަށަގެންނެވުމުގެ މުހިންމުކަމަށް އަލިއަޅުއްވައި ރައީސް ވަނީ، ހިތުގެ އެކި ބަލިތަކުން ރައްކާތެރިވުމަށް ގަދައަޅައި މަސައްކަތްކުރެއްވުމަށް އެދިވަޑައިގަންނަވާފައެވެ.
ހާއްސަކޮށް، ކޮވިޑްގެ ބަލިމަޑުކަމުގެ ތެރޭގައިވެސް ރައްޔިތުން އެކަންކަމަށް ސަމާލުކަން ދިނުމަށް ރަައީސް ވަނީ އެދިވަޑައިގެންފައެވެ. ދުނިޔޭގައި ހަލުވިކަމާއި އެކު ފެތުރެމުންދާ ކޮވިޑް-19ގެ ކޭސްތައް ރާއްޖެއިންވެސް ފެނި، ބައްޔާއި ހަނގުރާމަ ކުރަމުންދާއިރު އެތައް ގިނަ ގޮންޖެހުންތަކާއި ވަނީ ކުރިމަތިލާންޖެހިފައެވެ. އެގޮތުން، ގިނަ ބައެއްގެ ވަޒީފާ ގެއްލި އާމްދަނީއަށް އަސަރުކޮށް ގައުމުގެ އިގްތިސާދުވެސް ވަނީ ބޮޑު އަނދަވަޅަކަށް ވެއްޓިފައެވެ.
މިކަންކަމުން އަރައިގަތުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.
