ގެސްޓު ހައުސްތައް ހުޅުވާލުމާއި ގުޅޭގޮތުން އައްޑޫ ސިޓީ ކައުންސިލާއި އެކު މަޝްވަރާކޮށްފި

ކޮވިޑް-19 އާއި ގުޅިގެން ފަތުރުވެރިކަމުގެ ދާއިރާގައި ޚިދުމަތްދޭ ތަންތަން ބަންދުކޮށްފައިވާއިރު، އަލުން ގެސްޓް ހައުސްތައް ހުޅުވާލުމާއި ގުޅޭގޮތުން އައްޑޫސިޓީ ކައުންސިލްޢާއި މަޝްވަރާކޮށްފި އެވެ.

އައްޑޫ ސިޓީ ކައުންސިލާއި ގެސްޓްހައުސް ހިންގާ ފަރާތްތަކާއި އެކު މަޝްވަރާކުރެވުނީ އަންނަ އޮކްޓޯބަރުގެ 15 ވަނަ ދުވަހު ގެސްޓްހައުސްތައް ފަތުރުވެރިކަމަށް ހުޅުވާލުމަށް ނިންމާފައިވާ ނިންމުމާއި ގުޅިގެން އެފަރާތްތަކުން ވެފައިވާ ތައްޔާރީތަކާއި ގުޅިގެންނެވެ.

Advertisement

މާލެ ސަރަހައްދުގެ ގެސްޓް ހައުސްތައް ފިޔަވައި އެހެން ރަށްތަކުގެ ގެސްޓް ހައުސްތައް އަންނަ މަހު 15 ގައި ހުޅުވުމަށް ވަނީ ނިންމާފައެވެ. މާލެ ސަރަހައްދުގެ ގެސްޓް ހައުސްތައް ހުޅުވާނީ މާލެ ސަރަހައްދުގެ ކޮވިޑް-19ގެ ހާލަތަށް ބެލުމަށްފަހު ނޮވެމްބަރު މަހުގެ މެދުތެރޭގަ އެވެ. މާލޭގައި ދިރިއުޅޭ މީހުންނަށް ރަށްރަށުގެ ގެސްޓުހައުސްތަކަށް ދިޔުމުގެ ހުއްދަ އެއްވެސް އަދި ދީފައެއް ނުވެއެވެ.

ކޮވިޑް-19 އިން ރައްކާތެރިވުމުގެ ފިޔަވަޅެއްގެ ގޮތުން ގެސްޓުހައުސްތައް ބަންދުކޮށްފައި އޮތުމަށް ފަހު އަލުން ހުޅުވާލާއިރު، ގެސްޓު ހައުސްތައް ހުންނަ ކޮންމެ ރަށެއްގައި ފްލޫ ކްލިނިކް ގާއިމްކޮށްފައި ހުންނަން ޖެހޭ ކަމަށް ހެލްތް މިނިސްޓަރަށް ލަފާއަރުވާ ޓެކްނިކަލް އެޑްވައިޒަރީ ގްރޫޕް (ޓެގް) އިންވަނީ ބުނެފަ އެވެ.

ގެސްޓްހައުސްތައް ހުޅުވުން ލަސްކުރީ ގެސްޓުހައުސްތަކަކީ މީހުން ދިރިއުޅޭ ރަށްރަށުގައި ހުންނަ ތަންތަނަށް ވުމުގެ އިތުރުން ރާއްޖޭގައި ކޮވިޑް-19 ފެތުރެމުންދާ ގޮތް އިތުރަށް ބަލަން ކަމަށް އެޗްއީއޯސީންވަނީ ބުނެފަ އެވެ.

ގެސްޓު ހައުސްތައް ހުންނަ ކޮންމެ ރަށެއްގައި ވެސް ޓާސްކު ފޯސްއެއް އެކުލަވާލަން ޖެހެއެވެ. ޓާސްކު ފޯހުގެ މައިގަނޑު ޒިންމާއަކީ ޕޮޒިޓިވް މީހުން ކަރަންޓީނު ކުރުމާއި، ސާމްޕަލް ނެގުމާއި، ކޮވިޑާ ގުޅިގެން އަޅާފައިވާ ފިޔަވަޅުތައް އިތުރަށް މޮނިޓާ ކުރުމެވެ. އަދި ރަށު ކައުންސިލްތަކާއި ގުޅިގެން މީހުން ހޭލުންތެރި ކުރުމުގެ ގޮތުން ޕްރޮގްރާމްތަކެއް ހިންގަން ޖެހޭނެއެވެ. މި ޕްރޮގްރާމުގެ ތެރެއިން ކޮވިޑާ ބެހޭ ގޮތުން މައުލޫމާތު ދިނުމާއި، ރައްކާތެރިކަމުގެ ފިޔަވަޅުތަކަށް އަހުލުވެރި ކުރުވުން ހިމެނެއެވެ

ކޮންމެ ގެސްޓުހައުސްއެއްގައި ސޭފް ޕްލޭން އެއް ހެދިފައި އޮންނަން ޖެހޭނެއެވެ. އެ ސޭފް ޕްލޭންގައި ގެސްޓުހައުސް އިން ބަލި ފެނިއްޖެ ހާލަތެއްގައި އަމަލުކުރަން ޖެހޭ ގޮތާއި، ފަތުރުވެރިންގެ އިތުރުން މުވައްޒަފުންގެ ރައްކާތެރިކަމަށްޓަކައި އެޅިފައިވާ ފިޔަވަޅުތައް އެނގެން ހުންނަ ޖެހޭނެއެވެ. އޭގެ ތެރޭގައި މަސައްކަތްކުރާ މުވައްޒަފުން ޑިއުޓީ ނިންމުމަށް ފަހު ގެޔަށް ދިޔުމުގެ ކުރިން ފެންވެރޭނެ އިންތިޒާމް ހަމަޖައްސާފައި ހުންނަން ޖެހެއެވެ

މީގެ އިތުރުންވެސް ރައްކާތެރިކަމުގެ ގޮތުން އަޅަންޖެހޭ ގިނަ ފިޔަވަޅުތަކެއް އެޗްއީއޯސީން ވަނީ ހާމަކޮށްފައެވެ.