މައުލޫމާތު ހާމަކުރުމަކީ އިޚުތިޔާރީ ކަމަކަށް ނުހަދާ އިސްނަގައިގެން މައުލޫމާތު ހާމަކުރުމަށް އޭސީސީގެ ރައީސް އިލްތިމާސް ކުރައްވައިފި
މި ޤާނޫނު ފާސްވެގެން ދިޔުމާއެކު ދައުލަތުގެ މުއައްސަސާތަކުން މައުލޫމާތު ހިފަހައްޓަމުން އައި ޘަގާފަތް ނިމުމަކަށް އައުމުގެ އުންމީދު އައު ވެގެންދިޔަ
އޭސީސީ ގެ ރައީސް މަރިޔަމް ޝިއުނާ
މައުލޫމާތު ހާމަކުރުމަކީ ދައުލަތުގެ އިދާރާތަކުން އިޚުތިޔާރީ ކަމެއްގެ ގޮތުގައި ނަހައްދަވާ އިސްނަގައިގެން މައުލޫމާތު ހާމަކުރުމަށް އެންޓި ކޮރަޕްޝަން ކޮމިޝަން (އޭސީސީ) ގެ ރައީސް މަރިޔަމް ޝިއުނާ އެދިވަޑައިގެންފި އެވެ.
ބައިނަލްއަގްވާމީ ގޮތުން ފާހަގަކުރާ މައުލޫމާތު ހޯދައި ލިބިގަތުމުގެ ދުވަހުގެ މުނާސަބާތުގައި ބޭއްވި ޖަލްސާގައި ވާހަކަދައްކަވަމުން އޭސީސީގެ ރައީސް ވިދާޅުވީ ދުވަހުގެ މުނާސަބަތުގައި ދެކަމަކަށް އިލްތިމާސް ކުރައްވާ ކަމަށެވެ. ފުރަތަމަ ކަމަކަށް ދައުލަތުގެ އިދާރާތަކުގައި މައުލޫމާތު ފޯރުކޮށްދިނުމަށްޓަކައި ތިބި އިންފޮރމޭޝަން އޮފިސަރުންގެ އަރިހުން އެދިވަޑައިގަންނަވަނީ މައުލޫމާތު ހޯދާ ލިބިގަތުމުގެ ޤާނޫނު ތަންފީޒުކޮށް ރައްޔިތުންނަށް އަދި ފާރަވެރިވާ ފަރާތްތަކަށް ޖަވާބުދާރީވާން ތިބި ފަރާތްތަކަކީ އިންފޮރމޭޝަން އޮފިސަރުން ކަމަށްވާތީ ފަސްނުޖެހި ލަސްނުކޮށް ރައްޔިތުންނަށް މައުލޫމާތު ފޯރުކޮށްދީ ހާމަކޮށްދިނުމަށް ކަމަށެވެ.
އަދި ދައުލަތުގެ އިދާރާތަކުގެ އިސްވެރިންގެ އަރިހުން އެދިވަޑައިގަންނަވަނީ އިޚުތިޔާރީ ކަމެއްގެ ގޮތުގައި އެކަން ނުހައްދަވާ މައުލޫމާތު ފޯރުކޮށްދިނުމަށް ކަމަށް ޝިއުނާ ވިދާޅުވިއެވެ. އެގޮތަށް ކަންތައް ކުރެވޭނަމަ ނަޒޭހަތްތެރިވެ ރައްޔިތުން ދައުލަތަށް ކުރާ އިތުބާރު ބޮޑުވެގެންދާނެ ކަމަށް ޝިއުނާ ވިދާޅުވިއެވެ.
ޝިއުނާ ވިދާޅުވީ 2014 ވަނަ އަހަރު މި ޤާނޫނު ފާސްވެގެން ދިޔުމާއެކު ދައުލަތުގެ މުއައްސަސާތަކުން މައުލޫމާތު ހިފަހައްޓަމުން އައި ޘަގާފަތް ނިމުމަކަށް އައުމުގެ އުންމީދު އައު ވެގެންދިޔަ ކަމަށެވެ. އަދި ކިތަންމެ ފުރިހަމަ ޤާނޫނެއް އޮތަސް އަދި އެހިސާބުން އެހައްގު ކަށަވަރުނުވާ ކަމަށް ޝިއުނާ ވިދާޅުވި އެވެ.
ޝިއުނާ ވިދާޅުވީ އެހެންނަމަވެސް މިހާރު ހާލަތު ބަދަލުވެ މައުލޫމާތު ހޯދާ ލިބިގަތުމުގެ ޤާނޫނަށް އަމަލުކުރަމުންދާ ކަމުގެ އިހުސާސްކުރެވޭ ކަމަށެވެ. ބައެއް އިދާރާތަކުން އަދިވެސް މައުލޫމާތު ހިފެހެއްޓުމުގެ އުސޫލުތަކެއް ގެންގުޅުނު ނަމަވެސް ޖުމްލަ ގޮތެއްގައި ދައުލަތުގެ ގިނަ އިދާރާތަކުން މިކަމަށްދޭ އަހައްމިއްޔަތުކަން ފެނިގެންދާ ކަމަށް ޝިއުނާ ވިދާޅުވި އެވެ.
އަދި އިންފޮރމޭޝަން ކޮމިޝަނަރުގެ މަސައްކަތަކީވެސް މިއަދު ފާހަގަކޮށްލެވޭ މަސައްކަތެއް ކަމަށް ޝިއުނާ ވިދާޅުވި އެވެ. އެގޮތުން އިންފޮރމޭޝަން ކޮމިޝަނަރ އޮފީހަށް ހުށަހެޅޭ މައްސަލަތަކުގެ އަޑުއެހުންތައް ހުޅުވާލައިގެން ކުރިޔަށްގެންދާ ކަމީ މިހައްގުގެ ދިފާއުގައި ބަޔަކު ތިބިކަން އަންގައިދޭ ކަމެއްކަމަށް ޝިއުނާ ވިދާޅުވިއެވެ. އަދި ރައްޔިތުންވެސް މި ޤާނޫނުގެ ބޭނުންކޮށްގެން މައުލޫމާތު ހޯދުމަށް ފޯރމް ހުށަހަޅައިގެން މައުލޫމާތު ހޯދަމުންދާތަން ފެންނަމުންދާ ކަމަށް ޝިއުނާ ވިދާޅުވި އެވެ.
ޝިއުނާ ވިދާޅުވީ މައުލޫމާތު ހޯދާ ލިބިގަތުމަކީ އިންސާނީ އެތައް ހައްގެއް ކަށަވަރު ކޮށް ޔަގީންކުރުމަށްޓަކައި ލިބިދީފައިވާ ވަރަށް މުހިންމު ހައްގެއް ކަމަށެވެ. އަދި މުޖުތަމައުގެ އެތައް މައްސަލަތަކަކަށް ހައްލު ހޯދައިދޭ ހައްގަކަށް މިހައްގުވާއިރު ރައްޔިތުންގެ ބާރުވެރިކަން އެގައުމެއްގެ ވެރިކަމުގެ ނިޒާމުގައި އޮންނަ މިންވަރު ދެނެގަތުމަށްވެސް މިހައްގު މުހިންމު ކަމަށް ޝިއުނާ ވިދާޅުވި އެވެ.
