ސައްހަ މައުލޫމާތު ހާމަކުރުމަށް މުއައްސަސާތަކުގެ އެއްބާރުލުން މުހިންމު: ޕީޖީ
28 ސެޕްޓެމްބަރު 2020 | ހޯމަ 10:14މުއައްސަސާތަކުގެ މައުލޫމާތު މިހާރަށްވުރެ ފުޅާކޮށް ފޯރުކޮށްދޭންޖެހޭ
ޕްރޮސެކިއުޓާރ ޖެނެރަލް ހުސައިން ޝަމީމް
ސަރުކާރުގެ މުއައްސަސާތަކުން ކުރާ ކަންކަމުގެ ސައްޙަ މައުލޫމާތު ހާމަކުރުމަށް އެ މުއައްސަސާތަކުގެ މައުލޫމާތު މިހާރަށްވުރެ ފުޅާކޮށް ފޯރުކޮށްދޭންޖެހޭ ކަމަށް ޕްރޮސެކިއުޓާރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ބައިނަލްއަޤްވާމީ ގޮތުން ފާހަގަކުރާ މައުލޫމާތު ހޯދާ ލިބިގަތުމުގެ ހައްގުގެ ދުވަހާ ގުޅިގެން ބޭއްވި ޖަލްސާގައި ވާހަކަ ދައްކަވަމުން ޕީޖީ ޝަމީމް ވިދާޅުވީ މީގެ އަހަރުތަކެއް ކުރިން ރާއްޖެ އޮތީ މައުލޫމާތު ހޯދައި ލިބިގަތުމުގެ ދާއިރާގައި ޑިމޮކްރެޓިކް އެހެން ގައުމުތަކަށްވުރެ ކުޑަ ތަންކޮޅެއް ފަހަތުގައި ކަމަށާއި ނަމަވެސް 2008 ވަނަ އަހަރަށްފަހު މިދާއިރާއިން ރާއްޖެ ކުރިއަރަމުން އަންނަ ކަމަށެވެ.
ޕީޖީ ޝަމީމް ވިދާޅުވީ، ދައުލަތުގެ ހިންގުމުގެ ދާއިރާގައި މަސައްކަތްކުރާ ފަރާތްތަކާއި މުއައްސަސާތަކުން އެ އިދާރާތަކުގެ ސިޔާސަތުތައް ބައްޓަންކުރަންވާނީ އެތަނަކުން ލިބޭ މައުލޫމާތުތަކެއްގެ މައްޗަށް ކަމަށެވެ. އެގޮތުން އެ އިދާރާތަކުގެ މަސައްކަތްތައް އިތުރަށް ހަރުދަނާކޮށް، ތަރައްގީކުރުމުގައި އެ ދާއިރާއަކުން ލިބެންހުރި މައުލޫމާތުގެ ފޯރުކޮށްދިނުމަކީ ކޮންމެހެން ކުރަންޖެހޭ މުހިންމު ކަމެއް ކަމަށެވެ.
ސައްހަ ނޫން މައުލޫމާތުގެ މައްޗަށް ބިނާކޮށް ތަފާތު ވާހަކަތައް ފެތުރުމަކީ އާންމުކޮށް ދިމާވަމުން އަންނަ މައްސަލައެއްކަން ފާހަގަކުރައްވާ ޕީޖީ ވިދާޅުވީ، އެ މައްސަލަތައް ހައްލުކުރެވޭނީ ދައުލަތުގެ މުއައްސަސާތަކުން އެ މުއައްސަސާތަކުގެ މައުލޫމާތު ވީހާވެސް ފަސޭހައިން މިހާރަށްވުރެ ފުޅާ ދާއިރާއެއްގައި ރައްޔިތުންނަށް ފޯރުކޮށްދީގެން ކަމަށެވެ.
ޕީޖީ ވަނީ މައުލޫމާތު ހޯދާ ލިބިގަތުމުގައި އެމަނިކުފާނު މަސައްކަތް ކުރައްވާ ޕްރޮސެކިއުޓާ ޖެނެރަލްގެ އޮފީހުގެ މަސައްކަތްތައް ރޭވިގެން އެކަންކަން ކުރެވެމުންދާ ގޮތާ ބެހޭ ގޮތުން ވެސް ވާހަކަ ދައްކަވާފައެވެ.
އެގޮތުން މިހާތަނަށް ރާއްޖޭގެ ކޯޓުތަކުގައި ނުބެލި ހުރި މައްސަލަތަކާއި، އެއީ ކޮންކޮން ކުށެއްގެ މައްސަލަތަކެއްކަން ވެސް ބަލާ ހޯދައި، އެ މައުލޫމާތުތައް ބޭނުންވެއްޖެ ކޮންމެ ހިނދެއްގައި ފޯރުކޮށްދެވޭނެ ގޮތަށް ފާއިތުވި އަހަރެއްހާ ދުވަހުގެ ތެރޭގައި މަސައްކަތް ކުރައްވާފައިވާ ކަމަށް ވިދާޅުވިއެވެ.
