ހިޔުމަން ރައިޓްސް ކޮމިޝަން އޮފް ދި މޯލްޑިވްސް (އެޗްއާރުސީއެމް) އިން ކުރިއަށް ގެންދާ ބައެއް ތަހުގީގުތަކަށް ދައުލަތުގެ މުއައްސަސާތަކާއި އަމިއްލަ ކުންފުނިތަކާ އަދި އަމިއްލަ ފަރުދުންގެ އެއްބާރުލުން ނުލިބޭ ކަމަށާއި އެހެން ކަމުން ކުރިއަށް އޮތްތަނުގައި އެޗްއާރުސީއެމްގެ ތަހުގީގުތަކަށް އެއްބާރުލުން ނުދޭ ފަރާތްތަށް އެޗްއާރުސީއެމްގެ ގާނޫނުގެ ދަށުން އަމުރު ނެރެގެން ކޮމިޝަނަށް ހާޒިރުކޮށްގެން މައްސަލަތަކުގެ ކުރިއަށް ގެންދިއުމަށް ނިންމާފައިވާ ކަމަށް އެޗްއާރުސީއެމް އިން ބުނެފިއެވެ.
އެޗްއާރުސީއެމްގެ އަހަރީ ރިޕޯޓް ނެރުމަށް ބޭއްވި ރަސްމިއްޔާތުގައި ނޫސްވެރިންނަށް މައުލޫމާތު ދެއްވަމުން އެޗްއާރުސީއެމްގެ ނައިބް ރައީސް ޝިފާގް މުފީދު ވިދާޅުވީ ކޮމިޝަން އަށް ހުށަހެޅޭ މައްސަލަތައް އިތުރުވިޔަ ނުދީ އަދި ހުށަހެޅޭ މައްސަލަތައް އަވަސް ކަމާއެކު ތަހުގީގު ކުރުމަށްޓަކައި ފިޔަވަޅުތަކެއް އެޅުމަަށް ކޮމިޝަނުން ނިންމާފައިވާ ކަމަށެވެ.
އެގޮތުން ދައުލަތުގެ މުއައްސަސާތަކުގައި ތިއްބަވާ މީހުންނާ އަދި އެހެން ވެސް ފަރާތްތަކުގެ ތެެރެއިން ކޮމިޝަންގެ ތަހުގީގަށް އެއްބާރުލުން ނުދޭ ފަރާތްތައް ކޮމިޝަންގެ ގާނޫނުގައިވާ ގޮތުގެ މަތިން އަމުރު ނެރެގެން ކޮމިޝަނަށް ހާޒިރުކޮށްގެން ވެސް މައްސަލަތައް ތަހުގީގު ކުރުމަށް ނިންމާފައިވާ ކަމަށެވެ.
ޝިފާގް ވިދާޅުވީ ކޮމިޝަނުން ކުރިއަށް ގެންދާ ތަހުގީގުތަކަށް ހުރަސްއަޅައި ފަރާތްކާ މެދު ފިޔަވަޅު އެޅުމުގައި އެއްވެސް މީހަކަށް ބެލުމެއް ނޯންނާނެ ކަމަށާއި ކޮމިޝަންގެ ތަހުގީގަށް އެއްބާރުލުން ނުދޭ ހުރިހާ ފަރާތްތައް ވެސް ގާނޫނުގައިވާ ގޮތުގެ މަތިން އަމުރު ނެގެން ކޮމިޝަނަށް ހާޒިރު ކުރާނެ ކަމަށެވެ.
ޝިފާގް ވިދާޅުވީ މައްސަލައެއްގެ ތަހުގީގަށް ކޮމިޝަނަށް ހާޒިރު ވުމަށް އަންގާ ނެރޭ އަމުތަކަށް ތަބާ ނުވެއްޖެ ނަމަ އެ އަމުރަކަށް ތަބާނުވި ފަރާތަކާ ދޭތެރޭ އެޗްއާރުސީއެމްގެ ގާނޫނުގެ ދަށުން އަޅަން ޖެހޭ ފިޔަވަޅު އަޅާނެ ކަމަށެވެ. އަދި ކޮމިޝަނުން ކުރުމުންދާ ތަހުގީގުތަކާއި ކޮމިޝަނުން ކުރަމުން ގެންދާ މަސައްކަތްތައް އެންމެ ފުރިހަމަ ގޮތުގައި ކުރިއަށް ގެންދެވޭނީ އެޗްއާރުސީއެމްގެ ގާނޫނު ފުރިހަމަ އަށް ތަންފީޒް ކޮށްގެން ކަމަށާއި އެޗްއާރުސީއެމްގެ ގާނޫނު ތަންފީޒް ކުރުމަށްޓައި ކުރަން ޖެހުނު ކޮންމެ ކަމެއް ވެސް ކުރާނެ ކަމަށް ޝިފާގް ވިދާޅުވިއެވެ. އަދި ކޮމިޝަންގެ ގާނޫނު ތަންފީޒް ކުރުމަށް އެއްވެސް ވަރަކަަށް ފަހަތަށް ނުޖެހޭނެ ކަމަށް ވެސް ޝިފާގް ވިދާޅުވިއެވެ.
އެޗްއާރުސީއެމްގެ ނައިބް ރައީސް ވިދާޅުވީ ކޮމިޝަނުން ކުރިއަށް ގެންދާ ބައެއް ތަހުގީގުތަކަށާއި އަދި ހުށަހެޅޭ ބައެއް މައްސަލަތަކަށް ބައެއް ފަރާތްތަކުން އެއްބާރުލުން ނުދިނުމުގެ ސަބަބަުން ކޮމިޝަނުން ބައެއް މައއްސަލަތައް ނިންމާއިރު އެ މައްސަލައެއްގެ މުޢާލާތް ކެނޑޭ ކަމަށެވެ. އަދި އެކަމުގެ ސަބަބުން އެޗްއާރުސީއެމް އަށް މައްސަލަ ހުށަހަޅާ ބައެއް ފަރާތްތަކަށް ފޫނުބެދޭ ވަރުގެ ބޮޑެތި ގެއްލުންތައް ލިބެމުންދާ ކަމަށާއި އެކަން ހުއްޓުމަކަށް ގެނައުމަށް މިއަހަރު ތެރޭ ކޮމިޝަނުން ހަރުކަށި ފިޔަވަޅުތަކެއް އަޅާނެ ކަމަށް ޝިފާގް ވިދާޅުވިއެވެ. އަދި އެކަމަށްޓަކައި އަޅާ އެންމެ ފުރަތަމަ ފިޔަވަޅަކީ ކޮމިޝަނަށް އެއްބާރުލުން ނުދޭ ފަރާތްތައް އަމުރު ނެރެގެން ކޮމިޝަންގެ ތަހުގީގަށް ހާޒިރު ކުރުން ކަމަށް ޝިފާގް ވިދާޅުވިއެވެ.
މީގެ އިތުރުން ޝިފާގް ވިދާޅުވީ މިހާރު މުޖުތަމައުގައި ހުރި މައްސަލަތަކުގެ ތެރެއިން ހާއްސަ ސަމާލު ކަމެއް ދޭން ޖެހޭ މައްސަލަތަކެއް އެބަހުރި ކަމަށެވެ. އެގޮތުން ކުޑަކުދިން މައްސަލަތަކާއި ގައިދީންގެ މައްސަލަތަކާ އަދި ސިއްޙީ ފަރުވާއާ ގުޅުންހުރި މައްސަލަތައް ހިމެނޭ ކަމަށް ޝިފާގް ވިދާޅުވިއެވެ. އަދި އެ މައްސަލަތަކަށް މިއަހަރު ތެރޭ ވަރަށް ހާއްސަ ސަމާލުކަމެއް ދޭނެ ކަމަށް ޝިފާގް ވިދާޅުވިއެވެ. އަދި ވިދާޅުވީ ކުޑަކުންދިންގެ ހައްގުތައް ހިމާޔަތް ކުރުމަށްޓަކައި ކުރަމުންދާ މަސައްކަތްތައް ހަރަދަނާކޮށް ކުޑަކުންދިންގެ ހައްގުތައް ހިމާޔަތް ކުރުމަށްޓަކައި މިހާރު ރައްޔިތުންގެ މަޖިލީހުގައި އޮތް ކުޑަކުދިންގެ ހައްގުތައް ހިމާޔަތް ކުރުމުގެ ބިލް މަޖިލީހުން ވަރަށް އަވަހަށް ފާސްކުރަން ޖެހޭ ކަމަށާއި އެކަން ކޮށްދިނުމަށް އެދޭ ކމަށް ޝިފާގް ވިދާޅުވިއެވެ.
