މާމެންދޫން ޕޮޒިޓިވްވި އާއިލާގައި ހައި ރިސްކު ދެމަފިރިން ހިމެނޭ: ކައުންސިލް ރައީސް

ގއ. މާމެންދޫން ކޮވިޑް-19 އަށް ޕޮޒިޓިވްވި އާއިލާގައި އުމުރުން ދުވަސްވީ ހައި ރިސްކު ދެމަފިރިން ހިމެނޭ ކަމަށް އެރަށު ކައުންސިލްގެ ރައީސް މުހައްމަދު ޒަޢީމް ވިދާޅުވެއްޖެއެވެ.

މި މަހުގެ 13 ވަނަ ދުވަހު މާލެއިން މާމެންދޫއަށް ބަދަލުވި އާއިލާގައި ހިމެނެނީ ޖުމްލަ 7 މެންބަރުންނެވެ. އޭގެތެރެއިން ކޮވިޑަށް ޕޮޒިޓިވް ވެފައިވަނީ 5 މެންބަރުންނެވެ.

Advertisement

ރާއްޖެއެމްވީއަށް މައުލޫމާތު ދެއްވަމުން މާމެންދޫ ކައުންސިލްގެ ރައީސް ވިދާޅުވީ، އެ އާއިލާގެ މީހުން ކޮވިޑަށް ޕޮޒިޓިވްވިކަން އެނގުނީ މާލެއިން ރަށަށް ގޮސް ކަރަންޓީނުގެ މުއްދަތުގައި ކޮވިޑްގެ އަލާމާތްތަކެއް އުޅޭ ކަމަށް ބުނެ ހެދި ޓެސްޓުތަކުގެ ނަތީޖާ ލިބުމުން ކަމަށެވެ. އޭނާ ވިދާޅުވީ މި އާއިލާގެ ތެރެއިން އެންމެ ދޮށްޓަށް ތިބި ފަސް މީހުން ކޮވިޑަށް ޕޮޒިޓިވްވި އިރު، އެ އާއިލާގައި އުމުރުން 4 އަހަރު އަހަރުގެ ކުއްޖަކާއި 2 މަސް ނުފުރޭ ތުއްތު ކުއްޖަކު ވެސް ކަރަންޓީނުގައި އެގޭގައި ތިބި ކަމަށެވެ.

ޒަޢީމް ވިދާޅުވީ ތުއްތު ދެކުދިންނަށް ވެސް މިހާރު ކޮންމެވެސް ވަރެއްގެ އުނދަގޫތަކެއް ވަމުންދާކަމުގެ މައުލޫމާތު ކައުންސިލަށް ލިބިފައިވާ ކަމަށާއި އެއާއެކު ވީއެންމެ އަވަހަށް އެ ދެކުދިން ޓެސްޓު ކުރުމުގެ މަސައްކަތް ކުރުމަށް ކަމާބެހޭ އިދާރާތަކާއި ގުޅިގެން ކުރިއަށްދާ ކަމަށެވެ.

ޒަޢީމް ވިދާޅުވީ ކޮވިޑަށް ޕޮޒިޓިވްވި އާއިލާ އެއްކޮށް ގއ. ވިލިނގިލީ ކޮވިޑް ފެސިލިޓީއަށް ފޮނުވުމަށްޓަކައި ކުރަންޖެހޭ ކަންކަން ވެސް މިހާރު ކުރަމުންދާ ކަމަށެވެ. އޭނާ ވިދާޅުވީ ހައި ރިސްކު ދެމަފިރިންގެ ހާލު އެހާ ރަނގަޅު ނޫން އިރު، ވީއެންމެ އަވަހަށް އެފަރާތްތައް ވިލިނގިލި ކޮވިޑް ފެސިލިޓީއަށް ގެންދިއުމަކީ މިހާރުން މިހާރަށް ވެސް ކުރުން ވަރަށް މުހިންމު ކަމެއް ކަމަށެވެ.

މާމެންދޫ އުމުރުން ދުވަސްވީ ދެމަފިރިންގެ ތެރެއިން އަންހެން މީހާއަކީ 63 އަހަރުގެ މީހެކެވެ. އަދި ފިރިހެން މީހާގެ އުމުރަކީ 76 އަހަރެވެ.

މިކަމާ ގުޅިގެން ރާއްޖެއެމްވީއަށް މައުލޫމާތު ދެއްވަމުން ގއ. ވިލިނގިލީ ހޮސްޕިޓަލްގެ މެނޭޖަރ ޝަރީފް އަހުމަދު ވިދާޅުވީ މާމެންދޫން ޕޮޒިޓިވްވި އާއިލާ ވީއެންމެ އަވަހަށް އެރަށު ކޮވިޑް ފެސިލިޓީއަށް ބަދަލު ކުރުމަށް އެޗްޕީއޭ އާއި ގުޅިގެން މަސައްކަތް ކުރަމުންދާ ކަމަށެވެ. އެގޮތުން މިރޭގެ ވަގުތެއްގައި ނޫންނަމަ މާދަމާ ހެނދުނު އެންމެ ލަސްވެގެން ވެސް އެ އާއިލާ ބަދަލު ކުރެވޭނެ ކަމަށް އޭނާ ވިދާޅުވިއެވެ.

ވިލިނގިލީ ކޮވިޑް ފެސިލިޓީގައި މިހާރު ވެސް އަންނަނީ އުމުރުން ދުވަސްވީ ދެމަފިރިންނާއި އިތުރު މީހަކަށް ފަރުވާ ދެމުންނެވެ.