ސައުދަކީ އަދިވެސް ޕީޕީއެމްގެ މެމްބަރެއް
ރައީސް މައުމޫނު ޕީޕީއެމްއިން ވަކިކޮށްފައިވާ ބައެއް މެމްބަރުންނާއެކު
ޕީޕީއެމްގެ ސުލޫކީ ކޮމެޓީއަކީ ސަސްޕެންދްކޮށްފައިވާ ބާތިލް ކޮމެޓީއެއް ކަމަށާއި، ބާތިލް ތަނަކުން ނިންމާ ކޮންމެ ނިންމުމެއް ބާތިލްވާނެ ކަމަށް ޕީޕީއެމްގެ އިންތިހާބީ ރައީސް މައުމޫނު އަބްދުއްޤައްޔޫމް ވިދާޅުވެއްޖެ އެވެ.
ރައީސް މައުމޫނު އަންގާރަ ދުވަހު ކުރެއްވި ޓުވީޓެއްގައި ވިދާޅުވެފައިވަނީ، "އެ ބުނާ ސުލުކީ ކޮމެޓީއަކީ، ސަސްޕެންޑްކޮށްފައިވާ ބާތިލް ކޮމެޓީއެއް" ކަމަށެވެ. އަދި ބާތިލްތަނަކުން ނިންމާ ކޮންމެ ނިންމުމެއް ވާނީ ބާތިލް އެއްޗަކަށް ކަމަށާއި، ޤާނޫނީ ހަމައަކީ އެއީކަމަށް ރައީސް މައުމޫނު ވިދާޅުވި އެވެ.
ޕީޕީއެމްގެ މެމްބަރުކަމުން ވިލިގނލި ދައިރާގެ މެމްބަރު ސައުދު ހުސެއިން ވަކިކުރުމަށް ރައީސް އަބްދުﷲ ޔާމީން ފެކްޝަންގެ ސުލޫކީ ކޮމެޓީން ނިންމި ނިންމުމަށް އިޝާރަތްކުރައްވައި ރައީސް މައުމޫނު ވިދާޅުވެފައި ވަނީ، ސައުދަކީ އަދިވެސް ޕީޕީއެމްގެ މެމްބަރެއް ކަމަށެވެ. އަދި ޕީޕީއެމްގެ ރައީސްގެ ހައިސިއްޔަތުން ސައުދުގެ މަސައްކަތް ފާހަގަކުރައްވާ ކަމަށް ރައީސް މައުމޫނު ވިދާޅުވެފައިވެއެވެ.
ޕީޕީއެމްގެ މުސްތަޝާރު ރައީސް އަބްދުﷲ ޔާމީންގެ ފެކްޝަނުން ނިންމާ ކޮންމެ ނިންމުމެއް ބާތިލްވާނެކަމަށް ރައީސް މައުމޫނު ވިދާޅުވިއިރު، ޕީޕީއެމްގެ ސުލޫކީ ކޮމެޓީ ވަނީ ރައީސް މައުމޫނުވެސް ޕާޓީން ވަކިކޮށްފަ އެވެ. އެގެއިތުރުން ރައްޔިތުންގެ މަޖިލީހުގެ މެމްބަރު މުހައްމަދު ވަހީދު އިބްރާހިމާއި، މެމްބަރު މުހައްމަދު އަމީތާއި، މެމްބަރު އަހުމަދު ފާރިސް މައުމޫނުވެސް ވަނީ ޕާޓީން ވަކިކޮށްފަ އެވެ. އޭގެއިތުރުންވެސް ސަރުކާރުގެ ސިޔާސަތުތަކަށް ފާޑުކިޔާ ކޮންމެ ފަރާތެއްގެ މައްސަލަތައްވެސް ބަލައި، ޕީޕީއެމް ސުލޫކީ ކޮމެޓީން ގެންދަނީ އެ ފަރާތްތައް ޕާޓީން ވަކިކުރަމުންނެވެ.
