އެމްޑީޕީގެ ޗެއާޕާސަން އިންތިހާބުގެ ވޯޓްލުން މިއަދު ބާއްވާނީ
ވޯޓުލުން ކުރިއަށް ދަނީ މެންދުރު 2:00 އިން އިރުއޮއްސި 6:00 އަށް
އެމްޑީޕީން މާލޭގައި ކުރިއަށް ގެންދިޔަ ސުލްހަވެރި ހިނގާލުމެއްގެ ތެރެއިން
އެމްޑީޕީގެ ޗެއާޕާސަން އިންތިހާބުގެ ވޯޓުލުން ހުކުރު ދުވަހު ރާއްޖޭގައި މީހުން ދިރިއުޅޭ ކޮންމެ ރަށެއްގައި ކުރިއަށްދާނެ ކަމަށް އެޕާޓީން ބުނެފިއެވެ.
ދިވެހިރާއްޖޭގެ އެންމެ ބޮޑު އެއް ސިޔާސީ ޕާޓީގެ ޗެއާޕާސަންގެ މަގާމް ހުސްވީ ކުރިން އެމަގާމުގައި ހުންނެވި އަލީ ވަހީދު އިސްތިއުފާ ދެއްވުމުމުނެވެ. އެ މަގާމަށް ކުރިމަތިލައްވާފައި ވަނީ އެމްޑީޕީ ސަރުކާރުގެ ޔޫތު މިނިސްޓަރު އަދި ރައީސް ނަޝީދުގެ ގާނޫނީ ވަކީލުންގެ ޓީމުގައި ހިމެނިވަޑައިގަންވާ އަލްއުސްތާޒް ހަސަން ލަތީފް އެކަންޏެވެ.
އެމްޑީޕީން ބުނީ ޗެއާޕާސަންގެ އިންތިހާބުގެ ވޯޓުލުން ހުކުރު ދުވަހު މެންދުރު 2:00 އިން އިރުއޮއްސި 6:00 އަށް ކުރިއަށް ދާނެ ކަމަށެވެ. އަތޮޅުތެރޭގެ ރަށްތަކުގައި ވޯޓްލުން ކުރިއަށް ގެންދިއުމަށް ނިންމާފައިވަނީ އެމްޑީޕީގެ ހަރުގެތަކުގައެވެ.
މާލޭގައި ދިރިއުޅުންވާ އެޕާޓީގެ މެމްބަރުން ވޯޓްލުމަށް ޖުމްލަ 7 ވޯޓް ފޮށި ވަނީ ބައްޓާފައެވެ.
މާލޭގައި ވޯޓް ފޮށިތަށް ބެހައްޓާފައިވާ ސަރަހައްދުތަށް
- މާފަންނު ދެކުނު އަދި މެދު ދާއިރާގެ ވޯޓް ފޮށި ބެހެއްޓިފައި ހުންނާނީ މ.ރާޅުފުށި (ޖަވާހިރުމަގު، ކޮރަލް ހޮޓެލް ކުރިމަތި) ގައެވެ.
- މައްޗަންގޯޅި އުތުރު އަދި ދެކުނު ގެ ވޯޓް ފޮށި ހުންނަނީ ކެފެއިނާ ( އިސްކަންދަރު މަގު) ގައެވެ.
- ހެންވޭރު އުތުރު، މެދު އަދި ދެނުކު ދާއިރާގެ ވޯޓްފޮށި ބެހެއްޓިފައި ހުންނަނީ ހ. ރަބީއީ މަންޒިލް ( ސޯސަންމަގު) ގައެވެ.
- މާލޭގައި ދިރިއުޅޭ އައްޑޫ އަދި ފުވައްމުލަކު މެމްބަރުންނަން ހާއްސަކޮށްފައިވާ ވޯޓްފޮށި ބެހެއްޓިފައި ހުންނަނީ އެމްޑީޕީ އޮފީސް ގްރައުންޑު ފްލޯގައެވެ.
- މާލޭގައި ދިރިއުޅޭ އަތޮޅުތެރޭގެ ރައްޔިތުންނަން ހާއްސަކޮށްގެން ބައްހައްޓާ ވޯޓް ފޮށިތަށް ބެހެއްޓިފައި ހުންނަނީ އެމްޑީޕީ ހަރުގޭގައެވެ.
- ވިލިމާލޭގައި ވޯޓް ފޮށި ވިލިމާލޭ އެމްޑީޕީ ހަރުގޭގައި ބެހެއްޓުމަށް ނިންމާފައިވާއިރު ހުޅުމާލޭގެ ވޯޓްފޮށި ބެހެއްޓުމަށް ހަމަޖެހިފައި ވަނީ ފިތުރޯނު މަގު ހުންނަ ވޯޓަރސްޕޯޓް ކައިރީގައެވެ.
މީގެ އިތުރުން ސްރީލަންކާގައި ވޯޓްލުން ކުރިއަށް ގެންދިއުމަށް ނިންމާފައި ވަނީ 10/69 އޯލްޑް ނާވަލަ ރޯޑް، ނުގޭގޮޑާގަ އެވެ. މިވަގުތު ސްލީލަންކާގައި ހުންނެވި ކުރީގެ ރައީސް މުހައްމަދު ނަޝީދު ވެސް ޗެއާޕާސަން އިންތިހާބުގެ ވޯޓް ލުމުގައި ބައިވެރިވެ ވަޑައިގަންނަވާނެ ކަމަށް ވަނީ ވިދާޅުވެފައެވެ.
ހަސަން ލަތީފު އެ މަގާމަށް ހޮވިވަޑައިގަންނަވާނީ އެންމެ މަދުވެގެން އެމްޑީޕީގެ މެމްބަރުންގެ ތެރެއިން 5،000 މެމްބަރުންގެ ތާއިދު ލިބުމުންނެވެ.
މެމްބަރުންގެ ތާއިދު ހޯދުމަށް ހަސަން ލަތީފް ވަނީ ރާއްޖޭގެ އެކި ކަންކޮޅުތަކަށް ކެމްޕޭއިން ދަތުރުތަށް ކުރައްވާފައެވެ.
